နိုင်မင်းလွင်/ဧရာဝတီတိုင်းမ်
ဖေဖော်ဝါရီ ၇ ရက်
အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို သမိုင်းအစဉ်အလာကြီးမားသော ရန်ကုန်တက္ကသိုလ်မှ ဂုဏ်ထူးဆောင်ပါရဂူဘွဲ့ ပေးအပ်ခြင်းသည် စက္ကူသာသာ ဘွဲ့ကတ်ပြား ရောင်းစားမှုဖြစ်ပြီး ဘွဲ့ရူးဂုဏ်ရူးတတ်သည့် ငရဲခွေးကြီးတစ်ကောင်အား ဘွဲ့ဝတ်ရုံ ခြုံပေးခြင်းသာ ဖြစ်ကြောင်း ကျောင်းသားသမဂ္ဂဥက္ကဋ္ဌနှင့် CDM ကထိက တို့က ဝေဖန်ပြောကြားသည်။
စစ်ကော်မရှင်ခန့် ပညာရေးဝန်ကြီး ဒေါက်တာချောချောစိန်က စစ်ခေါင်းဆောင်သည် ၎င်း၏ လက်ထက်အတွင်း နိုင်ငံရေး၊ စီးပွားရေး စသည့် စိန်ခေါ်မှုများကို စနစ်တကျ စီမံခန့်ခွဲနိုင်သည်ဟုဆိုကာ ယမန်နေ့ ဖေဖော်ဝါရီ ၅ ရက်တွင် ရန်ကုန်တက္ကသိုလ် ဘွဲ့နှင်းသဘင်ခန်းမ၌ “ဂုဏ်ထူးဆောင် ပြည်သူ့ရေးရာ စီမံခန့်ခွဲမှုပါရဂူဘွဲ့” ကို အပ်နှင်းခဲ့သည်။
ရန်ကုန်တက္ကသိုလ်သည် သမိုင်းအဆက်ဆက် စစ်အုပ်စု၏ လက်ချက်ဖြင့် ကျောင်းသားအများအပြား ကျဆုံးခဲ့ရသည့်နေရာဖြစ်ပြီး အင်းယားကန်ဘောင်၊ အဓိပတိလမ်းမနှင့် ဘွဲ့နှင်းသဘင်ခန်းမကြီးတို့၌ ကျောင်းသားသွေးများပင် မခြောက်သေးကြောင်း ရန်ကုန်တက္ကသိုလ် ကျောင်းသားများသမဂ္ဂ (ဗကသများအဖွဲ့ချုပ်)မှ တာဝန်ရှိသူက ဆိုသည်။
“ဒီလိုအခြေအနေမှာ စစ်ခေါင်းဆောင်ကို ပြည်သူ့ရေးရာ စီမံခန့်ခွဲရေးမကလို့ ဘာဘွဲ့ပဲပေးပေး စက္ကူကတ်ပြား တစ်ခုထက်တော့ ပိုမှာမဟုတ်ဘူး။ ဘွဲ့ရူးဂုဏ်ရူးတတ်တဲ့ ငရဲခွေးကြီးတကောင်ကို ဘွဲ့ဝတ်ရုံခြုံပေးပြီး မျက်နှာလုပ်တဲ့ လုပ်ရပ်လို့ပဲ မြင်ပါတယ်” ဟု ရန်ကုန်တက္ကသိုလ် ကျောင်းသားများ သမဂ္ဂ (ဗကသများအဖွဲ့ချုပ်) ဥက္ကဋ္ဌ မကလျာနွယ်က ဧရာဝတီတိုင်းမ်ကို ပြောသည်။
လက်ရှိကြုံတွေ့ ရင်ဆိုင်နေရသည့် အကျပ်အတည်းများမှာ အာဏာသိမ်း စစ်ကော်မရှင် ကြောင့်သာဖြစ်ပြီး လူထုကို ဗုံးကြဲ၊ ဖမ်းဆီးသတ်ဖြတ်ရန်မှလွဲ၍ မည်သည့်ထူးခြား စွမ်းဆောင်ချက်မျှ လုပ်ဆောင်ခဲ့ခြင်း မရှိကြောင်း ၎င်းက ဆက်လက်ပြောကြားသည်။
ထို့အတူ ရန်ကုန်တက္ကသိုလ် ကြားကာလတက္ကသိုလ်ကောင်စီ၊ ဆရာ၊ ဆရာမများအသင်းနှင့် ဗကသများ အဖွဲ့ချုပ်တို့ကလည်း ယခုကဲ့သို့ စစ်ခေါင်းဆောင်ကို “ဂုဏ်ထူးဆောင်ပါရဂူဘွဲ့” ပေးအပ်မှု အပေါ် ပြင်းထန်စွာ ရှုတ်ချကြောင်း ပူးတွဲသဘောထား ထုတ်ပြန်ထားသည်။
