Screenshot
ဧရာဝတီတိုင်းမ်
မတ် ၂၂ ရက်
အလယ်ပိုင်းတိုင်းစစ်ဌာနချုပ် (လပခ) အတွင်းသို့ ပြည်သူကာကွယ်ရေးတပ်မတော် (PDF) များအပါအဝင် တအာင်းတပ် (TNLA) နှင့်ရက္ခိုင့်တပ်တော် (AA) တပ်ဖွဲ့ဝင်များပါ အလင်းဝင်လာသည်ဟု အလွန်အကျွံ ဝါဒဖြန့်ခဲ့ရာတွင် အမှားအယွင်းများစွာ ပေါ်ပေါက်ပြီး အရှက်ကွဲခဲ့ရသဖြင့် နောက်ထပ် အလင်းဝင်ပွဲ အစီအစဉ်များကို ခေတ္တရပ်ဆိုင်းထားကြောင်း သိရသည်။
စစ်ကော်မရှင်သည် ၎င်းတို့၏ ရွေးကောက်ပွဲအတု လွှတ်တော် (ရွေးတုလွှတ်တော်) ခေါ်ယူမည့်အချိန်နှင့် တိုက်ဆိုင်ပြီး စစ်တိုင်းဌာနချုပ်အသီးသီးတွင် တော်လှန်ရေးအဖွဲ့များ အလင်းဝင်လာသည့် သတင်းများ ဆက်တိုက်ထုတ်ပြန်ရန် စီစဉ်ခဲ့ခြင်းဖြစ်သည်။
သို့သော် ဝါဒဖြန့်မှုများမှာ မြေပြင်အခြေအနေနှင့် ကွဲလွဲကာ အရှက်ကွဲခဲ့သည့်အတွက် ထုတ်ပြန်ရန် စီစဉ်ထားမှုများကို ပြန်လည်စိစစ်နေကြောင်း တပ်သတင်းရင်းမြစ်များက ဆိုသည်။
“PDF တပ်ဖွဲ့ဝင် ၅၀၆ ယောက် အလင်းဝင်တယ်ဆိုပြီး စိတ်ဓာတ်စစ်ဆင်ရေး လုပ်လိုက်တဲ့ဖြစ်စဉ်မှာ စစ်ကော်မရှင်ဘက်က ခွက်ခွက်လန်အောင် ထပ်ပြီး ရှုံးသွားပါတယ်။ ဒါကြောင့် အခြားတိုင်းစစ်ဌာနချုပ်တွေမှာ ဆက်တိုက်လုပ်ဖို့ ပြင်ဆင်ထားတာတွေကို စိစစ်ဆိုင်းငံ့ထားရပြီလို့ ကြားသိရပါတယ်” ဟု CDM ဗိုလ်ကြီးဇင်ယော်က ဧရာဝတီတိုင်းမ်ကို အတည်ပြုပြောကြားသည်။
လပခတွင် ပြီးခဲ့သည့် မတ်လ ၁၉ ရက်နေ့က AA၊ TNLA နှင့် PDF စုစုပေါင်း ၅၀၆ ဦး လက်နက်နှင့်အတူ အလင်းဝင်လာသဖြင့် ဆုကြေးငွေ ကျပ်သိန်း ၂၀၀၀ ခန့် ပေးအပ်ခဲ့သည်ဟု စစ်ကော်မရှင်က ဝါဒဖြန့်ခဲ့သည်။
သို့သော် အဆိုပါပွဲတွင် တော်လှန်ရေးတပ်ဖွဲ့ဝင်အဖြစ် သရုပ်ဆောင်သူများ ဝတ်ဆင်ထားသည့် ယူနီဖောင်း ဘတ်တံဆိပ်များမှာ လွဲမှားနေသည့်အပြင် သက်ကြီးရွယ်အို အမျိုးသမီးများပါဝင်နေသည်။ ဧရာဝတီတိုင်းမ်၏ စုံစမ်းချက်အရ တပ်မိသားစုဝင်များနှင့် ၎င်းတို့၏ သားသမီးများကိုပါ ထည့်သွင်းအသုံးပြုထားကြောင်း သိရသည်။
ထို့အပြင် မတ်လ ၂၀ ရက်နေ့ကလည်း တောင်ပိုင်းတိုင်းစစ်ဌာနချုပ် (တောင်ငူမြို့) တွင် AA အဖွဲ့ဝင် တစ်ဦးနှင့် PDF ၂၂ ဦး အလင်းဝင်လာကြောင်း စစ်ကော်မရှင်က ထပ်မံထုတ်ပြန်ခဲ့သည်။
ထိုသို့ အလင်းဝင်ရောက်လာကြသူများသည် ပဲခူးတိုင်းအတွင်းရှိ ညောင်လေးပင်၊ ရွှေကျင်၊ ရွှေတောင်၊ ရေတာရှည်၊ ပန်းတောင်း၊ အုတ်ဖို၊ မင်းလှ၊ ဖြူးနှင့် ပေါက်ခေါင်းမြို့နယ်တို့မှဖြစ်ပြီး ငွေကျပ်သိန်း ၅၀၀ ကျော် ပေးအပ်ကာ မိဘများထံ ပြန်လည်အပ်နှံသည့် ပုံစံမျိုးဖြင့် ဝါဒဖြန့်ခဲ့ခြင်း ဖြစ်သည်။
ပုံစာ-PDF ၊AA၊ TNLA နှင့် PDF တပ်ဖွဲ့ဝင် ၅၀၆ ဦး လက်နက်နှင့်အတူ အလင်းဝင်လာကြောင်း ဝါဒဖြန့်ထားသည်ကိုတွေ့ရစဉ်။
