ထက်ထက်ချယ်ရီ/ဧရာဝတီတိုင်းမ်
မေ ၆ရက်
ရန်ကုန်တိုင်း၊ သာကေတမြို့နယ်တွင် ယနေ့ မေ ၆ ရက်နေ့နံနက်ပိုင်းက မီးလောင်မှုဖြစ်ပွားခဲ့ပြီး နေအိမ်အတွင်းရှိ စုဗူးကို ပြန်လည်ဝင်ရောက်ယူဆောင်သည့် အိမ်ရှင်အမျိုးသားတစ်ဦး မီးလောင် သေဆုံး ခဲ့ကြောင်း ဒေသခံများထံမှ သိရသည်။
သာကေတမြို့နယ်၊ ထူပါရုံ (၁) ရပ်ကွက်၊ ထူပါရုံ (၄) လမ်းရှိ နေအိမ်တစ်လုံးတွင် ယနေ့ နံနက် ၃ နာရီ ၁၃ မိနစ်ခန့်က မီးလောင်မှုစတင်ဖြစ်ပွားခဲ့ခြင်းဖြစ်ပြီး သာကေတမြို့နယ်မီးသတ်စခန်းမှ မီးသတ်ယာဉ် များဖြင့် ထွက်ခွာငြှိမ်းသတ်ခဲ့ရာ နံနက် ၃ နာရီ ၂၇ မိနစ်အချိန်တွင် မီးငြိမ်းသွားခဲ့သည်။
“အိမ်ရှင်ဆုံးတာပါ။ စုဗူးကျန်ခဲ့လို့ တက်ယူတာလို့တော့ ကြားတယ်။ အိမ်ပေါ်တက်ရှာတော့ သွပ်ပြား အောက်မှာ ရုပ်အလောင်းကို ပြန်တွေ့တယ်” ဟု ရပ်ကွက်နေပြည်သူတစ်ဦးက ဧရာဝတီ တိုင်းမ်ကို ပြောသည်။
မီးလောင်မှုကြောင့် နေအိမ် သုံးလုံး မီးလောင်ကျွမ်းခဲ့ပြီး မီးသတ်တပ်ဖွဲ့နှင့် ဒေသခံများ ပူးပေါင်းကာ ၁၅ မိနစ်နီးပါးကြာ ငြှိမ်းသတ်ခဲ့ရသည်။
ပြည်သူများမှာ အာဏာသိမ်းစစ်အုပ်စု လက်ထက်တွင် လျှပ်စစ်မီးများ အချိန်အကန့်အသတ်မရှိ ပြတ်တောက် နေခြင်းနှင့်အတူ စားဝတ်နေရေး အလွန်အမင်းကျပ်တည်းလာမှုဒဏ်ကို ခံစားနေရသည်။
“မီးကလည်း ပျက်လိုက်လာလိုက်နဲ့။ လူတွေမှာလည်း စားဝတ်နေရေး ကျပ်တည်းနေတာကို ဒီဖြစ်ရပ် ကနေ မြင်ရတယ်။ အသက်ကိုတောင်ရင်းပြီး စုဗူးတက်ယူရတယ်ဆိုတော့ စဉ်းစားသာကြည့် တော့” ဟု ဒေသခံပြည်သူတစ်ဦးက ဧရာဝတီတိုင်းမ်ကို မှတ်ချက်ပြုသည်။
လက်ရှိတွင် မီးလောင်ကျွမ်းမှုအကြောင်းအရင်းကို စုံစမ်းနေဆဲဖြစ်ပြီး အရေးယူနိုင်ရေးဆက်လက် လုပ်ဆောင်နေကြောင်း သိရသည်။
စစ်တပ် အာဏာသိမ်းပြီးနောက်ပိုင်း ရန်ကုန်မြို့တွင် လျှပ်စစ်မီးပြတ်တောက်မှု စံချိန်တင်ကြုံတွေ့နေရ သည့်အပြင် အာဏာသိမ်းစစ်အုပ်စု၏ ပေါ်တာဆွဲ ဖမ်းဆီးမှုများကြောင့် ပြည်သူများမှာ လုံခြုံရေးအရ စိုးရိမ်ထိတ်လန့်နေရပြီး စားဝတ်နေရေး အခက်အခဲများစွာကြားမှ သဘာဝဘေးအန္တရာယ်များကိုပါ ရင်ဆိုင်နေကြရခြင်းဖြစ်သည်။
ယမန်နေ့ မေလ ၅ ရက်နေ့တစ်ရက်တည်းတွင် ရန်ကုန်တိုင်းအတွင်း သာကေတမြို့နယ် (၁၀) တောင်ရပ်ကွက် အပါအဝင် မီးလောင်မှု ငါး ခုထက်မနည်း ဖြစ်ပွားခဲ့သည်။ ထို့အပြင် ယနေ့ မေလ ၆ ရက် နံနက်အစောပိုင်းတွင်လည်း ပဲခူးတိုင်း၊ ကြို့ပင်ကောက်မြို့နယ်၊ အနောက်ဘက်ဘုရားကြီးလမ်းတွင် မီးလောင်မှု ဖြစ်ပွားခဲ့ကြောင်း သိရသည်။
ဓာတ်ပုံ-မီးသတ်တပ်ဖွဲ့
