ဧရာဝတီတိုင်းမ်
မေ ၂၇ရက်
ဘင်္ဂလားဒေ့ရှ်-ရခိုင် နယ်စပ်အနီးတွင် မိုင်းပေါက်ကွဲမှုဖြစ်ပွားပြီး ဒေသခံပြည်သူ သုံး ဦး သေဆုံးခဲ့သည့် ဖြစ်စဉ်နှင့်ပတ်သက်၍ ရက္ခိုင်အမျိုးသားအဖွဲ့ချုပ်/ ရက္ခိုင်တပ်တော် (ULA/AA) နှင့် လုံးဝ (လုံးဝ) သက်ဆိုင်ခြင်းမရှိကြောင်း ယမန်နေ့ မေ ၂၆ ရက်စွဲဖြင့် ULA က ထုတ်ပြန်သည်။
ရခိုင်-ဘင်္ဂလားဒေ့ရှ်နယ်စပ်၊ ဘင်္ဂလားဒေ့ရှ်နိုင်ငံ၊ ဘန်ဒရီဘန်ခရိုင် (ရခိုင်အခေါ် ရွာတော်ခရိုင်)၊ နိတ်ခေါင်ချာရီ မြို့နယ် (ရခိုင်အခေါ် နတ်ကျောက်ဆရီမြို့နယ်) တွင် ပြီးခဲ့သည့် မေ ၂၄ ရက်၊ နံနက် ၁၁ နာရီခန့်က မိုင်းပေါက်ကွဲမှု ဖြစ်ပွားခဲ့ရာ အနီးအနားတွင်တောင်ယာလုပ်ကိုင်နေသည့် ဒေသခံအပြစ်မဲ့ ပြည်သူ သုံး ဦး သေဆုံးခဲ့ကြောင်း သိရသည်။
ယင်းဖြစ်စဉ်အပေါ် ULA/AA အနေဖြင့် များစွာစိတ်မကောင်းဖြစ်ရပြီး မိသားစုများနှင့်အတူ ထပ်တူ ဝမ်းနည်းကြောင်း ဖော်ပြထားသည်။
အဆိုပါ မိုင်းပေါက်ကွဲမှုနှင့် ပတ်သက်၍ အစ္စလာမစ် လက်နက်ကိုင်အဖွဲ့များ ဖြစ်ကြသည့် ARSA၊ ARA၊ RSO အစရှိသည့် အဖွဲ့များနှင့် ၎င်းတို့၏ လက်ကိုင်တုတ် ဝါဒဖြန့် မီဒီယာအချို့က ယင်းမိုင်းများကို ULA/AA က ထောင်ထားခြင်းဖြစ်သည်ဟု မဟုတ်မမှန် စွပ်စွဲ ရေးသားနေကြောင်း ULA က ဆိုသည်။
သို့ရာတွင် မိုင်းပေါက်ကွဲခဲ့သည့်နေရာသည် တရားမဝင် ဖြတ်သန်းသွားလာလှုပ်ရှားနေသည့် ARSA၊ ARA၊ RSO စသည့် လက်နက်ကိုင်များ ကျင်လည်ကျက်စားရာ နယ်မြေဖြစ်ပြီး၊ ဒေသခံတိုင်းရင်းသားများကို မသွားလာရန် ၎င်းအဖွဲ့များက ကန့်သတ်ပိတ်ပင်ထားသည့် နယ်မြေဖြစ်ကြောင်း ULA၏ ထုတ်ပြန်ချက် တွင် ဖော်ပြထား သည်။
ထို့အပြင် ဘင်္ဂလားဒေ့ရှ်အစိုးရနှင့် အာရက္ခပြည်သူ့တော်လှန်ရေးအစိုးရတို့အကြား တရားဝင် အသိ အမှတ်ပြုမှု မရှိသေးသော်လည်း နယ်စပ်ဒေသ ပြည်သူများ၏ လူမှုစီးပွား၊ ကျန်းမာရေးနှင့် လူသားချင်းစာနာထောက်ထားမှုဆိုင်ရာ ကိစ္စရပ်များတွင် တိုးတက်မှုနှင့် နားလည်မှုများ ရရှိနေသည်။
ယင်းအပေါ် ဒေသတွင်း နိုင်ငံတကာအဆင့် အဖွဲ့အစည်းအချို့က နိုင်ငံရေးလုပ်ကြံမှုများဖြင့် တိုက်ခိုက် လိုသောကြောင့် ULA/AA နှင့် ဘင်္ဂလားဒေ့ရှ် နှစ်ဖက်ဆက်ဆံရေး ပျက်ပြားအောင် ရည်ရွယ်လုပ်ဆောင် နေခြင်း ဖြစ်ကြောင်းလည်း ဖော်ပြထားသည်။
ရခိုင်-ဘင်္ဂလားဒေ့ရှ် နယ်စပ်ဒေသရှိ မိဘပြည်သူများအနေဖြင့် တောတောင် ထူထပ်သည့်နေရာများနှင့် လူသူပြတ်လပ်သော နေရာများအပြင် ပုံမှန်သွားလာနေကျ လမ်းများတွင်ပင် ARSA၊ ARA၊ RSO ကဲ့သို့ အဖွဲ့များ၏ မိုင်းအန္တရာယ်များကို အထူးသတိပြု သွားလာကြရန် နှိုးဆော်ထားသည်။
နယ်စပ်ဒေသတစ်လျှောက် အကြမ်းဖက်မှုအမျိုးမျိုး ကျူးလွန်နေသည့် လက်နက်ကိုင် အကြမ်းဖက် အန္တရာယ်ကို ကာကွယ်ရန်အတွက် ဘင်္ဂလားဒေ့ရှ်အစိုးရ အပါအဝင် နိုင်ငံတကာ အကြမ်းဖက်မှု တိုက်ဖျက်ရေးအဖွဲ့များနှင့် အတူတကွ ပူးပေါင်းဆောင်ရွက်ရန် အဆင့်သင့်ရှိကြောင်းလည်း ရက္ခိုင် အမျိုးသားအဖွဲ့ချုပ် (ULA) က ထုတ်ပြန်ထားသည်။
ပုံစာ- အစ္စလာမစ် လက်နက်ကိုင်အဖွဲ့ ARSA အဖွဲ့ဝင်များကို တွေ့ရစဉ်။
