ဧရာဝတီတိုင်းမ်
မေ ၂၃ ရက်
စစ်အာဏာရှင်ဆန့်ကျင်ရေးအတွက် ရှစ်လေးလုံးအရေးတော်ပုံမှသည် ၂၀၂၁ နွေဦးတော်လှန်ရေးအထိ တော်လှန်ပါဝင်သူ ဦးမင်းကိုနိုင်ကို ယခုနှစ်၏ ပြည်သူ့ဂုဏ်ရည်ဆု ချီးမြှင်းခဲ့ကြောင်းသိရသည်။
၂၀၂၆ ခုနှစ် ၁၇ ကြိမ်မြောက် ပြည်သူ့ဂုဏ်ရည် ဂုဏ်ပြုပွဲကို မေ ၂၃ ရက်တွင် ထိုင်းနိုင်ငံ၊ ချင်းမိုင်မြို့၌ ကျင်းပရာ ယင်းအခမ်းအနားတွင် ကြေညာလိုက်ခြင်းဖြစ်သည်။
ဦးမင်းကိုနိုင်သည် မြန်မာ့နိုင်ငံရေးသမိုင်းတွင် သိမ့်သိမ့်တုန်အောင်ကိုင်လှုပ်ပြောင်းလဲစေသော ရှစ်လေးလုံးအရေးတော်ပုံမှ နွေဦးတော်လှန်ရေးအထိတိုက်ပွဲရည်ပါဝင်သူ၊ စစ်ကျွန်မခံတွန်းလှန်၊ တိုက်ပွဲဝင်ကာပြည်သူနှင့်အတူတစ်သားတည်းရပ်တည်သူဖြစ်ကြောင်း ပြည်သူ့ဂုဏ်ရည်အသင်း၊ မဲဆောက်ဌာနခွဲ၊ ဗဟိုအလုပ်အမှုဆောင်အဖွဲ့ဥက္ကဌ ( ၂၀၁၆ – ၂၀၁၈ ) ဦးတင်မောင်လေး ( ခေါ်) ဦးကိုလေးက ပြောကြားသည်။
ထို့ပြင်အကျဉ်းစံကာလနှစ်ပေါင်းများစွာ ယုံကြည်ချက်ခိုင်မာစွာနှင့် ပေးဆပ်ရဲရင့်သူ၊ ယနေ့အချိန်ထိ ပြည်သူအတွက်အမှန်တရားကို မျက်နှာမူရပ်တည်နေသူဖြစ်ကြောင်း ၎င်းက ဆက်လက်ပြောကြားသည်။
ဦးမင်းကိုနိုင်သည် ရှစ်လေးလုံးလူထုလှုပ်ရှားမှုတွင် ထိပ်တန်းမှဦးဆောင်ပါဝင်သူဖြစ်ကာ ဒီမိုကရေစီအရေးနှင့် လူ့အခွင့်အရေးကိုတန်ဖိုးထားသူဖြစ်ပြီး ကဗျာ၊ ဝတ္ထုရေးသားခြင်းနှင့် ပန်းချီကို ခုံမင်သူတစ်ဦးဖြစ်သည်။
ဦးမင်းကိုနိုင်သည် ၁၉၉၉ ခုနှစ်တွင် ကနေဒါနိုင်ငံကချီးမြှင့်သော John Humphrey လွတ်မြောက်ဆုကို ဒေါက်တာစင်သီတာမောင်နှင့် ပူးတွဲရရှိခဲ့ပြီး ၂၀၀၀ ခုနှစ်တွင် ချက်သမ္မတနိုင်ငံ People in Need Foundation ကပေးသော Homo Hominid ဆု၊ ၂၀၀၁ ခုနှစ်တွင် နော်ဝေနိုင်ငံက ကျောင်းသားငြိမ်းချမ်းရေးဆု၊ ၂၀၀၅ ခုနှစ်တွင် အမေရိကန်နိုင်ငံ Train Foundation က လူမှုရဲစွမ်းသတ္တိဆု၊ ၂၀၀၉ ခုနှစ်တွင် တောင်ကိုရီးယားနိုင်ငံက ဂွမ်ဂျူး လူ့အခွင့်အရေးဆု၊ ၂၀၁၅ ပြင်သစ်နိုင်ငံက National Order of Merit ဆုချီးမြှင့်ခံထားရကြောင်းသိရသည်။
ဓာတ်ပုံ – လူမှုကွန်ရက်
