ဧရာဝတီတိုင်းမ်
ဖေဖော်ဝါရီ ၈ ရက်
ပဲခူးတိုင်း၊ ပန်းတောင်းတပ်နယ်နှင့် ရခိုင်ရိုးမတောင်ကြားလမ်းတစ်ဝိုက်တွင် အာရက္ခတပ်တော် (AA) ၏ ထိုးစစ်အရှိန် မြင့်တက်လာနေပြီး ကာကွယ်ရေးပစ္စည်းစက်ရုံ ကပစ-(၁၆) တည်ရှိရာ မသုန်ကျေးရွာနှင့် ၅ ကီလိုမီတာဝန်းကျင်အကွာအထိ ချဉ်းကပ်နေရာယူထားပြီဖြစ်ကြောင်း သိရသည်။
လက်ရှိတွင် ကပစ-၁၆ နှင့် ကပ်လျက်ရှိသည့် ပွိုင့် -၅၀၆ စခန်းကုန်းအနီးအထိ AA ၏ ထိုးစစ် ရောက်ရှိလာခြင်းဖြစ်ပြီး စက်ရုံအတွင်းသို့ ရောက်ရှိရန် စခန်းကုန်း နှစ်ခုခန့်သာ ကျန်ရှိတော့ကြောင်း စစ်ရေးသတင်းရင်းမြစ်က ဆိုသည်။
“ပွိုင့်-၅၀၆ စခန်းကုန်းအထိ AA ရောက်လာတဲ့အတွက် မသုန်ရွာကြားမှာ ပွိုင့်-၃၅၃ စခန်းနဲ့ ပွိုင့်-၂၈၈ စခန်းနှစ်ခုသာ ကျန်ရှိတော့မှာ ဖြစ်ပါတယ်” ဟု CDM ဗိုလ်ကြီးဇင်ယော်က စစ်ရေးအခြေအနေကို သုံးသပ် ပြောဆိုထားသည်။
စစ်ကော်မရှင်ဘက်ကလည်း AA တပ်ဖွဲ့များ အရေးကြီးစခန်းကုန်းများအနီးသို့ ချဉ်းကပ်လာခြင်းကို တားဆီးရန် ဒရုန်းနှင့် လေကြောင်းပစ်ကူများကို အသုံးပြု၍ အသည်းအသန် ခုခံလျက်ရှိသည်။
ထို့အပြင် ယမန်နေ့ ဖေဖော်ဝါရီ ၇ ရက်က စစ်ကြောင်းတစ်ကြောင်းလုံး ပြုတ်သွားခဲ့သည့် ပွိုင့်-၆၆၆ စခန်းအနီးသို့ အင်အား ၅၀၀ ခန့်ပါသော စစ်ကြောင်းများဖြင့် ပြန်လည်ထိုးစစ်ဆင်ရန် ကြိုးပမ်း နေခြင်းကြောင့် တိုက်ပွဲများ ဆက်လက်ပြင်းထန်နေကြောင်း သိရသည်။
ပန်းတောင်းတပ်နယ်အတွင်းရှိ မသုန်ကျေးရွာနှင့် ညောင်ကျိုးဘက်သို့ စစ်ကော်မရှင်က လေကြောင်း တိုက်ခိုက်မှုများ ပြုလုပ်ကာ စစ်ကြောင်းများ တိုးမြှင့်စေလွှတ်နေသဖြင့် တိုက်ပွဲ သုံး နေရာထက်မနည်း ဖြစ်ပွားလျက်ရှိကြောင်း သိရသည်။
အလားတူ စစ်ကော်မရှင်သည် ပဲခူးတိုင်းအနောက်ခြမ်း စစ်ရေးအခြေအနေကို ထိန်းသိမ်းရန်အတွက် ပေါင်းတည်မြို့နယ်၊ ပေါက်တောရွာအခြေစိုက် ခမရ-၁၀ တပ်အတွင်းသို့ ရန်ကုန်တပ်နယ်မှ အင်အား ၇၀ ခန့်ပါသော စစ်ယာဉ်တန်း သုံး စီးကို ယနေ့တွင် ထပ်မံဖြည့်တင်းထားကြောင်း သိရသည်။
ဓာတ်ပုံ-AA Info Desk (ပုံဟောင်း)
