ဧရာဝတီတိုင်းမ်
စက်တင်ဘာ ၁၇ ရက်
ရွေးတုအစိုးရစစ်တပ်သည် တိုက်ပွဲများအတွင်း ထိခိုက်သေဆုံးမှု များပြားခြင်းနှင့် အင်အားလိုအပ်ချက် မြင့်မားလာခြင်းတို့ကြောင့် ပိတ်ထားခဲ့သည့် စစ်သင်တန်းကျောင်းအချို့ကို ပြန်လည်ဖွင့်လှစ်ကာ သင်တန်းသားများ ထပ်မံလက်ခံ လေ့ကျင့်ပေးလျက်ရှိကြောင်း သိရသည်။
စစ်မှုထမ်း အမှတ်စဉ် (၂၇) မှစ၍ ကလေးမြို့အခြေစိုက် တတက (၁၀) နှင့် သပိတ်ကျင်းမြို့နယ်အခြေစိုက် တတက (၁၃) တန်းမြင့်သင်တန်းကျောင်းများကို ပြန်လည်ဖွင့်လှစ်ခဲ့ကြောင်း MDSIထံမှ သိရသည်။
”အရင်က အပတ်စဉ်တစ်ခုစကာနီးမှာ လူဖမ်းပွဲလုပ်တာ။ အခုက ဘယ်လိုနည်းနဲ့ရရ လူဆွဲနေတယ်။ မြို့လယ်ခေါင်ကြီးလည်း ကားရပ် ဆွဲကုတ်တင်သွားလည်း ခံရတာပဲ။ စစ်အရာရှိတွေကအစ အခုပေါ်တာဆွဲ လူမှောင်ခို ဂိုဏ်းထဲ ပါနေတာ” ဟု ရန်ကုန်မြို့ခံတစ်ဦးက ဧရာဝတီတိုင်းမ်ကို ပြောသည်။
စစ်တပ်သည် နိုင်ငံတစ်ဝန်းတွင် စစ်မှုထမ်းသင်တန်းကျောင်း စုစုပေါင်း (၂၇) ခုအထိ ဖွင့်လှစ်ထားရှိပြီး လက်ရှိတွင် ကျောင်း (၂၄) ခု၌ ပေါ်တာဆွဲ ဖမ်းဆီးလာသည့် သင်တန်းသားများကို ပုံမှန်လက်ခံလေ့ကျင့်ပေးနေပြီး အပတ်စဉ် (၂၈) ကို စက်တင်ဘာ ၇ရက်က ဖွင့်လှစ်လိုက်ကြောင်းလည်း သိရသည်။
ထို့အပြင် စစ်မှုထမ်းသင်တန်းကျောင်းများအတွင်းမှ ထွက်ပြေးရန် ကြိုးပမ်းသူများကို ဖမ်းဆီးအရေးယူခြင်း၊ ပြန်လည်ဖမ်းမိပါက ပြင်းထန်စွာ နှိပ်စက်ညှင်းပန်းခြင်းများကြောင့် သေဆုံးမှုများနှင့် ထိခိုက်ဒဏ်ရာရရှိမှုများ ဖြစ်ပေါ်လျက်ရှိသည်။ စစ်မှုထမ်းအင်အား ပြည့်မီရေးအတွက် အဆင့်ဆင့်သော အာဏာပိုင်များ၏ ဖိအားပေးမှုများနှင့် အကျိုးအမြတ်ရှာဖွေမှုများကြောင့် လူဖမ်း၊ ပြန်ပေးဆွဲ ငွေညှစ်ဂိုဏ်းများပါ ပေါ်ပေါက်လာနေသည်။
အခြားတစ်ဖက်တွင်လည်း စစ်တပ်သည် လမ်းသွားလမ်းလာများနှင့် မြို့နယ်အသီးသီးရှိ ပြည်သူများကို အကြောင်းအမျိုးမျိုးပြ၍ မတရားဖမ်းဆီးမှုများ ဆက်လက်ပြုလုပ်လျက်ရှိသည်။
စက်တင်ဘာလ ၇ ရက်မှ ၁၃ ရက်နေ့အတွင်း ရန်ကုန်တိုင်းရှိ ကြည့်မြင်တိုင်၊ စမ်းချောင်း၊ ဒေါပုံ၊ ဗိုလ်တထောင်၊ မင်္ဂလာတောင်ညွန့်၊ မရမ်းကုန်း၊ မြောက်ဒဂုံ၊ မြောက်ဥက္ကလာ၊ လှိုင်နှင့် အင်းစိန်မြို့နယ် စသည့် မြို့နယ် ၁၀ ခုမှ ပြည်သူ ၃၈ ဦးထက်မနည်း ဖမ်းဆီးခံခဲ့ရသည်။
၎င်းတို့အနက် ၃၄ ဦးမှာ လမ်းပေါ်တွင် သွားလာနေစဉ် သို့မဟုတ် လမ်းဘေးတွင် ရှိနေစဉ် ရမ်းသမ်းဖမ်းဆီးခံခဲ့ရခြင်းဖြစ်ပြီး၊ ၂ ဦးမှာ လမ်းပေါ်တွင် စိစစ်စစ်ဆေးခံရအပြီး ဖမ်းဆီးခံရခြင်း၊ ၁ ဦးမှာ လိမ်လည်ခေါ်ဆောင်ခံရခြင်းနှင့် ကျန် ၁ ဦးမှာ နေအိမ်အထိ ဝင်ရောက်ရှာဖွေဖမ်းဆီးခံရခြင်းတို့ဖြစ်သည်။
ထို့ပြင် စက်တင်ဘာ ၄ ရက်မှ ၆ ရက်နေ့အတွင်း ကမာရွတ်၊ စမ်းချောင်း၊ တာမွေ၊ ဒေါပုံ၊ မရမ်းကုန်း၊ မြောက်ဥက္ကလာ၊ လှိုင်သာယာနှင့် သန်လျင်မြို့နယ် စသည့် မြို့နယ် ၈ ခုမှ ပြည်သူ ၁၉ ဦးထက်မနည်း ဖမ်းဆီးခံရသည့် သတင်းများ ရှိခဲ့သည်။
စစ်မှုထမ်းဥပဒေကို ဆက်လက်ဖော်ဆောင်သွားမည်ဟု စစ်ခေါင်းဆောင်ဟောင်း သမ္မတ ဦးမင်းအောင်လှိုင်က ထုတ်ဖော်ပြောဆိုထားပြီး စစ်တပ်က လူငယ်များကို အတင်းအဓမ္မဖမ်းဆီးမှုများ ပြောင်ပြောင်တင်းတင်း ပြုလုပ်လျက်ရှိသည်။
ဓာတ်ပုံ- MDSI
