ဧရာဝတီတိုင်းမ်
ဇူလိုင် ၁၄ရက်
စစ်ကိုင်းတိုင်း၊ ကောလင်းမြို့နယ် အရှေ့ခြမ်းရှိ နယ်မြေများကို ဦး တည်၍ စစ်ကြောင်းထိုးရန် ကြိုးပမ်းခဲ့သည့် ရွေးတုအစိုးရ စစ်တပ် စစ်ကြောင်းများသည် တော်လှန်ရေးပူးပေါင်းတပ်ဖွဲ့များ၏ ဆီးကြိုတိုက်ခိုက်မှုကြောင့် ပြန်လည်ဆုတ်ခွာခဲ့ကြောင်း သိရသည်။
စစ်တပ်သည် ယခု ဇူလိုင် ဒုတိယပတ်အတွင်းက ကောလင်း အရှေ့ခြမ်းရှိ သစ်ဖုလနှင့် ကျောက်ပုထိုး နယ်မြေများသို့ စစ်ကြောင်းထိုး ဝင်ရောက်လာပြီးနောက် ပြန်လည် ဆုတ်ပြေးရခြင်းဖြစ်ကြောင်း သတင်းရင်းမြစ်များထံမှ သိရသည်။
ဝန်းသို၊ မဲဇာနှင့် အင်းတော်တစ်လျှောက်တွင် စစ်တပ်ဘက်က တပ်ဖြန့်ထားနိုင်သည်ဟု ထုတ်ပြန်မှုများ ရှိနေသော်လည်း အမှန်တကယ်တွင် ကောလင်း-ဝန်းသို လမ်းပိုင်းနှင့် ကောလင်း-ပင်လယ်ဘူး နယ်မြေများကို တော်လှန်ရေးတပ်ဖွဲ့များက အပြည့်အဝ ထိန်းချုပ်ထားဆဲဖြစ်ပြီး အင်းတော်နှင့် ထီးချိုင့် နယ်မြေအချို့ရှိ ဆက်သွယ်ရေးလမ်းကြောင်း နေရာအချို့ကိုသာ စစ်တပ်က ထိန်းချုပ်ထားနိုင်ခြင်း ဖြစ်ကြောင်း စစ်ရေးသတင်းရင်းမြစ်က ဆိုသည်။
”ထီးချိုင့်ကအနောက်ခြမ်းနဲ့ ကောလင်းကအရှေ့ခြမ်းနယ်မြေ အားလုံးက တော်လှန်ရေးတပ်ဖွဲ့များရဲ့ စိုးမိုးနယ်မြေတွေ ဖြစ်ပါတယ်” ဟု CDM ဗိုလ်ကြီး ဇင်ယော်က ဧရာ၀တီတိုင်းမ်ကို ပြောသည်။
မဲဇာနှင့် နန့်သဲသို့ ရောက်ရှိလာသည့် စစ်တပ်စစ်ကြောင်းများသည် လက်ရှိတွင် ခံစစ်အသွင် ပြောင်းလဲသွားကာပင်လယ်ဘူးမြို့ကို သိမ်း ပိုက်နိုင်ခြေနည်းပါးသွားပြီဖြစ်သည်။ ထိုကြောင့် စစ်ကိုင်း တိုင်းအတွင်း တိုက်စစ်ဆင်ရန်ထက် ၎င်းတို့ရရှိထားသည့် နယ်မြေများတွင် အပြည့်အဝစိုးမိုးနိုင်ရေး ကိုသာ ပိုမိုဦးစားပေး လုပ်ဆောင်လျက်ရှိကြောင်း သိရသည်။
အင်းတော်၊ နဘား၊ မော်လူးကိုရောက်ရှိနေသည့် ရွေးတုအစိုးရ စစ်တပ်နှင့် တော်လှန်ရေးတပ်ဖွဲ့များ ထိတွေ့တိုက်ပွဲအချို့ရှိနေပြီး စစ်တပ်က လက်နက်ကြီး၊ ဒရုန်းနှင့် လေကြောင်းပစ်ကူများသုံး၍ ခုခံလျက်ရှိသည်။ ပြီးခဲ့သည့် ဇူလိုင် ၇ ရက်နေ့ကလည်း မော်လူးတောင်ဘက် စီပိန်းရွာတိုက်ပွဲတွင် စစ်တပ်ဘက်က အထိနာ၍ လေကြောင်းမှ ဗုံးအလုံး ၄၀ခန့် ကြဲချခဲ့သည်။
ဓာတ်ပုံ-လူမှုကွန်ရက်
