ဧရာဝတီတိုင်းမ်
ဩဂုတ် ၁၄ရက်
ရခိုင်ပြည်နယ်၊ ဂွမြို့နယ်၊ ကျိန္တလီမြို့နှင့် ကိုင်းခုံကျေးရွာတို့ကို စစ်တပ်က ယမန်နေ့ ဩဂုတ် ၁၃ ရက် ညပိုင်းတွင် လေကြောင်းမှ ဗုံးကြဲတိုက်ခိုက်ခဲ့သဖြင့် ကလေးငယ်များ အပါအဝင် အရပ်သားပြည်သူ ရှစ်ဦး သေဆုံးခဲ့ကြောင်း အာရက္ခတပ်တော် AA သတင်းနှင့် ပြန်ကြားရေးက ယနေ့ ဩဂုတ် ၁၄ ရက်တွင် သတင်းထုတ်ပြန်သည်။
AA ၏ ထုတ်ပြန်ချက်အရ ဩဂုတ် ၁၃ ရက် ည ၁၁ နာရီ ၃၀မိနစ်ခန့်တွင် ကျိန္တလီမြို့၊ အမှတ် (၁) ရပ်ကွက်၊ မေတ္တာပေါင်းကူးလမ်းရှိ အရပ်သားပြည်သူများ နေထိုင်ရာ ရပ်ကွက်အတွင်းသို့ စစ်တပ်၏ ဂျက်တိုက်လေယာဉ်တစ်စီးက ဗုံးသီး နှစ်လုံး ကြဲချတိုက်ခိုက်ခဲ့ခြင်းဖြစ်သည်ဟု သိရသည်။
အဆိုပါ လေကြောင်းတိုက်ခိုက်မှုကြောင့် နေအိမ်ပေါ်၌ပင် မိသားစုဝင်များနှင့် အရပ်သား ရှစ် ဦး အစုလိုက်အပြုံလိုက် သေဆုံးခဲ့ပြီး ပြည်သူ့နေအိမ် ငါး လုံးနှင့် သုံးဘီးဆိုင်ကယ် တစ် စီး ပျက်စီးခဲ့သည်။
သေဆုံးသွားသူများမှာ ဒေါ်ခင်မိုးရွှေ (၆၀ နှစ်)၊ဒေါ်ခင်စန္ဒာထွန်း (၄၅ နှစ်)၊ ဦးထွန်းလင်း (၄၆ နှစ်)၊ မဖြိုးဖြိုးကျော် (၃၆ နှစ်)၊ မောင်မင်းဝေခန့် (၃၅ နှစ်)၊ မဝင်းအိကျော် (၂၆ နှစ်)၊ မောင်ဉာဏ်လင်းသန့် (၁၂ နှစ်)၊ မောင်နေလင်းသန့် (၇ နှစ်) တို့ဖြစ်ကြသည်။
ထို့အပြင် အခြားသော အရပ်သားပြည်သူများ ထိခိုက်ဒဏ်ရာရရှိမှု၊ သေဆုံးမှုနှင့် နေအိမ်အဆောက်အအုံ ပျက်စီးဆုံးရှုံးမှုများ ရှိ/မရှိကိုလည်း ထပ်မံစုံစမ်းလျက်ရှိကြောင်း သိရသည်။
အလားတူ ယင်းနေ့ ည ၁၀ နာရီ ၅၅ မိနစ်ခန့်ကလည်း ဂွမြို့နယ်၊ ကိုင်းခုံကျေးရွာကို စစ်တပ်က ဂျက်တိုက်လေယာဉ်တစ်စီးဖြင့် လေကြောင်းမှ ဗုံးကြဲတိုက်ခိုက်ခဲ့သော်လည်း ယင်းတိုက်ခိုက်မှုတွင် အရပ်သား ထိခိုက်ဒဏ်ရာရရှိမှုနှင့် အဆောက်အအုံ ပျက်စီးမှု မရှိခဲ့ကြောင်း ဖော်ပြထားသည်။
တိုက်ပွဲဖြစ်ပွားခြင်းမရှိသည့် မြို့ရွာများနှင့် အရပ်သားပြည်သူများ နေထိုင်ရာ နေရာများကို စစ်တပ်က လေကြောင်းမှ နေ့ညမရွေး တိုက်ခိုက်မှုများ ပြုလုပ်နေသဖြင့် ရခိုင်ဒေသတစ်ခုလုံးအနေဖြင့် လေကြောင်းရန်ကို အချိန်ပြည့် အထူးဂရုပြုကြရန်လည်း အာရက္ခတပ်တော်က တိုက်တွန်းထားသည်။
စစ်တပ်က ဂွမြို့နယ်နှင့် ဆမီးမြို့တို့ကို ပြီးခဲ့သည့် ဩဂုတ် ၁၂ရက်နေ့ ညပိုင်းက လေကြောင်းတိုက်ခိုက်မှု ပြုလုပ်ခဲ့သေးပြီး လူထိခိုက်သေဆုံးမှု ရှိခဲ့သည်။
ဓာတ်ပုံ- AA Info Desk
ပုံစာ- ကျိန္တလီမြို့ ဗုံးကြဲခံရစဉ်
