ဧရာဝတီတိုင်းမ်
ဖေဖော်ဝါရီ ၁၀ ရက်
ရာသီဥတု ခြောက်သွေ့လာသည်နှင့်အမျှ ရန်ကုန်မြို့အတွင်း လေထုညစ်ညမ်းမှု စတင်ဖြစ်ပေါ်နေပြီး၊ အဆိုပါအခြေအနေသည် ကိုယ်ခံအားနည်းသူများအတွက် ကျန်းမာရေးထိခိုက်နိုင်ကြောင်း ယနေ့ ဖေဖော်ဝါရီ ၁၀ ရက်တွင် မိုးလေဝသနှင့် ဇလဗေဒညွှန်ကြားမှုဦးစီးဌာန (မိုး/ဇလ) က ထုတ်ပြန်သည်။
ရန်ကုန် (ကမ္ဘာအေး) ရှိ လေအရည်အသွေး စောင့်ကြည့်တိုင်းတာရေးစခန်းမှတစ်ဆင့် လေထုအတွင်းရှိ အချင်း ၂.၅ မိုက်ခရိုမီတာနှင့် အောက်သေးငယ်သော အမှုန်အမွှားများ (PM 2.5) ကို တိုင်းတာရာတွင် ပြီးခဲ့သည့် ဇန်နဝါရီလအတွင်း လေထုညစ်ညမ်းမှု သိသိသာသာ ရှိနေခဲ့ကြောင်း သိရသည်။
ဇန်နဝါရီလ၏ လေထုအရည်အသွေး တိုင်းတာချက်များအရ လေထုအရည်အသွေး အသင့်အတင့် (အဝါရောင်အဆင့်) ရှိသည့်နေ့ရက် ၈ ရက်သာရှိပြီး ကျန်းမာရေးအားနည်းသူများနှင့် ခံနိုင်ရည်နည်းပါးသော အုပ်စုများအတွက် ကျန်းမာရေးထိခိုက်စေနိုင်သည့် (လိမ္မော်ရောင်အဆင့်) မှာ ၂၃ ရက်အထိ ရှိခဲ့ကြောင်း မိုး/ဇလ က ဖော်ပြထားသည်။
အဆိုပါ ခံနိုင်ရည်နည်းပါးသော အုပ်စုများတွင် နှလုံးသွေးကြောဆိုင်ရာ ရောဂါအခံရှိသူများ၊ အဆုတ်နှင့် လေပြွန်ရောဂါအခံရှိသူများ ပါဝင်ပြီး ညစ်ညမ်းသောလေကို ရှူရှိုက်မိပါက ရောဂါအခြေအနေ ပိုမိုဆိုးရွားလာနိုင်ကြောင်း သိရသည်။
ကျန်းမာရေးဝန်ကြီးဌာန၏ ထုတ်ပြန်ချက်အရ PM 2.5 အမှုန်အမွှားများသည် အလွန်သေးငယ်သဖြင့် အသက်ရှူလမ်းကြောင်းမှတစ်ဆင့် ခန္ဓာကိုယ်အတွင်းသို့ လွယ်ကူစွာ ဝင်ရောက်နိုင်ပြီး အန္တရာယ်ရှိသော အဆင့်သို့ ရောက်ရှိနေပါက အထူးသတိထား နေထိုင်ရမည်ဖြစ်ကြောင်း အသိပေးထားသည်။
လက်ရှိတွင် နေ့ဘက်နေရောင်ခြည်ဖြာကျနေသည့်နေရာများနှင့် ညအချိန် အလင်းရောင်ရှိသည့် နေရာ များတွင် လေထုအတွင်း အမှုန်အမွှားများ လွင့်ပျံနေသည်ကို သာမန်မျက်စိဖြင့်ပင် မြင်တွေ့နိုင်သော အခြေအနေဖြစ်နေကြောင်း သိရသည်။
ထို့ကြောင့် မသန့်ရှင်းသော လေထုအန္တရာယ်မှ ကာကွယ်နိုင်ရန် အပြင်ထွက်ပါက မျက်စိ၊ အရေပြားနှင့် အ သက်ရှူလမ်းကြောင်းဆိုင်ရာ အကာအကွယ်များ (Mask များ) ကို စနစ်တကျ တပ်ဆင်သွားလာရန် လိုအပ်ကြောင်း ကျန်းမာရေးအသိပေးချက်များတွင် ဖော်ပြထားသည်။
ဓာတ်ပုံ – မိုး/ဇလ၊ လူမှုကွန်ရက်
