ဧရာ၀တီတိုင်းမ်
ဇွန် ၂၈ ရက်
ရခိုင်ပြည်နယ်၊ ဂွမြို့နယ်အတွင်းရှိ ကျိန္တလီမြို့နှင့် ရေကျော်ရွာတို့ကို စစ်တပ်မှ ဗုံးကြဲ တိုက်ခိုက်ခဲ့မှုကြောင့် အရပ်သား တစ်ဦးသေဆုံးပြီး အမျိုးသမီးငယ် နှစ်ဦးအပါအဝင် ငါးဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
ပြီးခဲ့သည့် ဇွန် ၂၆ ရက် နံနက်လင်းအားကြီး ၃ နာရီခန့်က ဗုံးကြဲတိုက်ခိုက်မှုကြောင့် မဆုမြတ်မွန်၊ မောင်ထက်မြတ်သူ၊ မဆောင်းဟေမန်ခင်၊ အသက် ၇၅ နှစ်အရွယ် ဦးဖိုးနီ၊ အသက် ၃၅ နှစ်အရွယ် ဦးဆန်းမင်းတို့ ဒဏ်ရာရရှိခဲ့ပြီး အသက် (၄၅) နှစ်အရွယ် ဦးဝေရာမင်းသေဆုံးခဲ့ကြောင်း ဒေသတွင်း သတင်းများမှ သိရသည်။
”အသက် ၄၅ လောက်ရှိမယ့် အမျိုးသားတစ်ဦး မနက်အစောပိုင်းမှာပဲ သေဆုံးသွားတယ် ပြောပါတယ်။ အခုရက်ပိုင်း ဧရာ ဝတီ ဂွအစပ်တိုက်ပွဲတွေကြောင့် စစ်တပ်က လေကြောင်းကဆက်တိုက် အန္တရာယ် ပြုနေတာ။ သတိထားကြစေချင်ပါတယ်” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
စစ်တပ်သည် မေ ၂၆ ရက် ညနေပိုင်းက ရေကျော်ရွာ ဘုန်းကြီးကျောင်းသို့ ပေါင် ၅၀၀ ဗုံးတစ်လုံးနှင့် စာသင်ကျောင်းကို ပေါင် ၃၀၀ ဗုံးတစ်လုံး လာရောက်ကြဲချခဲ့သည့်အပြင် ကျိန္တလီမြို့ အမှတ် (၂) ရပ်ကွက်သို့လည်း ပေါင် ၅၀၀ ဗုံးနှစ်လုံး ထပ်မံကြဲချတိုက်ခိုက်ခဲ့ကြောင်း သိရသည်။
ထို့ပြင် ပြီးခဲ့သည့် ဇွန် ၂၃ ရက် ည ၁၀ နာရီ ၁၈မိနစ်ဝန်းကျင်ကလည်း ဂွမြို့နယ်၊ ကံ့ကော်တောင်ကျေးရွာကို ဂျက်ဖိုက်တာဖြင့် နှစ်ကြိမ်တိုင်တိုင် ဗုံးကြဲတိုက်ခိုက်ခဲ့သည်။ ထိုသို့တိုက်ခိုက်မှုကြောင့် ဗုံးသီးများသည် ခရစ်ယာန်ကျောင်းအနီးနှင့် စာသင် ကျောင်းတို့တွင် ကျရောက်ပေါက်ကွဲပြီး အရပ်သားများ ထိခိုက်ဒဏ်ရာရရှိခဲ့သည်။
အာဏာသိမ်းစစ်အုပ်စုသည် စစ်မြေပြင်တွင် စစ်ရေးအရ အရေးနိမ့်မှုများကို ကုစားရန်နှင့် နယ်မြေ စိုးမိုးမှု ပြန်လည်ရရှိရန်အတွက် စစ်ရေးနှင့်မသက်ဆိုင်သည့် အရပ်သားပြည်သူများ၊ စာသင်ကျောင်း များ၊ ဘာသာရေးအဆောက်အအုံများနှင့် လူနာတင်ယာဉ်များကိုပါ ပစ်မှတ်ထား၍ ဗုံးကြဲတိုက်ခိုက် နေခြင်း ဖြစ်သည်။
ထို့ကြောင့် အာရက္ခတပ်တော် (AA) က ပြည်သူများအနေဖြင့် ရွေးတုအစိုးရစစ်တပ်၏ လေကြောင်း ရန်အန္တရာယ်ကို အထူးသတိပြု နေထိုင်ကြရန် သတိပေးချက်များ ထုတ်ပြန်လျက်ရှိသည်။
ဓာတ်ပုံ- APM
ပုံစာ- စစ်တပ်ဗုံးကြဲတိုက်ခိုက်ခြင်းခံရသည့် ကျိန္တလီမြို့၊
