‎ရေကြည် အမြောက်တပ် ၃၄၄အနီးတိုက်ပွဲပြင်းထန်နေပြီး ဒဏ်ရာရ သေဆုံး စစ်ကော်မရှင်တပ်သားများကို ကားနှင့်သယ်ထုတ်

‎‎ဧရာဝတီတိုင်းမ်
‎ဖေဖော်ဝါရီ ၂၃ ရက်

‎‎ဧရာဝတီတိုင်း၊ ရေကြည်မြို့နယ်၊ ဂွ- ငသိုင်းချောင်းလမ်း၊ မြောက်စမ်းရွာရှိ အမြောက်တပ် အမတ ၃၄၄ အနီး စစ်ကော်မရှင်နှင့် AAပူးပေါင်းတပ်ဖွဲ့တို့ တိုက်ပွဲပြင်းထန်နေကြောင်း သိရသည်။

‎အမြောက်တပ် ၃၄၄အတွင်း ကျုံပျော် ခလရ ၃၆မှ အင်အားအချို့ကို စစ်ကူပို့ထားရပြီး ဒဏ်ရာရရှိသူများကို စစ်ကော်မရှင်က ကားများဖြင့် သယ်ထုတ်နေရကြောင်း သတင်းရင်းမြစ်များထံမှ သိရသည်။

‎”အမြောက်တပ်ထဲ လက်နက်ကြီးနဲ့အပစ်ခံထိတယ်ပြောတယ်။ စစ်သားတွေကို ကားနဲ့သယ်ထုတ်တယ်” ဟု သတင်းရင်းမြစ်က ဧရာဝတီတိုင်းမ်ကိုပြောသည်။

‎တိုက်ပွဲဖြစ်ပွားနေသည့် အမြောက်တပ်အနီးတဝိုက်ကို စစ်ကော်မရှင်က လက်နက်ကြီး၊ ဒရုန်းနှင့် ပါရာမော်တာများသုံး၍ ဗုံးကြဲတိုက်ခိုက်ခဲ့သည်။

‎အမြောက်တပ်နှင့် နယ်မြေဆက်နေသည့် လေးမျက်နှာမြို့နယ်အတွင်းရှိ စက်စက်ယို၊ ချင်းလယ်စသည့်ကျေးရွာများတွင်လည်း ပစ်ခတ်သံများကြရသည်ဟု ဒေသခံများထံမှ သိရသည်။

‎သီတာကုန်းပြင်ရှိ တော်လှန်ရေးတပ်များ၏ ခြေကုတ်စခန်း တစ်ခုကို ဝင်ရောက်တိုက်ခိုက်ခဲ့သည့် စစ်ကော်မရှင်စစ်ကြောင်းမှာ တိုက်စစ်အသွင်ဆောင်သည့် ခံစစ်အနေအထားပြန်လည်ရောက်ရှိနေကြောင်း CDM ဗိုလ်ကြီးဇင်ယော်က သုံးသပ်သည်။

‎ပြီးခဲ့သည့် ဖေဖော်ဝါရီ ၁၈ရက်နေ့မှစကာ အမြောက်တပ်အနီးတိုက်ပွဲများ ပြင်းထန်လာပြီး ရေကြည်၊ လေးမျက်နှာအစပ်ရှိ ချင်းလယ်ရွာအနီး တော်လှန်ရေး စခန်းငယ်တစ်ခုကို ခလရ ၁၄၏ စစ်ကြောင်းများ ဝင်ရောက်စီးနင်းခဲ့ကြောင်း သတင်းရင်းမြစ်များ ထံမှ သိရသည်။

ဓာတ်ပုံ-လူမှုကွန်ရက်
ပုံစာ- စစ်ကော်မရှင်တပ်စစ်ကား ပုံဟောင်းဖြစ်သည်။