ဧရာဝတီတိုင်းမ်
နိုဝင်ဘာလ ၁၀ ရက်
ကရင်ပြည်နယ်၊မြဝတီခရိုင်၊ ဝေါလေဒေသအတွင်း နေရာတချို့ကို ယနေ့ နိုဝင်ဘာလ ၁၀ ရက် မနက် ၁၁ နာရီဝန်းကျင်မှ နေ့လည် ၁ နာရီအထိ စစ်ကောင်စီတပ်က Mi -35 P အမျိုးအစား တိုက်ခိုက်ရေးရဟတ်ယာဉ်ဖြင့် ၂ ကြိမ်တိုင်ပစ်ခတ်တိုက်ခိုက်မှုများလုပ်ဆောင်ခဲ့ကြောင်းကော်ဘရာစစ်ကြောင်းထံကသိရသည်။
ကရင့်ပူးပေါင်းတပ်ဖွဲ့များရှိနိုင်မည်ဟူယူဆသည့်ဘလက် တိုကျေးရွာနှင့် အနီးဝန်းကျင်နေရာများသို့ တိုက်ခိုက်ရေးရဟတ်ယာဥ်ဖြင့် နှစ်ကြိမ် ပစ်ခတ်တိုက်ခိုက်ခဲ့သော် လည်း တော်လှန်ရေးရဲဘော်များဘက်မှထိခိုက်မရှိကြောင်းသိရသည်။
” လာပစ်တာက ၂ ခါလာပစ်တာပေါ့၊ သူတို့ပစ်သွားတဲ့နေရာတွေက စခန်းတွေနဲ့ ရဲဘော်တွေရှိနိုင်တယ်လို့ယူဆပြီးရမ်းသမ်းပစ်သွားပုံရတယ်။ထိခိုက်တာမျိုးတော့ မရှိဘူး” ဟု ကော်ဘရာဒုစစ်ကြောင်းမှူး ဗိုလ်ကြီး စောကော်ကဧရာဝတီတိုင်းမ်ကိုပြောသည်။
စစ်ကောင်စီတပ်က ရဟတ်ယာဥ်ဖြင့် လာရောက်ပစ်ခတ်နေစဥ်အတွင်း MPA ATR (42) အမျိုးအစား ကင်းထောက် လေယာဉ်ဖြင့် လေ့ကေ့ကော်၊ ဖလူး၊ မင်းလက်ပံ၊ သဲဖြူချောင်း၊ လူခို့၊ ဘလက်တို၊ သေ့ဘော့ဘိုး ကျေးရွာအနီးဝန်းကျင်ဒေသများပျံသန်းကင်းထောက်ခဲ့ကြောင်းသိရသည်။
လက်ရှိတွင်စစ်ကောင်စီတပ်၏လေကြောင်းပစ်ခတ်မှုနှင့် ကင်းထောက်လှမ်းမှုများအပြင် လက်နက်ကြီးများဖြင့်ပစ်ခတ်နေမှုများကြောင့် သေ့ဘော့ဘိုးရွာဒေသခံများရွာလုံးကျွတ်နီးပါးဘေးလွတ်ရာကိုရှောင်တိမ်းနေရသည်ဟုဆိုသည်။
” ရဟတ်ယာဥ်နဲ့ ပစ်တာနဲ့ ရွာတွေကို ကင်းပတ်ကြည့်တာရော၊ နောက် ၁၂၀ မမ တွေနဲ့ပစ်တာရောဆိုတေ့ာ အခု သေ့ဘော့ဘိုးကရွာခံတွေကတော့ ကြောက်လန့်ပြီးရွာကနေပြေးကုန်ကြပြီ၊ ရွာလုံးကျွတ်နီးပါးဘဲပြေးကြတယ်။ ပြောင်းချိုးနေတဲ့ကြားကနေအကုန်ထားခဲ့ပြီးပြေးကြတာ။ သေ့ဘော့ဘိုးက အရင်ထဲကစခန်းသိမ်းခံထားရတော့ စစ်ကောင်စီဘက်ကအဲ့ဒီရွာကို ပစ်မှတ်ထားလာမှာကြောင့်လို့ထင်တယ်” ဟု ၄င်းကဆက်လက်ပြောသည်။
ဝေါလေဒေသအတွင်း စစ်ကောင်စီ၏ တပ်မ (၄၄) လက် အောက်ခံ တပ်များနှင့် KNLA တပ်ရင်း (၂၇) ကော်ဘရာပူးပေါင်းစစ်ကြောင်း၊ တပ်မဟာ လုံခြုံ ရေးစစ်ကြောင်း တပ်ခွဲ (၂) ၊ Federal Wings ဒရုန်းအဖွဲ့၊ ရောင်နီတပ်ခွဲ ဒရုန်းအဖွဲ့စသည့်ပူးပေါင်းအဖွဲ့များအကြား တိုက်ပွဲများနေ့စဥ်နီးပါးဖြစ်ပွားလျက်ရှိကြောင်းသိရသည်။
ပူးပေါင်းတပ်ဖွဲ့များနှင့် ဒရုန်းတပ်ဖွဲ့များ၏ ဗုံးကြဲတိုက် ခိုက်မှုများကြောင့် စစ်ကောင်စီတပ်ဘက်မှ ထိခိုက်သေ ဆုံးမှုများ ရှိသော်လည်း အရေအတွက် အတိအကျအား စစ်မြေပြင်အခြေအနေများအရ အတည်မပြုနိုင်သေးဘဲ တော်လှန်ရေးတပ်ဖွဲ့များဘက်မှ ထိခိုက်မှုတစ်စုံတစ်ရာ မရှိကြောင်း ကော်ဘရာစစ်ကြောင်းက သတင်းထုတ်ပြန်ထားသည်။
ဓာတ်ပုံ – Cobra Column
#ဝေါလေ #ကော်ဘရာစစ်ကြောင်း #ပူးပေါင်းတပ်ဖွဲ့ #စစ်ကောင်စီတပ် #လေကြောင်းတိုက်ခိုက်မှု #ဒေသခံများ #ထွက်ပြေးတိမ်းရှောင်နေရ #Ayeyarwaddy_Times
