ဧရာဝတီတိုင်းမ်
အောက်တိုဘာ ၆ ရက်
ရခိုင်ပြည်နယ်အတွင်း စစ်တပ်၏ အလုံးအရင်းဖြင့် ပြန်လည်ထိုးစစ်ဆင်လာမှုကြောင့် တိုက်ပွဲများသည် ဘက်စုံစစ်ပွဲ (Total War) အသွင်ဆောင်လာပြီး ရှေ့တွင် စစ်ရေးဆိုင်ရာ ရက်စက်ကြမ်းကြုတ်မှုများ ပိုမိုဖြစ်ပွားလာနိုင်ကြောင်း မဟာဗျူဟာနှင့် မူဝါဒလေ့လာရေးအဖွဲ့ (ISP-Myanmar) ၏ ကနဦးသုံးသပ်ချက်တွင် ဖော်ပြထားသည်။
ပြီးခဲ့သည့် စက်တင်ဘာလဆန်းမှစ၍ ခြေလျင်စစ်သည် ၂,၀၀၀ ဝန်းကျင်နှင့် စစ်သင်္ဘော ၁၀ စင်းထက်မနည်း အသုံးပြုကာ အာရက္ခတပ်တော် (ULA/AA) ထိန်းချုပ်နယ်မြေများကို ကြည်း၊ ရေ၊ လေ ပူးတွဲစစ်ကြောင်း ခုနှစ်ကြောင်းဖြင့် ထိုးစစ်ဆင်နေခြင်းဖြစ်သည်။
အဆိုပါ စစ်ဆင်ရေးကို စစ်တပ်ထောက်ခံသူများက ‘၄၉၂၆ စစ်ဆင်ရေး’ သို့မဟုတ် ‘ရန်နိုင်အောင် စစ်ဆင်ရေး’ ဟု ခေါ်ဆိုကြပြီး ရခိုင်ပြည်နယ်ရှိ ကျောက်ဖြူ၊ စစ်တွေ၊ ပုဏ္ဏားကျွန်းတို့အပြင် မကွေး၊ ပဲခူးနှင့် ဧရာဝတီတိုင်းတို့၏ နယ်စပ်မြို့နယ်များ၌ တိုက်ပွဲများ နေ့စဉ် ပြင်းထန်လျက်ရှိသည်။
စစ်တပ်အတွက် ရခိုင်စစ်မျက်နှာစာသည် မဟာဗျူဟာအရရော ဂုဏ်သိက္ခာအရပါ အရေးကြီးနေသဖြင့် နယ်မြေများ ပြန်လည်ရယူရန် ထောင်နှင့်ချီသော စစ်အင်အားဖြင့် ဖိအားပေးတိုက်ခိုက်နေသည်ဟု ထည့်သွင်း ဖော်ပြသည်။
ထိုသို့ တိုက်ခိုက်ရာတွင် စစ်ရေးပစ်မှတ်နှင့် အရပ်သားပစ်မှတ်ကို ခွဲခြားသတ်မှတ်ခြင်းမရှိဘဲ လေကြောင်းနှင့် လက်နက်ကြီးများဖြင့် ပြင်းထန်စွာ ပစ်ခတ်နေသဖြင့် စစ်ပွဲသဘောတရားသည် အခြားဒေသများနှင့် မတူဘဲ ပိုမိုရက်စက်ကြမ်းကြုတ်သည့် အသွင်ဆောင်လာနိုင်ကြောင်း ထောက်ပြထားသည်။ စက်တင်ဘာ ၄ ရက်မှစ၍ အရပ်သား ၇၀ ဦးထက်မနည်း သေဆုံးခဲ့ပြီး စစ်ဘေးရှောင် အနည်းဆုံး ၆,၀၀၀ ကျော် ထပ်မံထွက်ပြေးနေရသည်။
တပ်မများဖြစ်သည့် တပ်မ-၆၆၊ တပ်မ-၁၀၁၊ စကခ-၁၇၊ စကခ-၂၀ တို့အပြင် ကပစ စက်ရုံအင်အားများကိုပါ စုစည်း၍ စစ်တွေရှိ အနောက်ပိုင်းတိုင်းစစ်ဌာနချုပ် (နပခ) မှ ကွပ်ကဲနေသော်လည်း လက်ရှိအချိန်ထိ ULA/AA ဘက်က နယ်မြေဆုံးရှုံးမှု မရှိသေးဘဲ အချို့နေရာများတွင် လျှပ်တပြက် တန်ပြန်ထိုးစစ်များ ဖော်ဆောင်လျက်ရှိသည်။
သို့သော်လည်း ယခုထိုးစစ်ကြောင့် ပဲခူး၊ မကွေးနှင့် ဧရာဝတီတိုင်းတို့ရှိ စစ်တပ်၏ ကာကွယ်ရေးပစ္စည်းစက်ရုံများ (ကပစ) ဘက်သို့ ဦးတည်နေသည့် ULA/AA ၏ ထိုးစစ်မှာ ခံစစ်သဖွယ် ပုံပြောင်းသွားခဲ့ရသည်။ ထို့ပြင် စစ်ဘေးရှောင် ဦးရေ ပိုမိုများပြားလာခြင်းကြောင့် ULA/AA ထိန်းချုပ်နယ်မြေအတွင်း လူမှုစီးပွား ရိုက်ခတ်မှုများ ပိုမိုကြုံတွေ့ရနိုင်သည့်အပြင် ဆိုရှယ်မီဒီယာပေါ်ရှိ ဝါဒဖြန့်မှုများမှတစ်ဆင့် လူမျိုးရေး ပဋိပက္ခအသွင် ကူးစက်မသွားစေရန် သတိပြုရမည်ဖြစ်ကြောင်း ISP-Myanmar ၏ သုံးသပ်ချက်တွင် ဖော်ပြထားသည်။
