ဧရာဝတီတိုင်းမ်
ဩဂုတ် ၇ရက်
ရခိုင်ပြည်နယ်၊ ပုဏ္ဏားကျွန်းမြို့နယ်အတွင်း ဖြစ်ပွားခဲ့သည့် အသက် (၂၃) နှစ်အရွယ် အမျိုးသမီး တစ်ဦးအား မုဒိမ်းကျင့် သတ်ဖြတ်ခဲ့သည့် အမှုမှ တရားခံ သုံးဦးကို စစ်တွေခရိုင်တရားရုံးက သေဒဏ်နှင့် ထောင်ဒဏ် နှစ် ၂၀ စသည့် ပြစ်ဒဏ်များ အသီးသီး ချမှတ်လိုက်ကြောင်း အာရက္ခ မှုခင်းနှင့် ဆက်စပ်သတင်းများ ထုတ်ပြန်ရေးအဖွဲ့က ယမန်နေ့ ဩဂုတ် ၆ ရက်တွင် ထုတ်ပြန်ထားသည်။
ပုဏ္ဏားကျွန်းမြို့နယ်၊ အောင်ဆိပ်ကျေးရွာမှ ပြီးခဲ့သည့် ဇူလိုင် ၁၈ ရက်နေ့ကတည်းက ပျောက်ဆုံး နေသည့် အမျိုးသမီးတစ်ဦး၏ ရုပ်အလောင်းကို ဇူလိုင် ၂၂ရက်၊ ည ၁၀ နာရီအချိန်တွင် တန်းစွယ်ကျေးရွာ အနောက်ဘက် တောင်ခြေရင်းရှိ သရက်ခြံမြောင်အတွင်း လက်ထိပ်နောက်ပြန်ခတ် လျက်သား ပုပ်ပွသေဆုံးနေသည်ကို တွေ့ရှိခဲ့ရခြင်းဖြစ်သည်။
အဆိုပါဖြစ်စဉ်နှင့် ပတ်သက်၍ သက်ဆိုင်ရာ ဒီလပ် (ရဲ) စခန်းက အမှုအမှတ် (ပ) ၁၈/၂၀၂၆၊ ရာဇသတ်ကြီး ဥပဒေပုဒ်မ ၃၀၂ အရ အမှုဖွင့်လှစ်ကာ စုံစမ်းစစ်ဆေးမှုများ အရှိန်အဟုန်မြှင့် ဆောင်ရွက်ခဲ့သည်။
စုံစမ်းစစ်ဆေးချက်များအရ ပုဏ္ဏားကျွန်းမြို့နယ်၊ ယိုးတရုပ်ရွာ ယာယီစစ်ရှောင်စခန်းတွင် နေထိုင်သည့် မောင်တင်ဝင်း ၃၇ နှစ်ကအမျိုးသမီးအား မုဒိမ်းကျင့် သတ်ဖြတ်ခဲ့ကြောင်း ဝန်ခံထွက်ဆိုခဲ့သည်။ ထို့ပြင် ၎င်း၏ ထွက်ဆိုချက်အရ ကြံခင်းကယ်ဆယ်ရေးစခန်း၌ နေထိုင်သူများဖြစ်ကြသည့် မောင်အေးကျော် (ခ) မောင်ပု ၂၉ နှစ် နှင့် မောင်သန်းစိုး (ခ) င/လုံး ၂၁ နှစ် တို့နှစ်ဦးသည်လည်း အဆိုပါပြစ်မှုတွင် ပူးပေါင်းပါဝင်ခဲ့ကြောင်း ပေါ် ပေါက်ခဲ့သဖြင့် ၎င်းတို့ သုံးဦးလုံးအား ဇူလိုင် ၂၄ ရက်နေ့တွင် ဖမ်းဆီးထိန်းသိမ်းခဲ့သည်။
ရဲတပ်ဖွဲ့က တရားခံများအား ချုပ်ရက်ရယူခြင်း၊ သက်သေခံပစ္စည်းများ သိမ်းဆည်းခြင်းနှင့် တရားစွဲဆို နိုင်ရေး ခိုင်မာစွာ တည်ဆောက်ပြီးနောက် ဇူလိုင် ၃၁ ရက်နေ့တွင် စစ်တွေခရိုင်တရားရုံးသို့ တရားစွဲ တင်ပို့ခဲ့သည်။
စစ်တွေခရိုင်တရားရုံး (ရာဇဝတ်ကြီးမှုအမှတ် – ၃၅/၂၀၂၆) ၌ တရားလိုပြသက်သေ ၁၉ ဦးနှင့် နှစ်ဖက် စစ်ဆေးမှုများ ပြုလုပ်ခဲ့ပြီးနောက် ဩဂုတ် ၅ ရက်နေ့တွင် ခရိုင်တရားသူကြီးက အမိန့်ချမှတ်ခဲ့သည်။
တရားခံ မောင်တင်ဝင်း ကို ပြစ်မှုထင်ရှားသဖြင့် ရာဇသတ်ကြီးပုဒ်မ – ၃၀၂ (၁)(ဂ) အရ မသေမချင်း လည်ပင်းကြိုးကွင်းစွပ်၍ သတ်စေ ဟု သေဒဏ်အမိန့် ချမှတ်ခဲ့သည်။
တရားခံ မောင်အေးကျော် (ခ) မောင်ပု နှင့် တရားခံ မောင်သန်းစိုး (ခ) င/လုံး တို့နှစ်ဦးအား ပြစ်မှုတွင် ပူးပေါင်း ပါဝင်ကူညီခဲ့သည့်အတွက် ရာဇသတ်ကြီးပုဒ်မ – ၃၆၄ အရ ထောင်ဒဏ်နှစ် ၂၀ စီ အသီးသီး ကျခံစေရန် မိန့်ဆိုခဲ့သည်။
အာရက္ခပြည်သူ့တော်လှန်ရေးအစိုးရအနေဖြင့် ပြည်သူလူထုအတွင်း လူသတ်မှု၊ မုဒိမ်းမှုနှင့် သက်ငယ်မုဒိမ်းမှုအပါအဝင် မှုခင်းများ လျော့နည်းကျဆင်းရေးကို အဓိကထား ဆောင်ရွက်လျက်ရှိပြီး ပြစ်မှုကျူးလွန်သူများ လွတ်မြောက်မှု မရှိစေရေး မူဝါဒဖြင့် ထောက်လှမ်းဖမ်းဆီးမှုများ ထိရောက်စွာ ဆောင်ရွက်သွားမည်ဖြစ်ကြောင်း သိရသည်။
