ဧရာဝတီတိုင်းမ်
မေ ၃၀ရက်
ရက္ခိုင်ပြည်သူ့တော်လှန်ရေးအစိုးရနှင့် အာရက္ခပြည်သူလူထုတစ်ရပ်လုံး ပူးပေါင်းဆင်နွှဲနေသည့် တော်လှန်ရေးမှာ ရခိုင်ပြည်တစ်ဝန်းလုံးနီးပါးအား သိမ်းပိုက်ထိန်းချုပ်နိုင်သည့် အနေအထားသို့ ရောက်ရှိနေပြီဖြစ်ကာ ရာနှုန်းပြည့်အောင်မြင်ရန် လက်တစ်ကမ်းအလိုသို့ ရောက်ရှိနေပြီဖြစ်ပြီး မြောက်ဦးမြို့ပြ တည်ဆောက်ရေးစီမံကိန်း ဖော်ဆောင်နေဟု ရက္ခိုင့်အမျိုးသားအဖွဲ့ချုပ် (ULA) က ယမန်နေ့ (မေလ ၂၉ ရက်) ရက်စွဲဖြင့် ထုတ်ပြန်လိုက်သည်။
အဆိုပါအောင်မြင်မှုများသည် အာရက္ခစစ်သည်တော်များ၏ အသက်၊ သွေး၊ ချွေးမြောက်မြားစွာ ပေးဆပ်မှု၊ ပြည်သူလူထု၏ တာဝန်ကျေပွန်မှုတို့ကြောင့် ဖြစ်သော်လည်း တစ်ဖက်တွင် မဟာမိတ်အဖွဲ့အစည်းများ၊ နိုင်ငံတကာအသိုက်အဝန်းနှင့် အမျိုးသားသစ္စာဖောက်အချို့၏ နှောင့်ယှက်တိုက်ခိုက်မှုများကိုလည်း ဘက်စုံရင်ဆိုင်နေရကြောင်း ဖော်ပြထားသည်။
ထို့အပြင် စစ်ရှုံးစစ်တပ်သည် အာရက္ခပြည်သူများနေထိုင်ရာ မြို့ရွာများအား လက်နက်ကြီး၊ လေကြောင်းများဖြင့် အပြင်းအထန် တိုက်ခိုက်မှုများ ပိုမိုလုပ်ဆောင်လာနေသည်ဟု ဆိုသည်။
ULA အနေဖြင့် တရားဥပဒေစိုးမိုးရေး၊ ကျန်းမာရေး၊ ပညာရေး၊ အုပ်ချုပ်ရေး၊ မြို့ပြ၊ ရပ်ရွာနှင့် ကျေးလက်ဖွံ့ဖြိုးရေး စသည့် နိုင်ငံတည်ဆောက်ရေးကဏ္ဍများနှင့် ပြည်သူ့ဝန်ဆောင်မှုများကို အရှိန်အဟုန်မပျက် ကြိုးပမ်းဆောင်ရွက်လျက်ရှိကြောင်း သိရသည်။
ယခင် ခေတ်အဆက်ဆက်က စနစ်တကျမရှိဘဲ လျစ်လျူရှုခဲ့ခြင်း၊ မြို့ပြစီမံကိန်းများကို နည်းလမ်းမှန်ကန်စွာ မဆောင်ရွက်ခဲ့ခြင်းနှင့် ကိုယ်ကျိုးရှာစီးပွားရေးသမားများ၏ ကျူးကျော်မှုများကြောင့် ရခိုင်ဒေသတစ်ခုလုံး ဖွံ့ဖြိုးတိုးတက်ရေးတွင် စိန်ခေါ်မှုမျိုးစုံ ကြုံတွေ့နေရသဖြင့် စနစ်တကျ ပြန်လည်ပြင်ဆင်နိုင်ရန်အတွက် “မြို့ပြစီမံကိန်းလုပ်ငန်းကော်မတီများ” ကို ဖွဲ့စည်းကာ အားသွန်ခွန်စိုက် ဆောင်ရွက်နေပြီဖြစ်ကြောင်း ထုတ်ပြန်ချက်တွင် ဖော်ပြထားသည်။
အထူးသဖြင့် ရခိုင်ပြည်သူပြည်သားများ အသက်တမျှတန်ဖိုးထားသော နှလုံးသည်းပွတ်ဖြစ်သည့် ကမ္ဘာ့အမွေအနှစ်ဝင် “မြောက်ဦးယဉ်ကျေးမှုအမွေအနှစ်ဇုန်” အား သန့်ရှင်းသပ်ရပ်စွာဖြင့် ရေရှည်ထိန်းသိမ်းကာကွယ်စောင့်ရှောက်နိုင်ရန်နှင့် ကမ္ဘာ့အဆင့်မီ တည်ရှိနေစေရန် ရည်ရွယ်ချက်ဖြင့် “မြောက်ဦးမြို့ပြတည်ဆောက်ရေးစီမံကိန်း” ကို အကောင်အထည်ဖော် ဆောင်ရွက်နေကြောင်းလည်း အသိပေးထားသည်။
သက်ဆိုင်သည့်မြေယာပိုင်ရှင်များနှင့်လည်း တွေ့ဆုံဆွေးနွေးမှုရှိပြီး နယ်နိမိတ်သတ်မှတ်ခြင်းနှင့် သင့်တင့်သောငွေကြေးပေးဆောင်မှုများပါ လုပ်ဆောင်နေသည်ဟုဆိုသည်။
