ဧရာဝတီတိုင်းမ်
မေ ၁၁ရက်
အာရက္ခတပ်တော် (AA) က ကူညီစောင့်ရှောက်ထားသည့် ဘင်္ဂလားဒေ့ရှ်နိုင်ငံသား ၁၄ ဦးကို ဘင်္ဂလားဒေ့ရှ် နယ်ခြားစောင့်တပ် (BGB) ထံကို တရားဝင်လွှဲပြောင်းပေးအပ်မှုပြုလုပ်ခဲ့ကြောင်း သိရသည်။
မြန်မာနှင့် ဘင်္ဂလားဒေ့ နှစ်နိုင်ငံရေပိုင်နက်တွင် AA က ကူညီထိန်းသိမ်းထားသည့် ဘင်္ဂလားဒေ့ရှ်နိုင်ငံသား ၁၄ ဦးကို ပြီးခဲ့သည့် မေ ၉ရက်နေ့က လွှဲပြောင်းပေးခဲ့ပြီးနောက် တက်ကနက်ဆိပ်ကမ်းမှတစ်ဆင့် မိသားစုထံပြန်ပို့ခဲ့ကြောင်း သိရသည်။
လွှဲပြောင်းပေးခဲ့သူ ဘင်္ဂလားဒေ့ရှ်နိုင်ငံသားများအနက် ၁၀ဦးမှာ ငါးဖမ်းစက်လှေ ချို့ယွင်းပြီးနောက် AA က ကူညီခေါ်ယူထားခြင်းဖြစ်ပြီး ကျန် လေးဦးမှာ ရွေးတုအစိုးရ စစ်တပ်၏ ဖမ်းဆီးခြင်းခံရပြီး ပြန်လည်လွတ် မြောက်လာသူများဖြစ်သည်။
ဘင်္ဂလားဒေ့ရှ်မီဒီယာအချို့ကလည်း ယခုပြန်လွှဲပြောင်းပေးခံရသူများမှာ မတ်လ နောက်ဆုံးအပတ်က စိန့်မာတင်ကျွန်းအနီး ငါးဖမ်းနေသည့်သူများဖြစ်ပြီး AAက ဖမ်းဆီးခဲ့ပြီးနောက် ပြန်လွှဲပေးခဲ့ခြင်း ဖြစ်သည်ဟုဆိုသည်။
နယ်ခြားစောင့်တပ် BGB နှင့် AA၏ ဆက်ဆံရေးမှာ ကောင်းမွန်ထိရောက်သည့်အခြေအနေတွင်ရှိနေပြီး ဘင်္ဂလားဒေ့ရှ်နိုင်ငံသားများလွှဲပြောင်းမှုတွင်လည်း စကားပြန်များမှတစ်ဆင့် ပြောဆို ဆွေးနွေးကြသည့် ရုပ်သံများပါ မီဒီယာများတွင်ဖြန့်ဝေထားသည်။
ပြီးခဲ့သည့် မေ ၁ရက်နေ့ကလည်း AA ထိန်းချုပ်ထားသည့် မောင်တော ကညင်ချောင်း စီးပွားရေးဇုန် ဆိပ်ကမ်းမှ ကုန်စည်စက်လှေတစ်စီး တက်ကနက်ဆိပ်ကမ်းသို့ ဆိုက်ရောက်ခဲ့ကြောင်း သိရသည်။
ဓာတ်ပုံ- APM
