ဧရာဝတီတိုင်းမ်
စက်တင်ဘာ ၁၂ ရက်
ကချင်လွတ်လပ်ရေးတပ်မတော် (KIA) နှင့် ပူးပေါင်းတပ်ဖွဲ့များ၏ ပြင်းထန်သော တိုက်ခိုက်မှုများကြောင့် ရွှေကူမြို့နယ်၊ ဇင်းဘုံကျေးရွာဘက်သို့ စစ်ကြောင်းထိုးဝင်ရောက်လာသည့် စစ်တပ် တပ်ရင်း သုံး ရင်းမှာ အထိနာကာ ရွှေကူဘက်သို့ ပြန်လည်ဆုတ်ခွာသွားခဲ့ရကြောင်း KIA စစ်ရေးသတင်းရင်းမြစ်များထံမှ သိရသည်။
ပြီးခဲ့သည့် စက်တင်ဘာလ ၈ ရက်နေ့ ညပိုင်းက ရွှေကူမြို့နယ်၊ ဇင်းဘုံကျေးရွာအနီးသို့ စစ်ကြောင်းထိုးလာသည့် တပ်မ ၃၃ လက်အောက်ခံ ခလရ ၁၂ နှင့် ခမရ ၁၁၉ တပ်ရင်းများကို KIA ပူးပေါင်းတပ်များက ကြားဖြတ်တိုက်ခိုက်ခဲ့သည်။
”မြေပြင်တိုက်ပွဲလည်း အထိနာနေတယ်။ စစ်တပ်က စင်းခန်းဘက်တိုးနေပေမယ့် ဆက်တိုက် အထိနာနေတာ။ ဗန်းမော်မှာ အင်အား ၅၀၀ အထက်စုနေပြီဆိုပေမယ့် ဒီဘက်က စစ်ကြောင်းတွေနဲ့ မချိတ်မိသေးဘူး” ဟုသတင်းရင်းမြစ်က ဧရာဝတီတိုင်းမ်ကို ပြောသည်။
အဆိုပါ တိုက်ပွဲအတွင်း ခလရ ၁၂ မှ တပ်ရင်းမှူး အပါအဝင် စစ်တပ်ဘက်မှ ၁၀၀ ကျော် သေဆုံးခဲ့ပြီး စစ်သုံ့ပန်း အချို့ကိုလည်း ဖမ်းဆီးရမိခဲ့သည်။ ထို့အပြင် သေဆုံးသွားသည့် စစ်တပ် တပ်ဖွဲ့ဝင်များ၏ ရုပ်အလောင်းများနှင့် လက်နက်ခဲယမ်း အမြောက်အမြားကိုပါ သိမ်းဆည်းရရှိခဲ့သည်။
ထို့ပြင် စက်တင်ဘာလ ၉ ရက်နေ့တွင်လည်း စင်းခန်းတံတား ပတ်ဝန်းကျင်သို့ ကပ်လာသည့် စစ်တပ်စစ်ကြောင်းကို KIA ပူးပေါင်းတပ်ဖွဲ့များက တိုက်ခိုက်ခဲ့ရာ စစ်တပ်ဘက်မှ ၁၈ ဦး ထပ်မံသေဆုံးခဲ့ပြီး ရုပ်အလောင်းများကို သိမ်းဆည်းရရှိခဲ့ကြောင်း သိရသည်။
ဇင်းဘုံတိုက်ပွဲအတွင်း စစ်တပ်ဘက်မှ တပ်ရင်း သုံးရင်းဖြင့် ထိုးစစ်ဆင်လာခြင်းဖြစ်ပြီး သေဆုံးမှုများပြားကာ ရွှေကူဘက်သို့ ပြန်လည်ဆုတ်ခွာသွားကြောင်းနှင့် ထိခိုက်သေဆုံးသူ စုစုပေါင်း ၁၀၀ ထက်မနည်း ရှိကြောင်း သတင်းရင်းမြစ်များထံမှ သိရသည်။
