‎တိုက်ပွဲဖြစ်ပွားနေသည့် လေးမျက်နှာကို စစ်ကော်မရှင်က စစ်ယာဉ်တန်းများဖြင့် အင်အား ၃၀၀ခန့်ပို့

‎‎ဧရာဝတီတိုင်းမ်
‎ဧပြီ ၁၃ ရက်

‎‎ဧရာဝတီတိုင်း၊ လေးမျက်နှာမြို့နယ်တွင် စစ်ကော်မရှင်နှင့် AAပူးပေါင်းတပ်တို့ ထိတွေ့တိုက်ပွဲများပြင်းထန်နေပြီး စစ်ကော်မရှင်က စစ်ကူများကိုပို့ဆောင်နေကြောင်း သိရသည်။

‎‎ပုသိမ်- မုံရွာလမ်းပိုင်းနှင့် ဟင်္သာတဘက်မှနေ၍ စစ်ယာဉ်တန်း များဖြင့် အင်အား ၃၀၀ ခန့်ကို လေးမျက်နှာ စစ်မျက်နှာပြင်ကို ပို့ဆောင်ခဲ့ပြီး စစ်ယာဉ်တန်း ၁၄စီးခန့်ရှိကြောင်း ဒေသခံသတင်းရင်းမြစ်များထံမှ သိရသည်။

‎”ကျောင်းကုန်းကို ဖြတ်သွားတာ ဝတ်စုံပြည့်နဲ့ စစ်ကားကြီး လေးစီးလောက်ရှိတယ်။ ဒီရက်ပိုင်း စစ်ကားတွေ အသွားအပြန်များနေတယ်” ဟု သတင်းရင်းမြစ်က ဧရာဝတီတိုင်းမ်ကို ပြောသည်။

‎‎ပြီးခဲ့သည့် ဧပြီ ၈ရက်နေ့က ကျုံပျော်မြို့ကိုဖြတ်ပြီး ဟင်္သာတ၊ တလုတ္ထော်ဘက်ကို စစ်ယာဉ်တန်းများဖြတ်သန်းသွားခဲ့ခြင်းဖြစ်ကာ လေးမျက်နှာကို အင်အားပို့ရန်ဖြစ်ကြောင်း သိရသည်။

‎‎ရေကြည် အမြောက်တပ် ၃၄၄မှနေ၍ စစ်ကော်မရှင် စစ်ကြောင်းများလည်းထွက်လာနေပြီး ပုသိမ်- မုံရွာလမ်းပိုင်းမှ ရေနံ့သာ လမ်းဆုံအတိုင်း နယ်မြေရှင်းလင်းရေးလုပ်ဆောင်ရန် ပြင်ဆင်နေကြခြင်းဖြစ်သည်။

‎ယခု ရက်ပိုင်းအတွင်း စစ်ကော်မရှင်က တိုက်ပွဲဖြစ်ပွားရာနေရာများနှင့် နယ်မြေစိုးမိုးမှုမရှိသည့်နေရာများကို လူသစ် စစ်မှုထမ်းများ၏ အင်အားကိုယူ၍ စစ်ကူဆက်တိုက်ပို့နေခြင်းဖြစ်သည်။

‎‎လေးမျက်နှာနှင့် ဆက်စပ်သည့်ရေကြည်မြို့နယ်အတွင်းကိုလည်း စစ်ကြောင်းများဖြန့်၍ စစ်အင်အားပို့နေပြီး အဆိုပါစစ်ကြောင်းများကို တော်လှန်ရေးတပ်ဖွဲ့များက တိုက်ခိုက်ထားသည့်အတွက် အထိနာနေကြောင်း သိရသည်။