ကျောက်ဖြူ တပ်ရင်းများကို စစ်တပ်က အင်အားရာချီ ဖြည့်တင်းပြီးနောက် တိုက်ပွဲများ ပြင်းထန်လာ

‎ဧရာဝတီတိုင်းမ်
‎ဩဂုတ် ၁၃ ရက်

‎‎ရခိုင်ပြည်နယ်၊ ကျောက်ဖြူမြို့နယ်အတွင်း အာရက္ခတပ်တော် (AA) နှင့် ရွေးတုအစိုးရစစ်တပ် တို့အကြား အပြန်အလှန် ထိုးစစ်ဆင်မှုများနှင့်အတူ တိုက်ပွဲများ ပြန်လည်ပြင်းထန်နေကြောင်း စစ်ရေးသတင်းရင်းမြစ်များနှင့် ဒေသခံများထံမှ သိရသည်။

‎ယမန်နေ့ ဩဂုတ် ၁၂ ရက် ညနေပိုင်းမှစတင်၍ နှစ်ဖက်စစ်ကြောင်းများ အပြန်အလှန် ထိုးစစ်ဆင် မှုများကြောင့် တိုက်ပွဲများ ပြင်းထန်လာခြင်းဖြစ်ပြီး မင်းပြင်၊ သိုင်းချောင်း၊ ဒိုးတန်းတောင်၊ အဝတောင် စသည့် နေရာများအပြင် ဇိုင်ချောင်း၊ လိပ်ခမော်ရွာ အနီးဝန်းကျင်နှင့် အမှတ် (၃၂) ရဲတပ်ရင်း အနီးဝန်းကျင်တို့တွင်ပါ စစ်ရေးတင်းမာလျက်ရှိ‌ကြောင်း သိရသည်။

‎”တိုက်ပွဲနေရာတွေက ပိုကျယ်ပြန့်လာတယ်။ တိုက်ပွဲအစောဦးပိုင်းက ဖြစ်ခဲ့တဲ့နေရာတွေမှာပါ ပြန်ဖြစ် လာတယ်” ဟုကျောက်ဖြူ သတင်းရင်းမြစ်က ဧရာဝတီတိုင်းမ်ကိုပြောသည်။

‎တောင်မော်ဦး ရေတပ်အနီးရှိ အဝတောင်ကျေးရွာတွင် ပြီးခဲ့သည့် ဩဂုတ် ၁၁ရက်ညပိုင်းမှစကာ တိုက်ပွဲပြင်းထန်ခဲ့ပြီးနောက် စစ်တပ်စစ်ကြောင်းအချို့ ပြန်လည် ဆုတ်ခွာသွားခဲ့သည်။

‎ကျောက်ဖြူအခြေစိုက် ခလရ ၃၄၊ ခမရ ၅၄၂၊ ခမရ ၅၄၃ တပ်ရင်းများမှ အင်အားများကို ကားများဖြင့် လိပ်ခမော် အနီးဝန်းကျင်သို့ အင်အား ဖြည့်တင်းခဲ့သလို၊ တောင်မော်ဦး ရေတပ်စခန်း အနီးဝန်းကျင် သို့လည်း စစ်သင်္ဘောများဖြင့် အင်အား ရာချီ ဖြည့်တင်းမှုများ ပြုလုပ်ခဲ့ကြောင်း သိရသည်။

‎စစ်တပ်သည် တောင်မော်ဦး ရေတပ်စခန်းဘက်မှ စစ်ကြောင်းထိုးရန် ကြိုးပမ်းခဲ့သော်လည်း စစ်ကြောင်း လှည့်ပြန်ခဲ့ရမှုမှာ အနည်းဆုံး ၃ ကြိမ်ခန့် ရှိသွားပြီဖြစ်ကြောင်း စစ်ရေးသတင်းရင်း မြစ်များက ဆိုသည်။

ရွေးတုအစိုးရ စစ်တပ်သည် လေကြောင်းမှ ပစ်ကူယူရန်အတွက် တရုတ်နည်းပညာအဖွဲ့များကို လေဆိပ်တွင်စခန်းချပေးထားပြီး ဒရုန်းဖြင့်တိုက်ခိုက်ရန် ပြင်ဆင်လျက်ရှိသည့်အပြင် ဂျိုင်ရိုကော်ပတာ များကိုပါ စုဖွဲ့ထားသည်။

ဓာတ်ပုံ-AA Info Desk