ဧရာဝတီတိုင်းမ်
အောက်တိုဘာ ၁၀ ရက်
သာပေါင်းမြို့နယ်၊ ဘောမိချောင်း ဒေသဘက်တွင် တိုက်ပွဲများ ပြန်လည်ပြင်းထန်လာပြီး စစ်တပ်က အင်အားဖြည့်တင်းနေကာ လက်နက်ကြီးများဖြင့် ရမ်းသန်းပစ်ခတ်မှုများပြုလုပ်လျက်ရှိကြောင်း သိရသည်။
ပြီးခဲ့သည့် အောက်တိုဘာ ၃ရက်က ကြက်သွန်ကွင်း လမ်းဆုံမှနေ၍ သာပေါင်း အစပ် ရခိုင်ရိုးဘက်ရှိ စစ်တပ်စခန်းများကို စစ်တပ်က ခဲယမ်း၊ ဒရုန်းနှင့် စစ်ကူများကို စစ်သုံးဖောကား၊ အရပ်ဘက်သုံး ဆယ်ဘီးကားများဖြင့် ပို့ဆောင်စစ်ရေးပြင်ပြီးနောက် တိုက်ပွဲများ ပြန်လည်ပြင်းထန်လာခြင်း ဖြစ်သည်။
”ဒီရက်ပိုင်း တိုက်ပွဲပြင်းထန်လာတာမှန်ပါတယ်။ အကြီး အသေးသံတွေကြားနေရတာရှိပါတယ်” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ရွှေသောင်ယံမြို့၊ ဘောမိကျေးရွာဘက်တွင် ပြီးခဲ့သည့် အောက်တိုဘာ ၇ရက်နေ့က စစ်တပ်၏ လက်နက်ကြီး ပစ်ခတ်မှုကြောင့် ဇနီးမောင်နှံနှစ်ဦး သေဆုံးမှု ရှိခဲ့သည်ဟု ဒေသတွင်းသတင်းများမှ သိရသည်။
ဘောမိချောင်းဒေသကို စစ်တပ်က ပုသိမ်နှင့် ရေကြည်အမြောက်တပ်ဘက်မှနေ၍ စစ်ကူနှင့် ခဲယမ်းများကို ဆက်တိုက်ပို့နေပြီး စစ်ရေးပြင်ဆင်မှုများပြုလုပ်လျက်ရှိသည်။ သဲဖြူနှင့် ကင်ပွန်းချဉ်ကုန်းဘက်တွင်လည်း ပစ်ခတ်သံများ ကြားနေရသည်ဟု သိရသည်။
စစ်တပ်က သာပေါင်းရှိ သဲဖြူ၊ ကင်ပွန်းချဉ်ကုန်း၊ သာပေါင်းလေး၊ ဘုရားကြီးနှင့် ရေကြည်ရှိ ကမ္ဘားကြီး စစ်တပ်စခန်းများကို စစ်ကူ၊ ခဲယမ်း ဖြည့်တင်းပြီးနောက် ဒဏ်ရာရစစ်တပ် တပ်ဖွဲ့ဝင်များနှင့် အလောင်းများကို ပြန်လည် သယ်ယူလာကြောင်း သတင်းရင်းမြစ်များထံမှ သိရသည်။
ဓာတ်ပုံ-AA တပ်ဖွဲ့ဝင်များ
