ဧရာဝတီတိုင်းမ်
နိုဝင်ဘာလ ၇ ရက်
ဧရာ၀တီတိုင်း၊ ပုသိမ်မြို့မှာ စစ်ကောင်စီနဲ့ ဌာနဆိုင်ရာတွေပူးပေါင်းကျင်းပတဲ့
စတုဒီသာနဲ့ မီးမျှောပွဲ ကျင်းပရာနေရာ အနီးမှာ ယနေ့ နို၀င်ဘာလ ၇ ရက်နေ့ ညနေ ၆ နာရီ ၂၀မိနစ် အချိန်က အင်အားပြင်းတဲ့ ဗုံးတစ်လုံးပေါက်ကွဲခဲ့တယ်လို့ ဒေသခံတွေက ပြောပါတယ်။
“စစ်ကောင်စီ လက်အောက်ခံတွေက အမှတ် (၁) ဘောတံတားကနေ မီးခွက်တွေမျောပြီးပြန်လာတဲ့အချိန် ရေပေါ်ဈေးထောင့်မှာ ပေါက်တာ။ နည်းနည်းနောနောအသံမဟုတ်ဘူး။ ပြေးကြတာအုန်းတိုက်နေတာပဲ။ တစ်ချို့ဖိနပ်တွေတောင်ကျန်ခဲ့တယ်”လို့ မျက်မြင်တွေ့ရှိသူတစ်ဦးက ဧရာဝတီတိုင်းမ်ကို ပြောပါတယ်။
အဆိုပါ မီးမျှောပွဲကို စစ်ကောင်စီခန့် ဧရာဝတီတိုင်းဝန်ကြီးချုပ် ဦးတင်မောင်ဝင်းတက်ရောက်ခဲ့ပြီး ဗုံးပေါက်ကွဲမှုကြောင့် ပွဲကျင်းပနေတဲ့စစ်ကောင်စီ လက်အောက်ခံတွေ ရုတ်ရုတ်သဲသဲဖြစ်သွားတယ်လို့ မျက်မြင်တွေ့ရှိသူအချို့က ဆိုပါတယ်။
ဗုံးပေါက်ကွဲမှုအတွင်း ထိခိုက်သူရှိ၊ မရှိကိုတော့ ဧရာဝတီတိုင်းမ်သတင်းဌာနအနေနဲ့ အတည်ပြုလို့မရသေးပါဘူး။
စစ်ကောင်စီတပ်ဖွဲ့တွေက ဗုံးပေါက်တဲ့နေရာကိုအင်အားပြည့်လာရောက်စစ်ဆေးပြီး မီးမျှောပွဲကို ဟန်မပျက်ပြန်လည်ကျင်းပနေတယ်လို့ဒေသခံတွေဆီကနေသိရပါတယ်။
#ပုသိမ် #မီးမျှော်ပွဲ #စစ်ကောင်စီ #ဗုံးပေါက်ကွဲ
#Ayeyarwaddy_Times