အဆိုပါ ပူးတွဲသဘောထား ထုတ်ပြန်ချက်တွင် စစ်ရာဇဝတ်တရားခံ စစ်ခေါင်းဆောင်၏ ကိုယ်တွင် ကျောင်းသူကျောင်းသားတို့၏ သွေးများစွန်းပေလျက်ရှိပြီး ညစ်ထေးသောကိုယ်ဖြင့် ဆင်မြန်းသော ဘွဲ့ဝတ်ရုံနှင့် သွေးစွန်းသောလက်ဖြင့် ကိုင်တွယ်သော ဘွဲ့လက်မှတ်သည် ဂုဏ်သိက္ခာကင်းမဲ့ကြောင်း၊ ဘွဲ့နှင်းသဘင်ခန်းမတွင်လည်း သွေးညှီနံ့များ လှိုင်နေပြီဖြစ်ကြောင်း ဖော်ပြထားသည်။
“အစဉ်အလာကြီးမားတဲ့ ရန်ကုန်တက္ကသိုလ်ရဲ့ ဘွဲ့နှင်းမှာ တိုင်းပြည်ကို ရစရာမရှိအောင်ဖျက်နေတဲ့သူကို ဂုဏ်ထူးဆောင်ဘွဲ့ ပေးတာကတော့ ဖားလွန်းအားကြီးတယ်။ သူ့ကို ဒီလိုဘွဲ့ ပေးပါလို့များ တောင်းဆို သလားမသိ။ မလုပ်ရဲတာ ဘာမှမရှိဘူး မဟုတ်လား” ဟု ရန်ကုန်မြို့မှ CDM ကထိက ဆရာမတစ်ဦးက ဧရာဝတီတိုင်းမ်ကို ပြောသည်။
မြန်မာနိုင်ငံတွင် ပထမဆုံးနှင့် အရှေ့တောင်အာရှ၌ အဆင့်မြင့်ဆုံးဟု ကျော်ကြားခဲ့သော ရန်ကုန်တက္ကသိုလ်ကို ၁၉၂၀ ပြည့်နှစ်၊ ဒီဇင်ဘာ ၁ ရက်တွင် စတင်တည်ထောင်ခဲ့ပြီး ရန်ကုန်တက္ကသိုလ် သည် ပညာရပ်ဆိုင်ရာသာမက မြန်မာ့လွတ်လပ်ရေး ကြိုးပမ်းမှုသမိုင်း၏ သန္ဓေတည်ရာ မျိုးချစ်စိတ်ဓာတ်များ ရှင်သန်ထက်မြက်ရာ နေရာလည်းဖြစ်သည်။
ရန်ကုန်တက္ကသိုလ်တွင် ဂုဏ်ထူးဆောင်ဘွဲ့များကို ၁၉၂၁ ခုနှစ်မှ ၂၀၂၀ ပြည့်နှစ်အထိ ရဟန်းတော်များနှင့် နိုင်ငံတကာခေါင်းဆောင်များအပါအဝင် ၇၂ ဦးကိုသာ ချီးမြှင့်ထားပြီး စာပေပါရဂူဘွဲ့ကို ရဟန်းသံဃာများဖြစ်သည့် အဂ္ဂမဟာပဏ္ဍိတ ဘဒ္ဒန္တသီလာ နန္ဒာဘိဝံသ၊ ဘဒ္ဒန္တမာရာဘိဝံသနှင့် ဘဒ္ဒန္တဉာဏိဿရတို့အား ချီးမြှင့်ခဲ့ပြီး ဥပဒေပါရဂူဘွဲ့ကိုမူ ယူဂိုဆလားဗီးယားသမ္မတ မာရှယ်တီးတိုးနှင့် ဗီယက်နမ်သမ္မတ ဟိုချီမင်းတို့ ရရှိထားသည်။
ယခုအခါ စစ်ကော်မရှင်ခန့် ပညာရေးဝန်ကြီး ဒေါ်ချောချောစိန်နှင့် ပါမောက္ခချုပ် ဦးတင်မောင်ထွန်းတို့က စစ်ခေါင်းဆောင်အား ၎င်းတို့၏ တံစိုးလက်ဆောင်အဖြစ် ဘွဲ့ကတ်ပြားကို အသုံးပြုခဲ့ကြခြင်းဖြစ်သည်။
“လက်ရှိ စာသင်ကျောင်းပေါ်တည့်တည့် ဗုံးကြဲချတတ်တဲ့ စစ်ခေါင်းဆောင်ကို ရန်ကုန်တက္ကသိုလ်မှာ ပါရဂူဘွဲ့ပေးတာက ကျောင်းသားထုကို စော်ကားတာပဲ။ CDM လုပ်လို့၊ ဆန္ဒပြလို့ အဖမ်းခံရ၊ အသတ်ခံရတဲ့ ကျောင်း သားတွေ၊ ဆရာတွေ၊ ပညာရေးဝန်ထမ်းတွေဆိုတာလည်း အခုချိန်ထိ မရေမတွက်နိုင်အောင် ရှိနေဆဲပဲ” ဟု ဗကသများအဖွဲ့ချုပ်ဥက္ကဋ္ဌ မကလျာနွယ်က ဆိုသည်။
ဓာတ်ပုံ-MOI
