ဧရာဝတီတိုင်းမ်
ဇန်နဝါရီ ၂၇ရက်
စစ်ကော်မရှင်၏ ဖိအားပေးခြိမ်းခြောက်မှုများကြောင့် ရွေးကောက်ပွဲ အပိုင်း (၃) ကျင်းပခဲ့သည့် ဇန်နဝါရီ ၂၅ နေ့တွင် မဲပေးရမည့် ပြည်သူအချို့ ရပ်ကွက်အတွင်းနေထိုင်ခြင်းမရှိဘဲ ခရီးထွက်ခဲ့ကြကြောင်း သိရသည်။
ရန်ကုန်တိုင်း၊ လှိုင်သာယာမြို့နယ်တွင် နေထိုင်သူ သက်ကြီးပိုင်း အမျိုးသမီး တချို့သည် စစ်ကော်မရှင် လက်အောက်ခံများ၏ ဖိအားပေး မဲပေးခိုင်းသည်ကို ရှောင်လွှဲရန်အတွက် လူစု၍ ဘုရားဖူး ခရီးထွက်ကြကြောင်း မြို့နယ်နေအမျိုးသမီးများထံမှ သိရသည်။
”အိမ်တွေကနေ လိုက်ခေါ်ထုတ်တာတို့ လော်စပီကာနဲ့ အော်ခေါ်တာတို့လုပ်တဲ့အပြင် ဧည့်စာရင်းမပေး တာတို့ ငွေဒဏ်ကောက်မယ်တို့ မျိုးစုံ ခြိမ်းခြောက်နေတာတွေရှိတယ်လေ။ ဒါကြောင့် အမေနဲ့ အိမ်နားက အန်တီကြီးတွေ အယောက် ၃၀ လောက် ကားစုငှားပြီး ဘုရားဖူးထွက်သွားကြတယ်” ဟု လှိုင်သာယာ မြို့နယ်နေ အမျိုးသမီးတစ်ဦးက ဧရာဝတီတိုင်းမ်ကို ပြောသည်။
ပြည်သူတချို့သည် စစ်ခေါင်းဆောင် မင်းအောင်လှိုင်ကျင်းပသည့် ဟန်ပြရွေးကောက်ပွဲတွင် ပါဝင်လိုခြင်း မရှိ၍ ဖိအားများမှလွတ်ကင်းရေးအတွက် ဉာဏ်စွမ်းရှိသမျှရှောင်လွှဲရန် ကြိုးစားကြကြောင်း သိရသည်။
”မဲမပေးရင် စစ်မှုထမ်းရမယ်ဆိုလို့ သားတွေကတော့ မဲရုံသွားပြီး တွေ့တဲ့ခလုတ်နှိပ်လာတယ်ပြောတယ်။ အမေကြီးတို့ကတော့ ဒီရွေးကောက်ပွဲက ဟန်ပြမှန်းသိလျက်နဲ့ ကိုယ့်စနက်မပါအောင် သွားကို မထည့်ဘူး” ဟု အသက် ၆၅နှစ်အရွယ် အမျိုးသမီးကြီးတစ်ဦးက ဧရာ၀တီတိုင်းမ်ကို ပြောသည်။
စစ်ကော်မရှင်က ရွေးကောက်ပွဲကို ဒီဇင်ဘာ ၂၈ရက်မှစတင်ကာ အပိုင်း ၃ ပိုင်းခွဲ၍ ပြုလုပ်ခဲ့ပြီး မဲပေးမည့်ပြည်သူများကို နည်းမျိုးစုံနှင့် ခြိမ်းခြောက်၍ မဲထည့်စေခဲ့ကာ ရွေးကောက်ပွဲကို တက်သုတ် ရိုက်ပြုလုပ်ခဲ့သည်။
စစ်ကော်မရှင်က ကျင်းပသည့် ရွေးကောက်ပွဲသည် စစ်ခေါင်းဆောင် စီမံထားသည့်အတိုင်း စစ်အရာ ရှိများက ကြံ့ခိုင်ရေးပါတီမှ ဝင်ပြိုင်ခဲ့ပြီး အခြားပြိုင်ဖက် ကိုယ်စားလှယ်များကို မဲအပြတ်အသတ်ဖြင့် အနိုင်ရကာ အစိုးရဖွဲ့နိုင်ပြီဖြစ်ကြောင်း ထွက်ပေါ်လာသော မဲစာရင်းရလဒ်များအရ သိရသည်။
ဓာတ်ပုံ-MOI
ပုံစာ-လှိုင်သာယာအရှေ့ပိုင်းရှိမဲရုံတစ်ခုကို တွေ့ရစဉ်
