ဧရာဝတီတိုင်းမ်
မတ် ၁၆ ရက်
ရှမ်းပြည်နယ်မြောက်ပိုင်း၊ တအာင်းတပ်မတော် (TNLA) ထိန်းချုပ်ထားသည့် ကွတ်ခိုင်မြို့ကို ကိုးကန့်တပ် (MNDAA) က ယမန်နေ့ မတ် ၁၅ ရက် မွန်းလွဲပိုင်းက တိုက်ခိုက်သိမ်းပိုက်ခဲ့ကြောင်း သိရသည်။
ယမန်နေ့ မွန်းလွဲ ၁ နာရီနောက်ပိုင်းတွင် တအာင်းတပ်မတော် (TNLA) များ မြို့အတွင်းမှ ဆုတ်ခွာ သွားသဖြင့် ညနေပိုင်းတွင် ကိုးကန့်တပ် (MNDAA) က ကွတ်ခိုင်မြို့တစ်မြို့လုံးကို ထိန်းချုပ်လိုက်ခြင်း ဖြစ်သည်။
“ဒီနေ့မွန်းလွဲ ၁ နာရီလောက်မှာ ပစ်ခတ်သံတွေ စဲသွားတာ။ ဗျူဟာကုန်းထဲမှာရှိနေတဲ့ တအာင်း တပ်ဖွဲ့တွေက လက်နက်ချပြီး ထွက်ခွာပေးဖို့ နှစ်ဖက်အရာရှိတွေ ဆွေးနွေးခဲ့ကြတယ်လို့ သိရတယ်” ဟု ကွတ်ခိုင်မြို့ခံ သတင်းရင်းမြစ်က ဧရာဝတီတိုင်းမ်ကို ပြောသည်။
MNDAA သည် TNLA ၏ တပ်စခန်းများဖြစ်သော မန်ပြိန်းနှင့် ကောင်းခါးရွာလမ်းခွဲရှိ စခန်းများကို မတ်လ ၁၄ ရက်နေ့မှစတင်၍ လက်နက်ကြီး၊ လက်နက်ငယ်များအပြင် ဒရုန်းဗုံးများဖြင့်ပါ အရှိန်မြှင့် တိုက်ခိုက် ခဲ့ခြင်းဖြစ်သည်။ ထို့ပြင် ကွတ်ခိုင်မြို့ရှိ ဗျူဟာတပ်ကုန်း၊ ရှုခင်းသာရှိ ကာကင်းကုန်းနှင့် လွိုင်ဆမ်ဆစ် တောင်ကုန်းစခန်းများကိုလည်း ဒရုန်းများဖြင့် တိုက်ခိုက်ခဲ့ကြောင်း တအာင်းတပ်မတော် (TNLA) ၏ ထုတ်ပြန်ချက်အရ သိရသည်။
ထို့ပြင် ကွတ်ခိုင်မြို့နယ်အတွင်းရှိ မုံးစီး၊ မုံးဟွမ်၊ ရှောက်ဟော်၊ လွယ်ကန်၊ မန်ဂျယ်နှင့် နမ့်ဖတ်ကာဒေသရှိ TNLA ၏ တပ်စခန်းများကိုပါ MNDAA က ဒရုန်းဗုံးများ အသုံးပြု၍ တစ်ပြိုင်နက်တည်း တိုက်ခိုက် ခဲ့ကြောင်း ဆိုသည်။
ယင်းအပြင် မူဆယ် (၁၀၅) မိုင်နှင့် တရုတ်-မြန်မာနယ်စပ် ကျင်စန်းကျော့ဂိတ်တွင် တာဝန်ကျနေသည့် TNLA တပ်ဖွဲ့ဝင် ၄၇ ဦးနှင့် လက်နက် ၄၈ လက်ကိုလည်း ကိုးကန့်တပ် MNDAA က ဖမ်းဆီးထိန်းသိမ်း ခဲ့ကြောင်း တအာင်းတပ်ဘက်က ထုတ်ပြန်ထားသည်။
လက်ရှိတွင် ကွတ်ခိုင်မြို့အတွင်း၌ ကိုးကန့်တပ် (MNDAA) တပ်ဖွဲ့ဝင်များ နေရာယူထားပြီး စစ်ရေး တင်းမာမှုများ ဆက်လက်ရှိနေဆဲဖြစ်ကြောင်း သိရသည်။
ဓာတ်ပုံ-လူမှုကွန်ရက်
