ဧရာဝတီတိုင်းမ်
(ထန်တလန်)၊ ဧပြီ ၁၀ ရက်
ချင်းကာကွယ်ရေးတပ်ဖွဲ့ (ထန်တလန်) နှင့် ထန်တလန်မြို့နယ်ကောင်စီ တည်ထောင်ခြင်း ၅ နှစ်ပြည့် အခမ်းအနားကို ဧပြီလ ၆ ရက်နေ့က ထန်တလန်မြို့နယ် တစ်နေရာတွင် ကျင်းပခဲ့ပြီး နယ်မြေအတွင်းရှိ စစ်ကော်မရှင်တပ်စခန်းအားလုံးကို အမြစ်ပြတ်တိုက်ထုတ်နိုင်ရေး မဟာမိတ်များနှင့် ပူးပေါင်း ဆောင်ရွက် သွားမည်ဖြစ်ကြောင်း ယမန်နေ့ ဧပြီ ၉ ရက်တွင် ထုတ်ပြန်ကြေညာသည်။
အဆိုပါ ၅ နှစ်ပြည့် အခမ်းအနားတွင် တိုက်ပွဲဝင်ထူးချွန်ရဲဘော်များ၊ ကိုယ်ကျိုးစွန့် အနစ်နာခံခဲ့ကြသည့် ရဲဘော်များနှင့် ထိခိုက်ဒဏ်ရာရရှိသော်လည်း တော်လှန်ရေးတာဝန်ကို ဆက်လက်ထမ်းဆောင် နေသူများအား ဂုဏ်ပြုဆုနှင့် စွမ်းဆောင်ရည်ဆုများ ပေးအပ်ခဲ့ကြောင်း သိရသည်။
တော်လှန်ရေး ၅ နှစ်တာကာလအတွင်း ချင်းကာကွယ်ရေးတပ်ဖွဲ့ (ထန်တလန်) မှ ရဲဘော် ၆၈ ဦး တိုင်းပြည်အတွက် သက်စွန့်ကြိုးပမ်း ကျဆုံးခဲ့ရပြီး၊ ဒဏ်ရာရရှိသူ ၂၅ ဦးထက်မနည်း ရှိခဲ့သည်။ ထို့ပြင် စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်မှုနှင့် အကြောင်းမဲ့ ဖမ်းဆီး သတ်ဖြတ်မှုများကြောင့် ထန်တလန်ဒေသခံပြည်သူ ၂၀ ကျော် သေဆုံးခဲ့ရကြောင်း ထုတ်ပြန်ချက်တွင် ဖော်ပြထားသည်။
စစ်တပ်က အာဏာသိမ်းပြီးနောက် ထန်တလန်မြို့ကို အလုံးစုံမီးရှို့ဖျက်ဆီးခဲ့သဖြင့် လက်ရှိတွင် ဒေသခံပြည်သူများ နေထိုင်ခြင်းမရှိတော့ဘဲ မြို့ပျက် တစ်ခုအဖြစ် ကျန်ရှိနေကာ မြို့ပေါ်နယ်မြေများကို CDF-Thantlang နှင့် စစ်ကောင်စီတပ်တို့က တစ်ဝက်စီ ထိန်းချုပ်ထားသည့် အခြေအနေဖြစ်ကြောင်း သိရသည်။
ချင်းကာကွယ်ရေးတပ်ဖွဲ့ (ထန်တလန်) အနေဖြင့် ချင်းလူမျိုးစုများအကြား စည်းလုံးညီညွတ်မှု တည်ဆောက်ရေးနှင့် နယ်မြေအတွင်း ကျန်ရှိနေသည့် စစ်ကောင်စီတပ်စခန်းများကို အပြီးတိုင် တိုက်ထုတ်နိုင်ရေးအတွက် ပြည်တွင်းပြည်ပရှိ မိဘပြည်သူများအနေဖြင့် အသိဉာဏ်၊ ငွေကြေးနှင့် အင်အားများဖြင့် ဆက်လက်ဝန်းရံပေးကြရန် မေတ္တာရပ်ခံထားပြီး အာဏာရှင်စနစ် ချုပ်ငြိမ်းသည့်အထိ ဆက်လက်တိုက်ပွဲဝင်သွားမည်ဟု ကြေညာထားသည်။
ဓာတ်ပုံ- CDF-Thantlang
