ဧရာဝတီတိုင်းမ်
ဧပြီ ၃၀ ရက်
စစ်ကိုင်းတိုင်း၊ အင်းတော်မြို့နယ်ကို ဦးတည်စစ်ကြောင်းထိုးလာသည့် စစ်တပ် စစ်ကြောင်းများ အင်းတော်မြို့အတွင်း ဝင်ရောက်နေပြီဖြစ်ကြောင်း သိရသည်။
ယနေ့ ဧပြီ ၃၀တွင် နဘားရွာနှင့် နားရခေါင်ရွာတွင် တပ်ဖြန့်ထားသည့် စစ်တပ် စစ်ကြောင်းအချို့ အင်းတော်မြို့ထဲ ဝင်ရောက်နေကြောင်း ဒေသတွင်း သတင်းရင်းမြစ်များထံမှ သိရသည်။
”အင်းတော်မြို့ထဲထိ နဘားကနေတက်တဲ့ စစ်ကြောင်းတစ်ဝက်လောက် ဝင်သွားပြီပြောပါတယ်။ စစ်တပ်ထောက်ခံသူတွေကလည်း စစ်တပ်ဝင်သွားပြီ၊ မြို့သိမ်းပြီဆိုပြီး သတင်းဖြန့်နေကြပါပြီ” ဟု ကသာသတင်းရင်းမြစ်က ဧရာဝတီတိုင်းမ်ကို ပြောသည်။
နံနက် ၁၁နာရီ ၄၀မိနစ်အချိန်မှစ၍ အင်းတော်ရှိ ကျန်တောနှင့် ကမ်းနီရွာ အနီးတောတန်းများဘက်ကို စစ်တပ်က Y-12 လေယာဉ်များဖြင့် ဗုံးကြဲချတိုက်ခိုက်နေကြောင်း Indaw Revolution ကဖော်ပြသည်။
ကသာ ခမရ ၃၀၉ မှနေ၍ ပြီးခဲ့သည့် ဧပြီ ၂၁ရက်က အင်းတော်မြို့ကိုဦးတည်၍ အင်အားအလုံးအရင်းဖြင့် ထွက်လာသည့် စစ်တပ် စစ်ကြောင်းသည် တော်လှန်ရေးတပ်ဖွဲ့များ၏ ဟန့်တား တိုက်ခိုက်မှုကြောင့် ယမန်နေ့ ဧပြီ ၂၉တွင် နဘားလမ်းဆုံကို ရောက်ရှိလာခြင်းဖြစ်သည်။
ကသာ၊ အင်းတော်၊ နဘားလမ်းပိုင်းတွင် ဖြစ်ပွားခဲ့သည့် တိုက်ပွဲများ၌ စစ်တပ်ဘက်မှ ဗိုလ်ကြီးအဆင့်ရှိသူများပါသေဆုံးပြီး တော်လှန်ရေးတပ်ဖွဲ့များ၏ အရှင်ဖမ်းဆီးခံရသူများလည်း ရှိကြောင်း သိရသည်။
တော်လှန်ရေးတပ်ဖွဲ့များ ထိန်းချုပ်ထားသည့် အင်းတော်ကို စစ်တပ် စစ်ကြောင်းထိုးရန် ပြင်ဆင်လာချိန်တွင် ဒေသအခြေစိုက် Indaw Revolution ကဒေသခံများကို တိုက်ပွဲဖြစ်ပွားနိုင်ကြောင်း သတိပေးနှိုးဆော်ခဲ့သည်။
စစ်ကြောင်းများ နီးကပ်လာချိန်မှစ၍ အင်းတော်ဒေသခံများ စစ်ရှောင်နေကြရပြီး မော်လူးမြို့၊ နန်းမကြိုင်း၊ နဘား၊ ကမ်းနီ၊ နန်းရခေါင်၊ ကြံတော၊ နန်းတောင်၊ ကျော်ရွာ စသည့် ကျေးရွာများမှ ဒေသခံ ၅၀၀၀ ခန့် ထွက်ပြေးတိမ်းရှောင်နေရသည်။
