ရွှေကူတွင် တိုက်ပွဲပြင်းထန်နေပြီး စစ်တပ်က မြေပြင်စစ်ကြောင်းအပြင် တိုက်ခိုက်ရေးလေယာဉ်၊ ထောက်ပို့လေယာဉ်များဖြင့်ပါ ဗုံးပတ်ကြဲနေ

‎ဧရာဝတီတိုင်းမ်
‎ဩဂုတ် ၂၄ရက်
‎
‎ကချင်ပြည်နယ်၊ ရွှေကူမြို့နယ်တွင် ရွေးတုအစိုးရ စစ်တပ်က အင်အားဖြည့်တင်းကာ စစ်ကြောင်း ထိုးလာသည့် အတွက် တိုက်ပွဲများပြင်းထန်နေပြီး လေကြောင်းမှပါ ပြင်းပြင်းထန်ထန် တိုက်ခိုက်နေ ကြောင်း သိရသည်။
‎
‎ယနေ့ ဩဂုတ် ၂၄ရက်နေ့တွင် ရွှေကူမြို့အနီး၌ တိုက်ပွဲများပြင်းထန်နေပြီး စစ်တပ်ဘက်မှ နေ့လယ် ၁ နာရီဝန်းကျင်ထိY12 နှစ်စင်း၊ တိုက်ခိုက်ရေးလေယာဉ် ဂျက်ဖိုက်တာ တစ်စင်းတို့ဖြင့် လေကြောင်းတိုက် ခိုက်မှုများ လုပ်ဆောင်ထားကြောင်း ဒေသခံသတင်းရင်းမြစ်များထံမှ သိရသည်။
‎
‎”အင်အားဖြည့်ပြီး စစ်ကြောင်းတွေတက်လာတာမှန်ပေမယ့် အဆုံးအဖြတ်ပွဲမျိုးမဟုတ်ဘူး။ KIA စိုးမိုး‌ နေရာတွေကိုလည်း မကျော်နိုင်သေးပါဘူး” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
‎
‎‌ငါးအိုးဘက်မှ ထွက်လာသည့် စစ်တပ်၏ စစ်ကြောင်း သုံးကြောင်းနှင့် ရွှေကူရှိ တော်လှန်၊ ကိုင်းရွာ၊ လေးလမ်းဆုံမှ စစ်ကြောင်းတစ်ကြောင်း၊ စုစုပေါင်း စစ်ကြောင်း လေးကြောင်း အင်အား ၄၀၀ ကျော်သည် ယမန်နေ့ ဩဂုတ် ၂၃ရက်က စစ်ကြောင်းထိုးလာသည့်အတွက် ကချင်လွတ်လပ်ရေး တပ်မတော် (KIA) နှင့် တိုက်ပွဲပြင်းထန်နေခြင်း ဖြစ်ကြောင်း သိရသည်။
‎
‎ယမန်နေ့ နံနက်ပိုင်းအချိန်မှစ၍ စစ်တပ်က ရွှေကူမြို့နယ်အတွင်းကို ဂျက်ဖိုက်တာ ငါးစင်း ဖြင့် လေယာဉ်အုပ်လိုက်သုံးကာ ဗုံးကြဲတိုက်ခိုက်မှုများပြုလုပ်ခဲ့သည်။
‎
‎ဗန်းမော်ကိုဦးတည်သည့် စစ်ရေယာဉ်များ စဉ့်ကူး၊ သပိတ်ကျင်းမြို့နယ်များကို ကျော်လာပြီးနောက် ရွှေကူမြို့နယ်ရှိ တပ်ဖျောက်ထားသည့် စစ်တပ်၏ အင်အား ၇၀၀ ပါစစ်ကြောင်းမှာလည်း ပြန်လည် လှုပ်ရှားနေပြီဖြစ်ကြောင်း သိရသည်။
‎
ပုံစာ-KIA တပ်ဖွဲ့ဝင်များ။