ဧရာဝတီတိုင်းမ်
မေ ၁၂ရက်
ဧရာဝတီတိုင်း၊ ရေကြည်မြို့နယ်၊ ငါးသိုင်းချောင်းမြို့၊ မြောက်စမ်းရွာရှိ ရွေးတုအစိုးရ စစ်တပ်၏ အမြောက် တပ်-၃၄၄ ကို အာရက္ခတပ်တော် (AA) က ပိတ်ဆို့တိုက်ခိုက်နေပြီး တိုက်ပွဲပြန်လည်ပြင်းထန်လာကြောင်း သိရသည်။
AA နှင့် ပူးပေါင်း တော်လှန်ရေးတပ်များသည် အမြောက်တပ် ၃၄၄ကို ပြီးခဲ့သည့် မေ ၁၀ရက်မှစကာ အင်အားအလုံးအရင်းဖြင့် ထိုးစစ်ဆင်တိုက်ခိုက်နေပြီး စစ်တပ်ဘက်မှ အထိနာနေကြောင်း သတင်း ရင်းမြစ်ထံမှ သိရသည်။
”ပထမအကြိမ်တုန်းက အမြောက်တပ်ဘန်ကာတွေကို ပစ်ခတ်ဖျက်ဆီးနိုင်တဲ့အထိ တပ်ကိုသိမ်းနိုင်ဖို့ နီးစပ်ခဲ့တယ်။ အခုတိုက်ပွဲအခြေအနေအရတော့ အမြောက်တပ်ကို ပိတ်ဆို့ပြီးတော့ တိုက်နေတယ်လို့ သိရတယ်” ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
ဂွ-ငါးသိုင်းချောင်းလမ်းပိုင်းကို စိုးမိုးရန်ကြိုးပမ်းနေသည့် ရွေးတုအစိုးရစစ်တပ်က အမြောက်တပ်အတွင်း အင် အားအလုံးအရင်းဖြည့်ကာ အနီးတဝိုက်ရှိ သီတာကုန်းပြင်၊ နဂါးရစ်တောင်ကြောပတ်လည်ကို စစ်ကြောင်းများခွဲ၍စေလွှတ်မှုရှိသည်။
အဆိုပါစစ်ကြောင်းများနှင့် အမြောက်တပ်ကို ပတ်လည်ဝိုင်းထားသည့် AA တပ်ဖွဲ့များ မကြာခဏ ထိတွေ့တိုက် ပွဲများ ပြင်းထန်နေခဲ့ပြီး စစ်တပ်ဘက်မှ စစ်ကြောင်းထွက်သည့်အချိန်တွင် အစုလိုက် အပြုံလိုက် ထွက်ပြေးမှုများ ရှိနေသည်။
သေဆုံးနှင့် ဒဏ်ရာရလူနာများကိုလည်း အမိုးအုပ် စစ်သုံးဖောကားများဖြင့် ပုသိမ်သို့သယ်ဆောင်သွားပြီး ရွှေမြင်တင်မီးသဂြိုဟ်စက်နှင့် ပုသိမ် စစ်မြေပြင်ဆေးတပ်ရင်း မဆရ- ၄ ကို ခွဲ့ပို့ထားကြောင်း သိရသည်။
ရေကြည် အမြောက်တပ်အတွင်းတွင် ပုသိမ်အခြေစိုက် အနောက်တောင်တိုင်းစစ်ဌာနချုပ်မှ တပ်ရင်း များ၊ ကျုံပျော်ခလရ ၃၆၊ ဖျာပုံအခြေစိုက် ခလရ ၉၈၊ ဓနုဖြူအခြေစိုက် ခလရ ၁၀၈၊ တပ်မ ၆၆လက်အောက်ခံ ခလရ ၁၄၊ ဟင်္သာတ ခလရ၁၈ တပ်များအပြင် အခြားထုတ်နုတ်တပ်များလည်း ပို့ဆောင်ထားသည်။
ပုံစာ-အာရက္ခတပ်တော် AA တပ်ဖွဲ့ဝင်များ(ပုံဟောင်း)။
