ဧရာဝတီတိုင်းမ်
ဖေဖော်ဝါရီ ၁၉ ရက်
တိုက်ပွဲဖြစ်ပွားနေသည့် ကျောက်ဖြူတွင် စစ်ကော်မရှင်က လက်လွှတ်နယ်မြေများကို ပြန်လည်ထိန်းချုပ်ရန် ဆက်တိုက် စစ်ကြောင်းထိုးနေကြောင်း သိရသည်။
သိုင်းချောင်းဆည်ဘက်ကို ပြီးခဲ့သည့် ဖေဖော်ဝါရီ ၁၆ရက်နေ့တွင် စစ်ကော်မရှင်၏ အင်အား ၇၀ပါစစ်ကြောင်းတစ်ခု စစ်ကြောင်းထိုးတက်လာရာ AA၏ကြားဖြတ်တိုက်ခိုက်မှုကြောင့် တပ်ဖွဲ့ဝင်တချို့သေဆုံးပြီး လက်နက်များကို AAက သိမ်းဆည်းရမိခဲ့ကြောင်း သတင်းရင်းမြစ်ထံမှ သိရသည်။
”တိုက်ပွဲအတွင်း စစ်တပ်က ၁၀ယောက်လောက်သေတယ်ပြောပါတယ်။ မြို့နားကို တော့ မင်းပြင် ရေဒါစခန်းမှာ ဝါဒဖြန့်ဓာတ်ပုံရိုက်တုန်း အစုလိုက်သေပြီးကတည်းက တပ်တွေပြန်ပြီးနေရာယူလာတာရှိတယ်လေ စစ်ဆိုင်နေတယ်ပေါ့” ဟုကျောက်ဖြူသတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်နှင့် AAတပ်ဖွဲ့များမှာ ကျောက်ဖြူ လမ်းကွဲတွင် စစ်ရေးပြင်းထန်နေပြီး ဓညဝတီရေတပ်ဌာနချုပ် တောင်ဘက်ရှိ ဦးကင်းနှင့် ထောင့်ချောင်းတို့တွင် စစ်ကြောင်းထိုးလာသည့် စစ်ကော်မရှင်ကို AAက ပြောက်ကျားစနစ်ဖြင့်တိုက်ခိုက်နေကြောင်း သိရသည်။
လက်ရှိအနေအထားတွင် စစ်ကော်မရှင်က ခြေကုတ်စခန်းနေရာများမှ စစ်ကြောင်းထိုးနိုင်ရန် စောင့်ကြည့်နေပြီး AAကလည်း တိုက်ခိုက်ရန် ခုခံစစ်ပြင်ဆင်သည့်အနေအထားဖြင့် ကျောက်ဖြူမြို့ တောင်ဘက် ၁၀- ၁၁မိုင်အကွာတွင် စစ်ဆိုင်နေကြောင်း Little rabbit ထံမှ သိရသည်။
AAနှင့် ဦးတည်တိုက်ပွဲများမှာ ရေတပ်ဌာနချုပ်နှင့်နီးကပ်လာချိန်တွင် စစ်ကော်မရှင်က တပ်ဖွဲ့ဝင်အချို့ကို နောက်တန်းပြန်ပို့ပြီး ရန်ကုန်တွင် ကြိုဆိုပွဲများပြုလုပ်ထားသည်။
ကျောက်ဖြူတွင် စစ်ကော်မရှင်က ဌာနချုပ်ပါပေးလိုက်ရသည့် အနောက်ပိုင်းတိုင်းစစ်ဌာနချုပ် (နပခ) မှတပ်ပျက်လာသည့် တပ်ရင်းများ၊ တပ်မ ၁၁တပ်မမှူးဦးစီးသည့် တပ်ရင်း ခုနှစ်ရင်းမှ တပ်ဖွဲ့ဝင်များကို အသုတ်လိုက်ပို့လွှတ်ထားသည်။
ထို့အပြင် ရှမ်းမြောက်၊ နောင်ချို၊ တောင်ခမ်းမှပြန်လာသည့် တပ်ရင်းများကိုလည်း ရန်ကုန်တွင် ခေါ်ယူ အသစ်စုဖွဲ့ပြီး ကျောက်ဖြူကို ရေကြောင်း၊ လေကြောင်းမှ ပို့ဆောင်ထားသည်။
ကျောက်ဖြူတိုက်ပွဲအခြေအနေကြောင့် စစ်တွေမှ တိုင်းမှူး လာရောက်ကြီးကြပ်မှုများပြုလုပ်စဉ်တွင် စစ်ကြောင်းများခွဲ၍ စစ်ကြောင်းထိုးပြီး ပါရာမော်တာ၊ လေယာဉ်၊ ဂျက်ဖိုက်တာ၊ ဒရုန်းတို့ဖြင့် အပြင်းအထန် စစ်ဆင်ခဲ့သေးသည်။
ယခုရက်ပိုင်းအတွင်း စစ်ကော်မရှင်က နေ့စဉ်နီးပါး လေကြောင်းတိုက်ခိုက်ခြင်းနှင့် နေဗီများမှ လက်နက်ကြီးများဖြင့် ကျောက်ဖြူရှိ မင်းပြင်၊ ကျောက်ပြောက်၊ ဝမြောင်၊ ငါးအုပ်ကျေးရွာတို့ကို ပစ်ခတ်တိုက်ခိုက်ခဲ့သည်။
ဓာတ်ပုံ- AAတပ်ဖွဲဝင်များ (ပုံဟောင်း)
