ဧရာဝတီတိုင်းမ်
စက်တင်ဘာ ၂၀ ရက်
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၏ ပါတီညီလာခံကို ယနေ့ စက်တင်ဘာ ၁၉ ရက်နေ့တွင် စတင်ကျင်းပပြီး အဆိုပါညီလာခံသို့ ကြံ့ခိုင်ရေးပါတီမှ ဝန်ကြီး၊ ဒုဝန်ကြီးဖြစ်သွားသူများ တက်ရောက်ခြင်းမရှိသည့်အတွက် ထင်မြင်ချက်မျိုးစုံပေါ်ထွက်နေကြောင်း သိရသည်။
ယနေ့ကျင်းပသည့် USDP ပါတီညီလာခံတွင် ပါတီခေါင်းဆောင်ပိုင်း ရွေးချယ်တင်မြှောက်ရေး ကြီးကြပ်မှု ဗဟိုကော်မတီနှင့် ကော်မရှင်ကို ဖွဲ့စည်းလိုက်ကြောင်း သိရသည်။
အဆိုပါ ရွေးချယ်တင်မြှောက်ရေး ကော်မရှင်ကို ပါတီဒုတိယဥက္ကဋ္ဌ ဦးလှထွန်းက ဦးဆောင်မည်ဖြစ်ပြီး အဖွဲ့ဝင်များအဖြစ် ဦးသန်းရွှေအစိုးရနှင့် ဦးသိန်းစိန်အစိုးရလက်ထက် ဝန်ကြီးများ၊ စစ်ဗိုလ်ချုပ်ဟောင်းများ ပါဝင်လာကြသည်ကို တွေ့ရသည်။
၎င်းတို့အနက် ဘဏ္ဍာရေးဝန်ကြီးနှင့် သမ္မတရုံးဝန်ကြီးဟောင်း ဦးလှထွန်း၊ သမ္မတရုံးဝန် ကြီးဟောင်းများဖြစ်ကြသည့် ဦးစိုးသိန်း၊ ဦးတင်နိုင်သိန်း၊ ဧရာဝတီတိုင်း ဝန်ကြီးချုပ်ဟောင်း ဦးသိန်းအောင်(စစ်ရေးချုပ် ဒုတိယဗိုလ်ချုပ်ကြီး ဇော်ဟိန်း ၏အဖေ)၊ မန္တလေးတိုင်း ဝန်ကြီးချုပ်ဟောင်း ဦးရဲမြင့်၊ ပြန်ကြားရေးဝန်ကြီးဟောင်း ဦးကျော်ဆန်းတို့ ပါဝင်နေကြပြီး ၎င်းတို့သည် ဗိုလ်ချုပ်မှူးကြီး မင်းအောင်လှိုင်ထက် စီနီယာကျသူများ ဖြစ်ကြသည်။
စက်တင်ဘာ ၂၀ ရက်နေ့တွင် လက်ရှိ ပါတီခေါင်း ဆောင်ပိုင်းများက တာဝန်များ ပြန်လည်အပ်နှံရမည်ဖြစ်ပြီး ရွေးချယ်တင်မြှောက်ရေး ကော်မရှင်က ဗဟိုအလုပ်အမှုဆောင် လူစာရင်းအသစ်ကို စိစစ်ကာ ဥက္ကဋ္ဌ၊ ဒုဥက္ကဋ္ဌနှင့် အထွေထွေအတွင်းရေးမှူးတို့ကို ရွေးချယ်တင်မြှောက်သွားမည် ဖြစ်သည်။
ညီလာခံသို့ အစိုးရအဖွဲ့အတွင်း ရောက်ရှိနေသည့် ပါတီဗဟိုကော်မတီဝင် ဝန်ကြီးများကို ပါတီဘက်က ဖိတ်ကြားထားပြီး ထိုင်ခုံနေရာများပင် ပြင်ဆင်ထားသော်လည်း မတက်ရောက်သင့်ဟု သမ္မတရုံးက ယမန် နေ့ကတည်းက ဆုံးဖြတ်ကာ တားမြစ်ခဲ့ခြင်းဖြစ်ကြောင်း သိရသည်။
“ပါတီကော်မတီဝင် အစိုးရအဖွဲ့ဝင်တွေ ပါတီညီလာခံမတက်တာနဲ့ပတ်သက်ပြီး အမြင်အမျိုးမျိုးရှိကြ ပြောကြတာတော့ ရှိပါတယ်။ ဝန်ကြီးတာဝန်တွေယူထားလို့ ပါတီညီလာခံကိုမသွာဂရတာမျိုးလည်းရှိပါတယ်။ မင်းအောင်လှိုင်ဘာလုပ်မလဲ သူ့ထက်စီနီယာကျတဲ့လူတွေက ဘာတွေလုပ်ကြမလဲဆိုတာကို စောင့်ကြည့်ရပါမယ်” ဟု ကြံ့ခိုင်ရေးပါတီညီလာခံကို စောင့်ကြည့်နေသူတစ်ဦးက ပြောသည်။
ရွေးတုအစိုးရတွင်ပါဝင်နေသည့် ဒုတိယသမ္မတ ဒေါ်နန်းနီနီအေး၊ ဝန်ကြီးများဖြစ်ကြသည့် ဦးမျိုးဇော်သိမ်း၊ ဒေါက်တာမောင်သင်း၊ ဦးခင်မောင်စိုး၊ ဦးရဲမြင့်ထွန်းနှင့် ဦးမောင်မြင့်တို့ သည် ပါတီတာဝန်ယူထားသူများဖြစ်ကြသည်။
ဖွဲ့စည်းပုံအခြေခံဥပဒေ ပုဒ်မ ၆၄ နှင့် ၂၃၂ (ဋ) အရ သမ္မတနှင့် ပြည်ထောင်စုဝန်ကြီးများသည် ရာထူးသက်တမ်းအတွင်း ပါတီလုပ်ငန်းများတွင် ပါဝင်ဆောင်ရွက်ခြင်းမပြုရန် ပြဋ္ဌာန်းထားပြီးဖြစ်သော် လည်း ညီလာခံကျင်းပခါနီးမှ သမ္မတရုံးက ညွှန်ကြား ချက်ထုတ်ပြန် တားမြစ်ခဲ့ခြင်းကြောင့် တခြားသောအကြောင်းရင်းများ ရှိနိုင်ကြောင်း ထောက်ပြမှုများလည်း ထွက်ပေါ်နေသည်။
