ဧရာဝတီတိုင်းမ်
မေ ၂၀ ရက်
ဖားကန့်မြို့နယ်ရှိ မှော်ဝမ်းလေးကျေးရွာကို ရွေးတုအစိုးရစစ်တပ်နှင့် ရှမ်းနီတပ် (SNA) ပူးပေါင်း တပ်က မီးတင်ရှို့ခဲ့သည့်အတွက် နေအိမ် ၅၈ လုံးခန့် မီးလောင်ပျက်စီးသွားကြောင်း သိရသည်။
မှော်ဝမ်းလေးကျေးရွာတွင်ရှိနေသည့် စစ်တပ်နှင့်SNA ပူးပေါင်းအဖွဲ့များသည် ယနေ့ မေ ၂၀ရက် နံနက် ၁နာရီခန့်က နေအိမ်များကို မီးစတင်ရှို့ခဲ့ခြင်းဖြစ်ပြီး မီးငြှိမ်းသတ်နိုင်ခြင်းမရှိသည့်အတွက် နေအိမ် အများစု မီးလောင်ကျွမ်းခဲ့ရကြောင်း ဒေသခံသတင်းရင်းမြစ်များထံမှ သိရသည်။
”အိမ်တိုင်းလိုလို အဖောက်ခံထားရပေမယ့် နေဖို့ အိမ်ခွံတော့ကျန်သေးတာပေါ့။ အခုတော့ ပြန်နေလို့ ရရင်တောင် အိမ်ကမရှိတော့ဘူး” ဟု ဖားကန့်ဒေသခံတစ်ဦးက ဧရာဝတီတိုင်းမ်ကို ပြောသည်။
မီးရှို့ခံရသည့် မှော်ဝမ်းလေးကျေးရွာမှ ဒေသခံများမှာ စစ်ဘေးရှောင်နေရပြီး နေအိမ်အများစုမှာလည်း စစ်တပ်၏ ဖောက်ထွင်းခိုးယူထားမှုကြောင့် တန်ဖိုးကြီးပစ္စည်းများဆုံးရှုံးထားပြီးဖြစ်ကြောင်း သိရသည်။
ကချင်လွတ်လပ်ရေးတပ်မတော် (KIA) သည် ယမန်နေ့ မေ ၁၉ ရက်က ရွေးတုအစိုးရ စစ်တပ်များ ရှိနေသည့် ယူမာကျေးရွာအတွင်းမှနေရာအချို့ကို ဒရုန်းဗုံးများဖြင့်တိုက်ခိုက်ခဲ့သည့်အတွက် စစ်တပ် ဘက်မှ လေးဦးထက်မနည်းသေဆုံးမှုရှိခဲ့သည်။
လတ်တလောတွင် စစ်တပ်က ဖားကန့်ဒေသရှိ ကျေးရွာများအတွင်း စစ်ကြောင်းများ နေရာဖြန့်ထားပြီး SNA တပ်ကိုပါ အလုံးအရင်းခေါ်သွင်းထားသည်။ ဖားကန့်ဒေသတွင်း ရောက်ရှိနေသည့် စစ်တပ်နှင့်SNA တို့သည် ခရီးသွားပြည်သူများထံမှ ဆိုင်ကယ်၊ ငွေကြေးနှင့် ကျောက်စိမ်းများ လုယူသည်အထိ ပြုလုပ် လျက်ရှိကြောင်း သိရသည်။
ပုံစာ-မှော်ဝမ်းလေးကျေးရွာကို စစ်တပ်နှင့်SNA ပူးပေါင်းအဖွဲ့ မီးရှိုနေသည်ကို တွေ့ရစဉ်။
