ဧရာဝတီတိုင်းမ်
ဩဂုတ် ၅ရက်
ရခိုင်နှင့် ဧရာဝတီတိုင်း အစပ်ဒေသများတွင် အာရက္ခတပ်တော် (AA) နှင့် ရွေးတုအစိုးရစစ်တပ် တို့အကြား တိုက်ပွဲများ ဆက်လက်ပြင်းထန်လျက်ရှိရာ ဩဂုတ် ၁ ရက်နှင့် ၂ ရက်နေ့များတွင် ရေကြည်မြို့နယ်နှင့် သာပေါင်းမြို့နယ်အတွင်း တိုက်ပွဲများ ဖြစ်ပွားခဲ့ပြီး စစ်တပ်ဘက်မှ ထိခိုက်သေဆုံးမှုများရှိခဲ့ကြောင်း AA က ထုတ်ပြန်ထားသည်။
ပြီးခဲ့သည့် ဇူလိုင်လအတွင်း မိုးသည်းထန်စွာ ရွာသွန်းမှုနှင့် ရာသီဥတု အခြေအနေများကြောင့် ထိုးစစ်၊ ခံစစ်အခြေအနေ အပြောင်းအလဲရှိခဲ့သည်။
ထိုသို့ အပြောင်းအလဲများ ရှိခဲ့သော်လည်း တိုက်ပွဲကြီး၊ တိုက်ပွဲငယ်များမှာ နေ့စဉ်နီးပါး ဆက်လက်ဖြစ်ပွားနေပြီး တိုက်ပွဲဖြစ်ပွားခြင်းမရှိသည့် နေ့ရက်များတွင်ပင် စစ်တပ်ဘက်မှ လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများကို ပုံမှန်ပြုလုပ်ခဲ့ကြောင်း ထုတ်ပြန်ချက်တွင် ဖော်ပြထားသည်။
ရွေးတုအစိုးရ စစ်တပ် ပုသိမ် အနောက်တောင်တိုင်းစစ်ဌာနချုပ် (နတခ) မှ အင်အားဖြည့်တင်းထားသည့် တပ်မ (၆၆) လက်အောက်ခံ ခလရ-၁၊ ခလရ- ၁၁ တပ်ရင်းများနှင့် AA တပ်ဖွဲ့ဝင်များသည် ပြီးခဲ့သည့် ဩဂုတ် ၂ ရက်နေ့တွင်ရေကြည်မြို့နယ်၊ ရုံးပင်ကျေးရွာ အနောက်မြောက်ဘက်၌ ၂ နာရီနီးပါးကြာ တိုက်ပွဲ နှစ်ကြိမ် ရှေ့ဆင့်နောက်ဆင့် ဖြစ်ပွားခဲ့သည်။
ပထမတိုက်ပွဲအဖြစ် ရုံးပင်ကျေးရွာ အနောက်မြောက်ဘက် ၃.၃ ကီလိုမီတာခန့်အကွာတွင် နံနက် ၁၁ နာရီ ၅၀ မိနစ်မှ နေ့လယ် ၁ နာရီ ၅၀ မိနစ်အထိ ဖြစ်ပွားခဲ့သည်။
စစ်တပ်ဘက်မှ ဒရုန်းနှင့် မြေပြင်ပစ်ကူများ သုံးစွဲ၍ ထိုးစစ်ဆင်လာသဖြင့် AA ဘက်မှ ခုခံတိုက်ထုတ်ခဲ့ရာ စစ်တပ်က အထိအခိုက် အကျအဆုံးများစွာဖြင့် ဆုတ် ခွာသွားခဲ့ကြောင်း သိရသည်။
ဒုတိယတိုက်ပွဲအဖြစ် ရုံးပင်ကျေးရွာ အနောက်မြောက်ဘက် ၃.၇ ကီလိုမီတာခန့်အကွာတွင် ညနေ ၃ နာရီ ၄ မိနစ်ခန့်မှစတင်၍ ၁ နာရီကျော်ကြာ ထပ်မံဖြစ်ပွားခဲ့သည်။
အင်အားအလုံးအရင်းဖြင့် ထိုးစစ်ဆင်လာသည့် စစ်တပ်ကို AA ဘက်မှ တန်ပြန်ထိုးစစ်ဆင် တိုက်ခိုက်ခဲ့ရာ စစ် တပ် တပ်ဖွဲ့ဝင်များ ကစဉ့်ကလျား ဆုတ်ခွာထွက် ပြေးခဲ့ရသည်။
အဆိုပါ တိုက်ပွဲနှစ်ခုစလုံးမှ စစ်တပ် တပ်ဖွဲ့ဝင်များ၏ ရုပ်အလောင်းအချို့နှင့် လက်နက်ခဲယမ်းများကို AA က သိမ်းဆည်းရမိခဲ့သည်။
ဩဂုတ်လ ၁ ရက်နေ့ နေ့လယ် ၁ နာရီ ၅၁ မိနစ်မှ ညနေ ၃ နာရီ ၄၀ မိနစ်အထိ သာပေါင်းမြို့နယ်၊ သာပေါင်းကလေးကျေးရွာ၏ အရှေ့ဘက် ၁.၀၆ ကီလိုမီတာခန့်အကွာတွင်လည်း နှစ်ဖက် တိုက်ပွဲပြင်းထန်စွာ ဖြစ်ပွားခဲ့ပြီး အဆိုပါ တိုက်ပွဲမှလည်း စစ်တပ်၏ လက်နက်ခဲယမ်းအချို့ကို သိမ်းဆည်းရမိခဲ့ကြောင်း AA ၏ ထုတ်ပြန်ချက်တွင်ဖော်ပြထားသည်။
အာရက္ခတပ်တော်(AA) စစ်ရုံးချုပ်က ရွေးတုအစိုးရ စစ်တပ်၏ ထိုးစစ်များကို သတ္တိရှိရှိ ခုခံတိုက်ခိုက်ခဲ့ကြသည့် AA တပ်ဖွဲ့ဝင်များ၏ စွမ်းဆောင်ရည်ကို မှတ်တမ်းတင် ဂုဏ်ပြုကြောင်းလည်း ထည့်သွင်းဖော်ပြထားသည်။
ဓာတ်ပုံ- AA Info Desk
ပုံစာ- ရုံးပင်ကျေးရွာအနီးတိုက်ပွဲမှသိမ်းဆည်းရမိသည့် လက်နက်ခဲယမ်းများ
