ပိတ်ထားသည့် ရွှေကူ-ငါးအိုး လမ်းပိုင်းကို ဖြတ်သန်းသွားလာခြင်းမပြုရန် KIA ထပ်မံသတိပေး၊ လိုက်နာ ခြင်းမရှိပါက ဒလန်အဖြစ် သတ်မှတ်မည်

‎ဧရာဝတီတိုင်းမ်
‎အောက်တိုဘာ ၆ရက်
‎
ကချင်ပြည်နယ်၊ ရွှေကူနယ်မြေအတွင်းရှိ ပိတ်ထားသော ရွှေကူ-ငါးအိုး လမ်းမကြီးပေါ်တွင် ပြည်သူများ သွားလာလှုပ်ရှားခြင်း မပြုကြရန် ကချင်လွတ်လပ်ရေးတပ်မတော် (KIO/KIA) တပ်မဟာ (၁၁)၊ တပ်ရင်း -၁၂ က အောက်တိုဘာ ၅ ရက်စွဲဖြင့် ထပ်မံသတိပေး ထုတ်ပြန်ထားသည်။

တပ်မဟာ (၁၁)၊ တပ်ရင်း-၁၂ ရွှေကူခရိုင်နယ်မြေအတွင်း နေထိုင်ကြသော မိဘပြည်သူများအနေဖြင့် ရွှေကူ-ငါးအိုး လမ်းမကြီးကို KIO/KIA မှ ပိတ်ပင်ထားသဖြင့် လုံးဝသွားလာခြင်းမပြုရန်နှင့် သွားလာရန်ရှိပါက သတ်မှတ်ထားသည့် လမ်းကြောင်းအတိုင်းသာ သွားလာကြရန် အသိပေးထားသည်။

‎”စစ်တပ် စစ်ကြောင်း အခြေအနေတွေကြောင့် သတိပေးစာထုတ်ပြန်တယ်လို့ထင်ပါတယ်။ ပထမ အကြိမ်ထုတ်ပြန် တုန်းကလည်း ရက်ပိုင်းအတွင်း စစ်တပ်ကစစ်ကြောင်းထိုးလာတာပါ” ဟု‌ရွှေကူ သတင်းရင်းမြစ်က ဧရာဝတီတိုင်းမ်ကို ပြောသည်။
‎
‎ထို့အပြင် ပိတ်ပင်ထားသော လမ်းပိုင်းများကို သွားလာပါက ရွေးတုအစိုးရစစ်တပ်၏ သတင်းပေး၊ သတင်းယူ သို့မဟုတ် သူလျှို (ဒလန်) အဖြစ် သတ်မှတ်မည်ဖြစ်ပြီး နောက်ဆက်တွဲဖြစ်ပေါ်လာမည့် ပြဿနာများကို KIO/KIA အနေဖြင့် လုံးဝ (လုံးဝ) တာဝန်ယူဖြေရှင်းပေးမည် မဟုတ်ကြောင်း ပြတ်ပြတ် သားသား သတိပေးထားသည်။
‎
KIO/KIA တပ်မဟာ (၁၁)၊ တပ်ရင်း-၁၂ သည် ‎တိုက်ပွဲများ မဖြစ်ပွားမီ ပြီးခဲ့သည့် ဇွန်လ ၈ ရက်နေ့ကလည်း ရွှေကူမြို့အဝင် လမ်းမကြီးနှင့် ငါးအိုး-ရွှေကူ လမ်းမကြီးတို့အား အချိန်အခါမဟုတ် သွားလာခွင့် ပိတ်ပင်ခဲ့သည့်အပြင် ရွှေကူမြို့အတွင်းရှိ မိဘပြည်သူများအားလုံး မြို့အတွင်းမှ ထွက်ခွာတိမ်းရှောင် ကြရန် သတိပေးထုတ်ပြန်ခဲ့ဖူးသည်။
‎
‎အဆိုပါ ဇွန်လ ထုတ်ပြန်ချက်တွင်လည်း တော်လှန်ရေးလမ်းကြောင်း၊ စီးပွားရေးလမ်းကြောင်း စသည့် ဘေးကင်းရာ လမ်းပိုင်းများကိုသာ အသုံးပြုကြရန်၊ ပိတ်ပင်ထားသော လမ်းပိုင်းများသို့ သွားလာပါက သို့မဟုတ် မြို့အတွင်းမှ ထွက်ခွာတိမ်းရှောင်ခြင်းမရှိဘဲ နေထိုင်ပါက ဖြစ်ပေါ်လာမည့် နောက်ဆက်တွဲ ပြဿနာများကို တာဝန်ယူမည် မဟုတ်ကြောင်း အသိပေးခဲ့သည်။
‎
‎KIA က ထိုသို့ထုတ်ပြန်ပြီးနောက် ငါးအိုးဘက်မှ ရွေးတုအစိုးရစစ်တပ် စစ်ကြောင်းထိုးလာသည့်အတွက် တော်လှန်၊ ငါးဘတ်ကြီး စသည့်နေရာများတွင်တိုက်ပွဲများပြင်းထန်စွာဖြစ်ပွားခဲ့သည်။

‎မြေပုံ- NZY