ဧရာဝတီတိုင်းမ်
အောက်တိုဘာ ၁၁ ရက်
ယူကရိန်းနိုင်ငံအနေနဲ့ ရုရှားနဲ့စစ်ပွဲကို အဆုံးသတ်ဖို့ သမ္မတသစ်တစ်ဦး အစားထိုးဖို့ အချိန်ကျပြီ လို့ အမေရိကန်သမ္မတ ဒေါ်နယ်ထရမ့်က စနေနေ့မှာ ပြောကြားလိုက်ပါတယ်။ ယူကရိန်းသမ္မတ ဇီလန်စကီး ဟာ ရုရှားနဲ့ သဘောတူညီချက် ရရှိအောင် မလုပ်ဆောင်နိုင်တဲ့အပြင် အမေရိကန်မှာ ဒီဇယ်ဆီဈေး မြင့်တက် နေရတာဟာ သူ့ကြောင့်ဖြစ်တယ်လို့ ဒေါ်နယ်ထရမ့်က စွပ်စွဲပါတယ်။
ဒေါ်နယ်ထရမ့်ဟာ အမေရိကန် သက်တမ်းဝက်ရွေးကောက်ပွဲ မတိုင်မီ လောင်စာဆီဈေး ကျဆင်း ရေးအတွက် ရုရှားမှ ဒီဇယ်ဆီ ဝယ်ယူဖို့ ရုရှားသမ္မတ ပူတင်နဲ့ သဘောတူညီချက် ရယူခဲ့ပါတယ်။ အမေရိကန်မှာ ဒီဇယ်ဆီဈေး စံချိန်တင် မြင့်တက်နေတာဟာ အီရန်စစ်ပွဲကြောင့် မဟုတ်ဘဲ ယူကရိန်းက ရုရှားစွမ်းအင် အဆောက်အအုံတွေကို တိုက်ခိုက်နေတာကြောင့်လို့ ဒေါ်နယ်ထရမ့်က အပြစ်ဖို့ခဲ့ပါတယ်။
ယူကရိန်းနဲ့ ဥရောပ အရာရှိတွေက ရုရှားမှ ဒီဇယ်ဝယ်ယူမယ့် ဒေါ်နယ်ထရမ့်ရဲ့ သဘောတူညီချက်ဟာ ရုရှားရဲ့ စစ်စရိတ်ကို ထောက်ပံ့ပေးရာရောက်တယ်လို့ တုံ့ပြန်ခဲ့ပါတယ်။ ယူကရိန်းနိုင်ငံ ဇာပိုရီရှား ဒေသကို ရုရှားက လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးငယ် ၃ ဦး အပါအဝင် လူ ၂၀ သေဆုံးခဲ့ပါတယ်။
အဆိုပါ တိုက်ခိုက်မှုအပေါ် ဇီလန်စကီးက ရုရှားဟာ ဒီဇယ်ဆီ ပို့ကုန် ပိတ်ဆို့မှုတွေ ဖယ်ရှားပေးတဲ့ အတွက် အခုလို လူနေအိမ်တွေကို ဗုံးကြဲပြီး ကျေးဇူးဆပ်လိုက်တာလို့ ဝေဖန်ခဲ့ပါတယ်။ ရုရှားအနေနဲ့ ပို့ကုန်တွေကနေ ဝင်ငွေ ပိုမိုရရှိလေလေ ဒရုန်းနဲ့ ဒုံးကျည် အဆင့်မြှင့်တင်တာတွေ၊ လက်နက်ဝယ်ယူ တာတွေကို ပိုမို ပြုလုပ်လာနိုင်လေလေလို့ ၎င်းက ထောက်ပြပါတယ်။
ဆူဒန်နဲ့ အီရန်စစ်ပွဲအပြင် ယူကရိန်းစစ်ပွဲကြောင့်ပါ စွမ်းအင်ဈေးနှုန်းတွေ မြင့်တက်နေချိန်မှာ ဒေါ်နယ် ထရမ့်ဟာ ရုရှားမှ ဒီဇယ်ဆီ တန်ချိန် သန်းပေါင်းများစွာ ဝယ်ယူဖို့ ပြင်ဆင်နေပါတယ်။ အမေရိကန် ပြည်သူအများစုက အီရန်အရေးနဲ့ ပတ်သက်ပြီး ဒေါ်နယ်ထရမ့်ရဲ့ ကိုင်တွယ်ဖြေရှင်းပုံကို ကျေနပ်ခြင်း မရှိကြဘဲ ကုန်ဈေးနှုန်း မြင့်တက်မှုအတွက်လည်း သူ့မှာ တာဝန်ရှိတယ်လို့ ယူဆနေတာပါ။
ဆွီဒင်၊ ဂျာမနီနဲ့ ပိုလန် အပါအဝင် ဥရောပ မဟာမိတ်နိုင်ငံတွေက ရုရှားအပေါ် စီးပွားရေး ပိတ်ဆို့မှု တွေကို ဆက်လက်လုပ်ဆောင်သွားမှာဖြစ်ပြီး ယူကရိန်းကို အပြည့်အဝ ထောက်ခံမယ်လို့ ပြောပါတယ်။
ဒေါ်နယ်ထရမ့်ရဲ့ အထူးကိုယ်စားလှယ်တွေဟာ ယူကရိန်း အရာရှိတွေနဲ့ မိုင်ယာမီမှာ တွေ့ဆုံပြီး စစ်ပွဲအဆုံးသတ်ရေး ဆွေး နွေးနေစဉ်မှာပဲ အခုလို ရုရှားနဲ့ ဒီဇယ်ဆီ သဘောတူညီချက် ထွက်ပေါ် လာခဲ့တာ ဖြစ်ပါတယ်။
ယူကရိန်း အရာရှိတွေဟာ ဒေါ်နယ်ထရမ့်ရဲ့ ဒီဇယ်ဆီ သဘောတူညီချက်အကြောင်း ကြိုတင်မသိရှိခဲ့ဘဲ မိုင်ယာမီ ဆွေးနွေးပွဲအပြီးမှာ ယူကရိန်းသို့ ပြန်လည်ထွက်ခွာသွားခဲ့ပါတယ်။
News: AP
Ref; Trump says Ukraine should get a new president as he blames Zelenskiy for US diesel prices
