ဧရာဝတီတိုင်းမ်
မတ် ၂၈ ရက်
နွေရာသီကာလနေ့အပူချိန်မြင့်တက်လာသဖြင့် ရန်ကုန်တိုင်းအပါအဝင်တိုင်းနှင့် ပြည်နယ်အချို့၌ ဧပြီလ၏ပုံမှန်အပူချိန်ထက် ၁ ဒသမ ၅ ဒီဂရီဆဲလ်စီးယပ်အထက်ပိုနိုင်ကြောင်း ယနေ့တွင် မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်သည်။
နေပြည်တော်၊ ရန်ကန်တိုင်း၊ မန္တလေးတိုင်း၊ ပဲခူးတိုင်း၊မကွေးတိုင်း၊ စစ်ကိုင်းတိုင်းအောက်ပိုင်း၊ ဧရာဝတီတိုင်း၊ ကရင်ပြည်နယ်နှင့် မွန်ပြည်နယ်တို့တွင် ဧပြီလ၏ ပျှမ်းမျှအပူချိန်ထက် ၁ ဒသမ ၅ ဒီကရီဆဲလ်စီးယပ်အထက် ပိုနိုင်မည်ဖြစ်ကြောင်း သိရသည်။
ရန်ကုန်မြို့၏ ပျှမ်းမျှအပူချိန်မှာ ၃၈ ဒီကရီဆဲလ်စီးယက်ရှိသဖြင့် ဧပြီလတွင်ယင်းအပူချိန်ထက်ပိုနိုင်၍ အပူချိန် ၄၀ ဒီကရီဆဲလ်စီးယက်ဝန်းကျင်အထိ အပူချိန်မြင့်တက်နိုင်မည်ဖြစ်သည်။
ထို့ပြင်ကျန်ရှိနေသော စစ်ကိုင်းတိုင်းအထက်ပိုင်း၊ တနင်္သာရီတိုင်း၊ ကချင်ပြည်နယ်၊ ကရင်နီ ( ကယား) ပြည်နယ်၊ ချင်းပြည်နယ်၊ ရခိုင်နှင့် ရှမ်းပြည်နယ်တို့တွင် ဧပြီလ၏ပျှမ်းမျှအပူချိန်ခန့်သာရှိနိုင်ကြောင်း စစ်ကော်မရှင်လက်အောက်ရှိ မိုး/ဇလက ထုတ်ပြန်သည်။
ယင်းပြင် မြန်မာနိုင်ငံအလယ်ပိုင်း၊ အနောက်ပိုင်းနှင့် အရှေ့တောင်ပိုင်းဒေသများတွင် အပူချိန်မြင့်တက်နိုင်မှုနှင့် အတူခရမ်းလွန်ရောင်ခြည်အညွှန်းကိန်းများ မြင့်တက်လာနိုင်ကြောင်း အမျိုးသားညီညွတ်ရေးအစိုးရ ( NUG) က သတိပေးထုတ်ပြန်သည်။
နွေရာသီပိုမိုပူပြင်းလာသဖြင့် ခန္ဓာကိုယ်အတွင်းရှိ ရေနှင့် ဓာတ်ဆားဓာတ်များဆုံးရှုံးမှုဖြစ်ပေါ်နိုင်ဖြင့် အပူဒဏ်ကာကွယ်ရေးအဖြစ် နေရောင်ခြည်နှင့်တိုက်ရိုက်ထိတွေ့မှုရှောင်နိုင်ရန် တတ်နိုင်သမျှအရိပ်ထဲတွင်နေရန်၊ ထီး၊ ဦးထုပ်၊ ဆောင်းရန်၊ နေပူထဲမှပြန်လာပြီး ချက်ချင်းရေချိုးခြင်းကို ရှောင်ရန်လိုအပ်ကြောင်း ကျန်းမာရေးဝန်ကြီးဌာနက ထုတ်ပြန်သည်။
ထို့ပြင်အပူဒဏ်ကြောင့် ပင်ပန်းနွမ်းနယ်လာပါက ခေါင်းမူနောက်ခြင်း၊ ခေါင်းကိုက်ခြင်း၊ ကြွက်တက်ခြင်း၊ နုံးချိပျော့ခွေခြင်း၊ ခန္ဓာကိုယ်အပူချိန်မြင့်တက်ခြင်း၊ တက်ခြင်းနှင့် သတိလစ်ခြင်းတို့ဖြစ်ပေါ်နိုင်သဖြင့် သတိပြုနေထိုင်ရန်လိုအပ်မည်ဖြစ်သည်။
ယခုရက်ပိုင်းအတွင်း အပူချိန်မြင့်တက်နေချိန်၌ အပူရှိန်ပြင်းသောလမ်းမကြီးပေါ် အမိုးအကာအရိပ်မရှိဘဲ စက်သုံးဆီတန်းစီးရသောကြောင့် အပူရှပ်၍ ရုတ်တရက်သေဆုံးသွားရသူ နှစ်ဦးနှင့် မူးလဲသွားသူများရှိနေကြောင်း လူမှုအဖွဲ့အစည်းများထံမှ သိရသည်။
ယခုမတ်လ၏ ပျမ်းမျှအပူချိန်တို့သည် တိုင်းနှင့် ပြည်နယ်အချို့တွင် သုံး ဒီဂရီဆဲလ်စီးယပ်ပိုခဲ့ပြီး ကျန်တိုင်းဒေသကြီးနှင့် ပြည်နယ်တို့တွင် မတ်လ၏ ပျမ်းမျှအပူချိန် ခန့်သာရှိကြောင်း စစ်ကော်မရှင်လက်အောက်ရှိ မိုး/ဇလက ထုတ်ပြန်သည်။
ဓာတ်ပုံ – ဧရာဝတီတိုင်းမ်၊ လူမှုကွန်ရက်
