ဧရာဝတီတိုင်းမ်
ဩဂုတ် ၇ရက်
ဂွမြို့နယ်အတွင်း စစ်အခြေစိုက်စခန်း ပြုလုပ်ရန် ရောက်ရှိလာသည့် ရွေးတုအစိုးရစစ်တပ် တပ်ဖွဲ့ဝင် များသည် အာရက္ခတပ်တော် (AA) နှင့် ပူးပေါင်းတပ်များ၏ တန်ပြန်ထိုးစစ်ကြောင့် ထိခိုက်သေဆုံးမှု များပြားစွာဖြင့် ကစဉ့်ကလျား ပြန်လည်ဆုတ်ခွာနေရကြောင်း သိရသည်။
စစ်တပ်သည် မြေပြင်အင်အားအလုံးအရင်းအပြင် လေကြောင်းနှင့် လက်နက်ကြီး ပစ်ကူများပါ အသုံးပြု၍ ထိုးစစ်ဆင်ခဲ့သော်လည်း AA နှင့် ပူးပေါင်းတပ်များ၏ စနစ်ကျသည့် ခုခံစစ်နှင့် တန်ပြန် ထိုးစစ်တို့ကြောင့်ထိခိုက် သေဆုံးမှုများစွာဖြင့် ဆုတ်ခွာခဲ့ရခြင်းဖြစ်ကြောင်း သိရသည်။
”အခုတက်လာတဲ့စစ်တပ် စစ်ကြောင်းတွေက အမြောက်တပ်က ပစ်အားတွေအပြင် တိုက်ရိုက်ပစ် လက်နက် ကြီးပစ်အားတွေပါ ဖောဖောသီသီသုံးပြီးတက်လာတာပဲ။ ပြီးတော့ စစ်တပ် ဘာဖြစ်လဲမေးရင် ပြေးရတာပေါ့ဗျာ” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ပြီးခဲ့သည့် ဩဂုတ် ၁ ရက်နှင့် ၂ ရက်နေ့များက ရေကြည်နှင့် သာပေါင်းကျေးရွာများအနီး ဖြစ်ပွားခဲ့သော တိုက်ပွဲများတွင်လည်း ရေကြည်အမြောက်တပ် အမတ-၃၄၄ မှ လက်နက်ကြီး ပစ်ကူများ ဆက်တိုက် ပေးခဲ့သော်လည်း စစ်တပ်မှာ အထိနာကာ ပြန်လည်ဆုတ်ခွာသွားခဲ့ရကြောင်း AA ကထုတ်ပြန် ထားသည်။
ထို့အပြင် တိုက်ပွဲအတွင်း သိမ်းဆည်းရရှိသည့် ခဲယမ်းများတွင် ရှေ့ထွက်မိုင်းများ အပါအဝင် စစ်တပ်က မီးလောင်ဗုံး (ဖော့စဖရပ်စ်) ပါဝင်သော ၆၀ မမ မော်တာကျည်များကိုပါ စစ်တပ်က အများအပြား အသုံးပြုလာသည်ကို တွေ့ရသည်။
လက်ရှိတွင် AA အနေဖြင့် ရခိုင်တောင်ပိုင်း ဂွမြို့နယ်အတွင်းသို့ စစ်တပ် စစ်ကြောင်းများ ဝင်ရောက် လာနိုင်သည့် လေးမျက်နှာ၊ သာပေါင်းနှင့် ရေကြည်မြို့နယ်တို့၏ ငဝန်မြစ် အနောက်ဘက်ကမ်းနယ်မြေ အားလုံးကို ဖြန့်ကျက်ပိတ်ဆို့ ထိန်းချုပ်ထားသည့် အနေအထားရှိကြောင်း သိရသည်။
ရွေးတုအစိုးရ စစ်တပ်ကလည်း အင်အားအလုံးအရင်းသုံး၍ သာပေါင်း စက်ဒေါင့်ကြီးမှတစ်ဆင့် ၎င်းတို့စစ်အခြေစိုက်စခန်းများပြုလုပ်ထားသည့် ဘုရားကြီး၊ ရေကြည်ရှိ ကမ္ဘားကြီးစခန်းတို့ကို စစ်ကြောင်းများဖြန့်ကျက်ပို့ထားသည်ကို တွေ့ရသည်။
ဓာတ်ပုံ-MWD(ပုံဟောင်း)
