ဧရာဝတီတိုင်းမ်
မတ် ၁ရက်
ဧရာဝတီတိုင်းအတွင်း တိုက်ပွဲများ ပြန်လည်ဖြစ်ပွားလာပြီး လေးမျက်နှာမြို့နယ်တွင်လည်း စစ်ကော်မရှင်နှင့် အာရက္ခတပ်တော် (AA) တို့ တိုက်ပွဲဖြစ်ပွားနေကြောင်း သိရသည်။
လေးမျက်နှာမြို့နယ်အစပ်ရှိ ကျေးရွာအချို့ကို စစ်ကော်မရှင်က ပြန်လည် ထိန်းချုပ်မှုများရှိနေပြီး ပြီးခဲ့သည့် ဖေဖော်ဝါရီ ၂၅ရက်နှင့် ၂၆ ရက်တို့တွင် Y12၊ ဂျက်ဖိုက်တာ သုံးစင်းဖြင့် လေကြောင်း တိုက်ခိုက်ခဲ့ကြောင်း ဒေသခံ သတင်းရင်းမြစ်ထံမှ သိရသည်။
”မနေ့ကအထိ လေးမျက်နှာဘက်ကို လက်နက်ကြီးကျသံတွေကြားနေရတယ်။ အဲဒီ့နားက ဒေသခံ တွေလည်း ပြေးသွားကြပြီပေါ့။ ချင်းလယ်ဘက်ကိုလည်း စစ်တပ် စစ်ကြောင်းဝင်တယ် ပြောပါတယ်” ဟု လေးမျက်နှာမြို့ခံတစ်ဦးက ဧရာဝတီတိုင်းမ်ကို ပြောသည်။
စစ်ကော်မရှင်သည် လှော်ကထား၊ သဲနုကုန်း၊ စိန်တောင်၊ စောပြာစသည့်ကျေးရွာများကို ပြန်လည် နေရာယူထားပြီး ခလရ ၁၄ ၏ စစ်ကြောင်းများ လှည့်လည်နေကြောင်း သိရသည်။ ထို့အပြင် ချင်းကုန်းကျေးရွာအုပ်စု အတွင်းရှိ ကျေးရွာ သုံးခုထက်မနည်းတွင် စစ်ကော်မရှင်တပ်က နေအိမ်များကို ဖောက်ထွင်းကာ အဖိုးတန်ပစ္စည်းများနှင့် ပဲ၊ စပါးများကိုပါ ယူဆောင်သွားကြပြီး နေအိမ်များကို မီးရှို့ခဲ့သည်။
စစ်ကော်မရှင်၏ အမြောက်တပ် ၃၄၄ မှ လက်နက်ကြီးများဖြင့် ပစ်ခတ်သံများကိုလည်း ယမန်နေ့ နံနက်ပိုင်းကအထိ လေးမျက်နှာမြို့ဘက်မှ ကြားနေရကြောင်း ဒေသခံများက ဆိုသည်။ လေးမျက်နှာ မြို့နယ်ကို ပြီးခဲ့သည့် ဒီဇင်ဘာမှစကာ အင်အားဖြည့်တင်းမှုများပြုလုပ်ထားပြီး ရေကြည်၊ အင်္ဂပူ၊ သာပေါင်း ဘက်တွင်ပါ စစ်ကော်မရှင်က စစ်ကြောင်းထိုးနေကြောင်း သိရသည်။
တိုက်ပွဲများအတွင်း ဒဏ်ရာရနှင့်သေဆုံး စစ်ကော်မရှင်တပ်ဖွဲ့ဝင်များကို ပုသိမ်သို့ အမိုးအုပ်အလုံကာ ဖောကားများဖြင့်ပြန်လည် သယ်ယူလာပြီး ဆေးကုသရမည့်တပ်ဖွဲ့ဝင်များကို စစ်မြေပြင်ဆေးတပ်ရင်း မဆရ-၄ ကိုပို့ဆောင်ကာ ကျန်သူများကို ရင်ခွဲရုံနှင့် ရွှေမြင်တင်မီးသဂြိုဟ်စက်သို့ ပို့ဆောင်ထားသည်။
ဓာတ်ပုံ-လူမှုကွန်ရက်
