စစ်တွေတွင် AA ၏ ပစ်ခတ်မှုကြောင့် စိုးရိမ်မှုမြင့်တက်နေသည့် စစ်ကော်မရှင်က မြို့နယ်အသီးသီးမှ ဆုတ်ခွာလာသည့် တပ်ပျက်များကိုစုပေါင်း၍ ခံစစ်ပြင်နေ

‎ဧရာဝတီတိုင်းမ်
‎ဧပြီ ၃ ရက်
‎

ရခိုင်ပြည်နယ်၊ မြို့တော်စစ်တွေတွင် အာရက္ခတပ်တော် (AA) ၏ ဝိုင်းပတ်ပိတ်ဆို့ ထိုးစစ်ဆင်မှု များကြောင့် မြို့နယ်အသီးသီးမှ ဆုတ်ခွာလာရသည့် တပ်ပျက်များကို စုပေါင်း၍ စစ်ကော်မရှင်က အသည်းအသန် ခံစစ်ပြင်ဆင်နေကြောင်း သိရသည်။
‎

ရခိုင်ပြည်နယ်အတွင်း စစ်ရှုံးနိမ့်လာကြသည့် တပ်ရင်းတပ်ဖွဲ့များကို စစ်တွေမြို့ရှိ ဆက်သွယ်ရေး တပ်ရင်း ဆသရ-၈၁၈ အတွင်း အလုံးအရင်းနှင့် ပြန်လည်စုဖွဲ့ထားပြီး အခိုင်အမာ ခံစစ်ပြင်ဆင်မှုများ လုပ်ဆောင်နေခြင်းဖြစ်သည်။

အဆိုပါ တပ်ပေါင်းစုတွင် ကျောက်တော်အခြေစိုက် စကခ-၉၊ တောင်ကုတ်အခြေစိုက် စကခ-၅၊ ဘူးသီးတောင်အခြေစိုက် စကခ-၁၅ နှင့် အခြေချစစ်ဗျူဟာ (စဗခ) ဘူးသီးတောင် တပ်များ ပါဝင်ကြောင်း သိရသည်။

“စစ်တွေက သူတို့အတွက် သိက္ခာပိုင်းအရရော၊ နောက်ဆုံးခံစစ်အနေနဲ့ပါ အရေးကြီးနေတော့ အသေခံ ခံစစ်လိုမျိုး ပြင်နေတာပါ။ အရာရှိပိုင်းတွေကတော့ အခြေအနေမဟန်ရင် ပြေးမှာပဲ” ဟု မြေပြင်စစ်ရေး အခြေအနေ သိရှိသူတစ်ဦးက ဧရာဝတီတိုင်းမ် ကို ပြောသည်။
‎

လက်ရှိတွင် အနောက်ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် ကျော်စွာဦးကိုယ်တိုင် စစ်တွေရှိ ဒေသကွပ်ကဲမှုစစ်ဌာနချုပ် (ဒကစ) နှင့် ခလရ-၂၀ အတွင်း အခြေချကာ ခံစစ်ကို တိုက်ရိုက်ကွပ်ကဲနေပြီး AA ၏ လက်နက်ကြီးကျည်များ ကျရောက်မှုကြောင့် ဘန်ကာများပါ အခိုင်အမာ တည်ဆောက် ထားကြောင်း သတင်းရင်းမြစ်များက ဆိုသည်။

စစ်တွေမြို့ပတ်ပတ်လည်ရှိ ရွှေမင်းဂံ၊ ကျားမသောက်၊ ကံကော်ကျွန်း၊ ဝါဘိုနှင့် ပါဒလိတ်ဘက်များကို AA က အဆက်မပြတ် တိုက်ခိုက်ထားသဖြင့် အဆိုပါဒေသရှိ စစ်ကော်မရှင်၏ ကာကင်းတပ်စခန်း အချို့တွင် အပြောင်းအလဲများ ရှိနေသည်။ ထို့ပြင် ကျောက်ဖြူစစ်မျက်နှာတွင်လည်း တောင်ကုတ် စကခ (၅) မှ တပ်အင်အားအချို့ကို စစ်ကူပို့ထားရသော်လည်း အရှုံးနှင့် ရင်ဆိုင်နေရကြောင်း သိရသည်။