မြောင်မြို့နယ် သောင်ကြီးရွာကို စစ်ကော်မရှင်က လေကြောင်းမှ ဗုံးကြဲတိုက်ခိုက်သဖြင့် ဒေသခံ ၅ ဦးထက်မနည်း သေဆုံးကာ နေအိမ် ၂၀ ကျော် မီးလောင်ပျက်စီး

ဧရာဝတီတိုင်းမ်
မတ် ၂၃ ရက်

စစ်ကိုင်းတိုင်း၊ မြောင်မြို့နယ်၊ သောင်ကြီးကျေးရွာကို စစ်ကော်မရှင်က ဂျက်ဖိုက်တာဖြင့် ဗုံးပတ်ကြဲ ခဲ့သည့် အတွက် ဒေသခံများ အစုလိုက် သေဆုံးခဲ့ကြောင်း သိရသည်။

တံတားဦးလေတပ်စခန်းမှ တက်လာသည့် ဂျက်ဖိုက်တာသည် ယနေ့ မတ်လ ၂၃ ရက် နေ့လယ် ၁၂ နာရီဝန်းကျင်တွင် သောင်ကြီးရွာကို ဗုံး ၄ ကြိမ်ခန့် ကြဲချတိုက်ခိုက်ခဲ့ခြင်းဖြစ်သည်။ အဆိုပါ တိုက်ခိုက် မှုကြောင့် ဒေသခံ ၅ ဦး သေဆုံးကာ ၁၀ ဦးထက်မနည်း ဒဏ်ရာရရှိခဲ့ပြီး နေအိမ် ၂၀ ကျော် မီးလောင် ပျက်စီးခဲ့ကြောင်း ဒေသခံသတင်းရင်းမြစ်ထံမှ သိရသည်။

“ကျား၊ မ ခွဲမရတာ လေး လောင်း၊ အမျိုးသားက တစ် လောင်း၊ နောက်ထပ်ကောက်မရသေးတာက ၂ လောင်းလောက် ကျန်ဦးမယ်။ အိမ်က ၂၀ လောက် မီးလောင်ကုန်တယ်။ နွားက ၆ ကောင်မီးလောင်တယ် အိမ်အောက်မှာ ပိနေတတဲ့ နွားတွေရှိသေးတယ်”ဟု CDSOM တပ်ဖွဲ့ခေါင်းဆောင် ကိုနွေဦး‌(မြောင်)က ဧရာဝတီတိုင်းမ်ကို ပြောသည်။

လေကြောင်းမှ ဗုံးကြဲတိုက်ခိုက်ခံရမှုကြောင့် သေဆုံးသွားသည့် ရုပ်အလောင်းအချို့မှာ နေအိမ်များ နှင့်အတူ မီးလောင်ကျွမ်းသွားသည့်အတွက် ကျား၊ မ ခွဲခြားရန်ပင် ခက်ခဲနေကြောင်း သိရသည်။ ထို့ပြင် ဒေသခံများပိုင်ဆိုင်သည့် နွား ၁၀ ကောင်ဝန်းကျင်မှာလည်း ဗုံးထိမှန်ခြင်းနှင့် မီးလောင်ကျွမ်းခြင်း တို့ကြောင့် သေဆုံးခဲ့ရသည်။

ပြီးခဲ့သည့် မတ်လ ၂၀ ရက်နေ့ကလည်း မြောင်မြို့နယ်ရှိ နဘတ်ကျေးရွာကို စစ်ကော်မရှင်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ မွေးကင်းစကလေးငယ် တစ်ဦးအပါအဝင် သက်ကြီးရွယ်အို နှစ်ဦး သေဆုံးခဲ့ကြောင်း သိရသည်။

ဓာတ်ပုံ-ကိုနွေဦး(မြောင်)