ဧရာဝတီတိုင်းမ်
စက်တင်ဘာ ၂၄ ရက်
ကချင်ပြည်နယ်အတွင်း စစ်ရေးလှုပ်ရှားမှုများ၊ စစ်ကူပို့ ရိက္ခာထောက်ပို့မှုများ အဘက်ဘက်မှ ရှုံးနိမ့်ခဲ့သည့် ရွေးတုအစိုးရစစ်တပ်က KIO ဌာနချုပ်ရှိရာ လိုင်ဇာမြို့ကို လေယာဉ်ကင်းထောက်ပျံသန်းမှု နှစ်ရက်ဆက်တိုက်ပြုလုပ်ခဲ့ကြောင်း သိရသည်။
ယနေ့ စက်တင်ဘာ ၂၄ရက် နေ့လယ် ၁၂နာရီကျော်ခန့်တွင် လိုင်ဇာနှင့် တရုတ်နယ်စပ်အနီး ကင်းထောက်ပျံသန်းနေသည့် စစ်တပ်၏ လေယာဉ်ကို တရုတ်နိုင်ငံဘက်မှ ပစ်ခတ်ခြောက်လှန့်မှု ပြုလုပ်ခဲ့သည် ဟု ဒေသခံသတင်းရင်းမြစ်များထံမှ သိရသည်။
”နေ့လယ်ဘက် ပစ်ခတ်သံကြားတော့ စစ်တပ်လေယာဉ်က ကြဲပြီထင်တာ။ တရုတ်ဘက်က ပျံနေတဲ့လေယာဉ်ကို မောင်းထုတ်ဖို့ ခြောက်ပြီး ပစ်တာပြောတယ်။ တရုတ်က သူ့နယ်စပ်ဘက်ကျမှာစိုးလို့ မောင်းထုတ်တာ။ အချင်းချင်းလည်း လေကြောင်း သတိပေးနေကြရတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
စစ်တပ်က ယမန်နေ့ စက်တင်ဘာ ၂၃ရက် နေ့လယ်ပိုင်းတွင်လည်း Y12၊ Y8 လေယာဉ်များသုံး၍ လိုင်ဇာမြို့ပေါ် ကင်းထောက်ပျံသန်းမှု ပြုလုပ်ခဲ့ပြီး ယနေ့ထပ်မံ၍ လေကြောင်းမှ ခြောက်လှန့် ပျံသန်းခဲ့ခြင်းဖြစ်သည်။
လေကြောင်းအန္တရာယ်ကြောင့် လိုင်ဇာတွင် အခြေခံပညာကျောင်းများ ခေတ္တပိတ်ပေးထားပြီး ပြည်သူများ လေကြောင်းအန္တရာယ် သတိပြုရန် နှိုးဆော်ထားသည်။ ယနေ့ နေ့လယ်က တရုတ်ဘက်မှ စစ်တပ်လေယာဉ်အား ခြောက်လှန့် မောင်းထုတ်ပစ်ခတ်မှုပြီးနောက် လေယာဉ်ပျံသန်းမှု မရှိသေးကြောင်း သိရသည်။
ဗန်းမော်ကို စစ်ကူပို့သည့် စစ်ရေယာဉ်အုပ်စု စောင့်ကြိုတိုက်ခိုက်ခံရပြီး ဆုံးရှုံးမှုများနှင့်ရင်ဆိုင်ခဲ့ရသည့်အပြင် စစ်ရေယာဉ်အုပ်စုကို စောင့်ရှောက်ရန်လွှတ်လိုက်သည့် တပ်များလည်း တပ်ပျက်ထွက်ပြေးရသည့်အတွက် စစ်တပ်က အရပ်သားများကို ပစ်မှတ်ထား လေကြောင်းတိုက်ခိုက်မှုပြုလုပ်နိုင်ကြောင်း KIA က ပြည်သူများကို သတိပေးနှိုးဆော်ထားသည်။
