ငါန်းဇွန်တွင် အရက်ဆိုင်နဲ့လောင်းကစားဒိုင်တွေကို လိုင်းကြေးလိုက်ကောက်နေတဲ့ စစ်ကောင်စီတပ်မိုင်းဆွဲခံရပြီး ၃ ဦးသေ ၃ ဦးဒဏ်ရာရ

ဧရာဝတီတိုင်းမ်
အောက်တိုဘာလ ၂၇ ရက်

မန္တလေးတိုင်း၊ မြင်းခြံခရိုင်၊ ငါန်းဇွန်မြို့တွင် အရက်ဆိုင်နှင့် လောင်းကစားဒိုင်တွေကို လိုင်းကြေးလိုက်ကောက်နေသည့် စစ်ကောင်စီ တပ်သားတွေကို ယနေ့ မွန်းလွဲပိုင်းအချိန်၌ မိုင်းဆွဲတိုက်ခိုက်ခဲ့ကြောင်း မြင်းခြံခရိုင်တပ်ရင်း(၇)Zero ပျောက်ကျားတပ်ဖွဲ့ထံမှ သိရှိရသည်။

ယနေ့ နေ့လည် ၁၂ နာရီဝန်းကျင်အချိန်ခန့်က ငါန်းဇွန်၊ မြေတိုင်းကျေးရွာတောင်ဘက်ရှိ အရက်ဆိုင်များ၊ နှစ်လုံး၊ သုံးလုံးလောင်းကစားဒိုင်များကို လိုင်းကြေး လာကောက်သည့် စစ်ကောင်စီတပ်ဖွဲ့ဝင် ၆ ဦးကို ပဒေသာမိုင်း ၅ လုံးဖြင့် ဖောက်ခွဲတိုက်ခိုက်ခဲ့ရာ ၃ ဦး သေဆုံးပြီး ၃ ဦးဒဏ်ရာရရှိကြောင်း သိရှိရသည်။

“စစ်ခွေးတွေကို လိုင်းကြေးကောက်ပြီးအပြန်မှာ ပဒေသာမိုင်း ၅ လုံးနဲ့ဧည့်ခံခဲ့တာပါ။ သူတို့ ၆ ယောက်က လမ်းလျှောက်လာကြတာ။ အလောင်းနဲ့ ဒဏ်ရာရသူတွေကို လူနာတင်ကားနဲ့ တင်ခေါ်သွားတယ်”ဟု Zero ပျောက်ကျားတပ်ဖွဲ့ခေါင်းဆောင် ကိုသက်ကြီးက ဧရာဝတီတိုင်းမ်ကို ပြောသည်။

ယမန့်နေ့ အောက်တိုဘာ ၂၆ ရက်နေ့ ညနေ ၅ နာရီအချိန်ခန့်က နွားထိုးကြီးမြို့၊ဆူးဖြူကုန်းကျေးရွာ စာသင်ကျောင်းတွင် တပ်စွဲထားသည့် စစ်ကောင်စီ တပ်ဖွဲ့ဝင်များကို မြင်းခြံခရိုင်၊ အမှတ် ၄ တပ်ရင်း NPDF မှ ဒရုန်းဖြင့် ဗုံးကြဲတိုက်ခိုက်ရာ စကစတပ်ဖွဲ့ဝင် ၅ ဦးသေဆုံးကြောင်း PDF တပ်ဖွဲ့ဝင်တစ်ဦး၏ ပြောပြချက်အရ သိရှိရသည်။