ဧရာဝတီတိုင်းမ်
ဩဂုတ် ၁၂ရက်
ကချင်ပြည်နယ်၊ ဗန်းမော်မြို့စစ်ရေးနယ်မြေအတွင်းတွင် ရွေးတုအစိုးရစစ်တပ်က လေကြောင်း အသုံး ပြု၍ ရိက္ခာ၊ လက်နက်ခဲယမ်းနှင့် တပ်သားသစ်များ အဆက်မပြတ် အင်အားဖြည့်တင်းလျက်ရှိပြီး တစ်ကျော့ပြန် မြို့တွင်းထိတွေ့တိုက်ပွဲများ ပြင်းထန်လာနိုင်သည့် အခြေအနေသို့ ရောက်ရှိနေကြောင်း စစ်ရေးစောင့်ကြည့်လေ့လာသူများ၏ ပြောပြချက်အရ သိရသည်။
ရွေးတုအစိုးရ စစ်တပ်သည် ပြီးခဲ့သည့် ဩဂုတ် ၆ ရက်နေ့က ဗန်းမော်မြို့နယ်အတွင်းသို့ လေကြောင်း မှတစ်ဆင့် ရိက္ခာနှင့် အထောက်အပံ့ပစ္စည်းအချို့ကို လေထီးများဖြင့် ချပေးခဲ့သည့်အပြင် အင်အား အချို့ကိုပါ လေကြောင်းမှတစ်ဆင့် ဖြည့်တင်းပေးခဲ့သည်။
”ရိက္ခာနည်းနည်းပို့ပေးပြီးရင် စစ်ကြောင်း ထွက်ခိုင်းတတ်တော့ မြို့တွင်း တိုက်ပွဲထပ်ဖြစ်လာ နိုင်ပါတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
ဗန်းမော်မြို့သည် စစ်တပ်၏ စစ်ရေးဗျူဟာအရ လွန်စွာအရေးပါသော စခန်းတည်နေရာတစ်ခုဖြစ်ပြီး ကချင်လွတ်လပ်ရေးတပ်မတော် (KIA) အတွက် ဂုဏ်သိက္ခာအရ အရေးပါသော တိုက်ပွဲဖြစ်၍ နှစ်ဖက် အင်အားဖြည့်တင်းမှုများရှိသည်။
ရွေးတုအစိုးရ စစ်တပ်၏ ရေကြောင်းမှတစ်ဆင့် အင်အားဖြည့်တင်းရန် အစီအစဉ်မှာလည်း အခက် အခဲရှိနေသည့်အတွက် အဓိကအားဖြင့် လေကြောင်းလိုင်းကိုသာ အားပြု၍ စစ်ရေးအရှိန် ပြန်လည် စတင်နိုင်ရန် ပြင်ဆင်နေခြင်း ဖြစ်သည်။
ငါးအိုး- ရွှေကူမှ စင်ခန်းအထိ စစ်ကြောင်းထိုးရန်တက်လာသည့် အင်အား ၇၀၀ ပါစစ်ကြောင်းမှာလည်း ဗန်းမော် စင်ခန်းကိုရောက်မလာသေးဘဲ လမ်းပိုင်းတွင် ရပ်တန့်နေဆဲဖြစ်ကြောင်း သိရသည်။
လက်ရှိအခြေအနေများအရ စစ်တပ်၏ ထိုသို့ အင်အားဖြည့်တင်းမှုများနှင့် စစ်ရေးပြင်ဆင်မှုများကြောင့် ဗန်းမော်မြို့တွင်း၌ ထိတွေ့တိုက်ပွဲများ မကြာမီကာလအတွင်း ပြန်လည်စတင်ပြီး ယခင်ထက် ပိုမိုပြင်းထန်လာနိုင်ကြောင်း စစ်ရေးအကဲခတ်များကဆိုသည်။
ဓာတ်ပုံ-လူမှုကွန်ရက်
