ဧရာဝတီတိုင်းမ်
မေ ၅ရက်
ကချင်ပြည်နယ်၊ ရွှေကူမြို့နယ်အတွင်းတိုက်ပွဲများပြန်လည်ပြင်းထန်လာသည့်အတွက် ပြည်သူများ အနေဖြင့် ရွေးအစိုးရစစ်တပ်အနီးသွားလာခြင်းမပြုကြရန် ရွှေကူ PDF ကသတိပေးထားသည်။
ရွှေကူမြို့နယ်အတွင်း ပြီးခဲ့သည့် မေ ၂ရက်မှ စတင်လာသည့် တိုက်ပွဲများကြောင့် စစ်တပ် စစ် ကြောင်း၊ ကာကင်း၊ ဂိတ်များအနီး ပြည်သူများ နီးကပ်စွာသွားလာနေထိုင်ခြင်းမပြုလုပ်ကြရန် ရွှေကူ PDFက ယမန်နေ့ မေ ၄ရက်တွင် ထုတ်ပြန် သတိပေးလာခြင်းဖြစ်သည်။
”စစ်တပ်စစ်ကြောင်းတွေတက်လာနေတဲ့အတွက် ရွှေကူကြားမှာတိုက်ပွဲရှိနေတယ်။ ရွှေကူ KPDF ကလည်း သတိပေးထားတာရှိတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
မဘိမ်း-မြစ်ဆုံ၊ ငါးအိုး- ရွှေကူနယ်မြေများရှိပြည်သူများအနေဖြင့် ညနေ ၆နာရီမှ နံနက် ၉နာရီအတွင်း အသံဆူညံကျယ်လောင်သည့် စက်ယန္တရားများအသုံးပြုခြင်းမပြုလုပ်ရန်လည်း အသိပေးထားသည်။
ထို့အပြင် ရွှေကူ KPDFက စစ်တပ်၏ လက်နက်၊ခဲယမ်းများကို သယ်ယူပေးမှုများ မပြုလုပ်ကြရန်လည်း တားမြစ်ထားသည်။
ရွှေကူမြို့နယ်နှင့်ဆက်စပ်နေသည့် မဘိမ်းမြို့တွင်လည်း စစ်ရေး ပြင်းထန်လာနိုင်သည့်အတွက် ဒေသခံ များကို သတိရှိနေထိုင်ကြရန်နှင့် အသင့်အနေအထားရှိရန် ကချင်လွတ်လပ်ရေးတပ်မတော် (KIA) က နှိုးဆော်ထားသည်ဟု သိရသည်။
မဘိမ်းနယ်အတွင်း စစ်ရေးရောက်ရှိလာမည့်အခြေအနေကြောင့် တစ်ပတ်အတွင်းပြောင်းရွှေ့ကြရန် KIAက အသိပေးမှုရှိသည်ဟုလည်း ဒေသခံအချို့၏ ပြောဆိုချက်အရ သိရသည်။
