ဧရာဝတီတိုင်းမ်
ဩဂုတ် ၁၅ ရက်
ဧရာဝတီတိုင်း၊ သာပေါင်းမြို့နယ်၊ ကြက်သွန်ကွင်း- သဲဖြူ- မကျည်းဇင် လမ်းဆုံမှ ၇ မိုင်အကွာ ကဇင်း တောကျေးရွာကို ဩဂုတ် ၁၃ ရက်က တောဆင်ရိုင်းများ ဝင်ရောက်လာကြောင်း သိရသည်။
ကဇင်းတောကျေးရွာကို သြဂုတ် ၁၃ ရက် ညပိုင်းက တောဆင်ရိုင်း နှစ်ကောင် ဝင်ရောက်လာသည့် အတွက် အမျိုး သမီးတစ်ဦး ဆင်နင်းခံရပြီး နံရိုးကျိုး၊ လက်ကျိုး၊ ခြေထောက်ဒဏ်ရာများရရှိကာ ပုသိမ်ဆေးရုံသို့ တင်ပို့ခဲ့ရကြောင်း သိရသည်။
”ကဇင်းတောကိုဝင်တာက ဆင်ရိုင်း နှစ်ကောင်။ အဲဒီ့ဘက်မှာ စစ်တပ်ကလည်းရှိတော့ စစ်တပ်က သေနတ်ပစ်ဖောက်လိုက်တော့ ဆင်တွေက ပြန်ထွက်သွားတယ်။ ရွာအနောက်ဘက်မှာတော့ အကောင် ၃၀ လောက်ရှိတယ်” ဟု သတင်းရင်းမြစ်က ဧရာဝတီတိုင်းမ်ကိုပြောသည်။
အဆိုပါတောဆင်ရိုင်းများသည် လက်နက်ကြီးသံများနှင့် အစာရှားပါးမှုကြောင့် ရိုးမအစပ်ရှိ ကျေးရွာများ အတွင်း အုပ်ဖွဲ့ဝင်ရောက်လာခြင်းဖြစ်ကြောင်း ဒေသခံများထံမှ သိရသည်။
ပြီးခဲ့သည့် ဇူလိုင် ၁၅ရက်နေ့ကလည်း ငွေဆောင်မြို့နယ်အတွင်း တောဆင်ရိုင်း ဝင်ရောက်လာသည့် အတွက် ဆင်နင်းခံရပြီး မိသားစုဝင် သုံး ဦးသေဆုံးကာ တစ်ဦး ဒဏ်ရာအပြင်းအထန်ရရှိခဲ့ကြောင်း သိရသည်။
ဓာတ်ပုံ- ပုံဟောင်းပြန်လည်အသုံးပြုထားသည်။
