စစ်တွေနှင့် ပုဏ္ဏားကျွန်းတို့တွင် တိုက်ပွဲများ ပြင်းထန်ပြီး စစ်တပ်ဘက်က အထိနာ၊ လေကြောင်းပစ်ကူယူ တိုက်ခိုက်

‎ဧရာဝတီတိုင်းမ်
‎​စက်တင်ဘာ ၂၄ ရက်

‎‎​ရခိုင်ပြည်နယ်၊ စစ်တွေမြို့နယ်နှင့် ပုဏ္ဏားကျွန်းမြို့နယ်တို့အပါအဝင် ဒေသအချို့တွင် တိုက်ပွဲများ ပြင်းထန်စွာ ဖြစ်ပွားလျက်ရှိပြီး စစ်တပ်၏ လေကြောင်းမှ ဗုံးကြဲတိုက်ခိုက်မှုများကြောင့် အရပ်သားပြည်သူအချို့ သေဆုံးမှုများ ရှိနေကြောင်း ဒေသခံများထံမှ သိရသည်။

‎​စစ်တွေမြို့နယ်၊ ရွှေမင်းဂံ ရေတပ်စခန်းအနီးရှိ ရဲရိုးပြင်၊ တောကန်နှင့် အမြင့်ကျွန်း ကျေးရွာဝန်းကျင်တို့တွင်စက်တင်ဘာ ၂၂ ရက်နေ့က တစ်နေ့လုံးနီးပါး တိုက်ပွဲများ ပြင်းထန်ခဲ့သည်။

‎”စစ်တပ် စစ်ကြောင်းတွေဖြတ်တောက် တိုက်ခိုက်ခံနေရတော့ အရှေ့တိုးမလာနိုင်ဘဲ တန့်တဲ့ စစ်ကြောင်းတွေရှိသလို အဓိက ဒရုန်းနဲ့ ပစ်ကူယူနေရတဲ့ အခြေအနေတွေလည်း ရှိနေပါတယ်။ စစ်တပ်ဘက်က သေဆုံးတာလည်းများတယ်” ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။

‎ထိုတိုက်ပွဲအတွင်း စစ်တပ်ဘက်မှ ရုပ်အလောင်း ၁၀ လောင်းနီးပါးကို AAက သိမ်းဆည်းရမိခဲ့ပြီး သိမ်းဆည်းနိုင်ခြင်းမရှိဘဲ ကျန်ရစ်ခဲ့သည့် စစ်တပ်ဘက်မှ သေဆုံးသူများလည်း အများအပြား ရှိခဲ့ကြောင်း သိရသည်။ ထို့အပြင် ရဲရိုးပြင်ကျေးရွာ အနီးအပါးတွင်လည်း ဒရုန်းများဖြင့် အပြန်အလှန် တိုက်ခိုက်မှုများ ရှိခဲ့သည်။

‎ယနေ့ စက်တင်ဘာ ၂၃ ရက်နေ့ အစောပိုင်း နံနက် ၁ နာရီခန့်တွင် စစ်တပ်က ပုဏ္ဏားကျွန်းမြို့နယ်၊ ဖက်ကျကျေးရွာသို့ ဂျက်ဖိုက်တာ (၂) စီးနှင့် Y-12 လေယာဉ်များ အသုံးပြုကာ ဗုံးအလုံးရေ ၂၀ နီးပါး ကြဲချ တိုက်ခိုက်ခဲ့သည်။

‎​ထိုသို့ လေကြောင်းမှ ဗုံးကြဲတိုက်ခိုက်မှုကြောင့် ဖက်ကျကျေးရွာတွင် စစ်ဘေးရှောင်နေသည့် အသက် (၅၇) နှစ်အရွယ် ဦးမောင်မြကြည်နှင့် အသက် (၇၆) နှစ်အရွယ် ဒေသခံ ဦးအောင်သန်းမောင်တို့ နှစ်ဦးမှာ ဗုံးစထိမှန်ပြီး ပြင်းထန်ဒဏ်ရာများဖြင့် သေဆုံးသွားခဲ့ကြောင်း သိရသည်။