ဝန်းသိုကို စစ်ကြောင်းထိုးပြီး လေကြောင်းမှဗုံးကြဲတိုက်ခိုက်

‎‎ဧရာဝတီတိုင်းမ်
‎ဇန်နဝါရီ ၉ရက်
‎

စစ်ကိုင်းတိုင်း၊ ကောလင်းခရိုင်၊ ဝန်းသိုမြို့နယ်၊ နမ်းခမ်းတိုက်နယ် အတွင်းရှိ ရပ်ကွက် နှစ်ခုကို စစ်ကော်မရှင်က လေကြောင်းမှ ဗုံးကြဲတိုက်ခိုက်ခဲ့ကြောင်း သိရသည်။
‎

ဝန်းသိုမြို့နယ်ရှိ အရှေ့စက်ရပ်ကွက်နှင့် ဘူတာစုရပ်ကွက်များကို စစ်ကော်မရှင်က ဂျက်ဖိုက်တာ နှစ်စီးဖြင့် ယမန်နေ့ ဇန်နဝါရီ ၈ရက် ည ၇နာရီ ၃၈မိနစ် အချိန်တွင် ငါးကြိမ်ခန့် ဗုံးကြဲတိုက်ခိုက်ခဲ့ကြောင်း Wuntho official news ထံမှ သိရသည်။
‎

“တိုက်ပွဲဖြစ်နေတာမရှိဘဲ ဗုံးကြဲတိုက်ခိုက်တာပါ။ ရွာအချို့မှာလည်း စစ်ကြောင်းထိုးနေပါတယ်” ဟု ဝန်းသိုသတင်းရင်းမြစ်က ဧရာဝတီတိုင်းမ်ကို ပြောသည်။
‎

ဗုံးကြဲတိုက်ခိုက်ခံရမှုကြောင့် အရှေ့စက်ရပ်ကွက်မှ နေအိမ်တစ်လုံးမီးလောင်ပျက်စီးသွားပြီး အသက် ၆၀ကျော် အမျိုးသမီးတစ်ဦးနှင့် အမျိုးသားတစ်ဦးတို့ ထိခိုက်ဒဏ်ရာ ရရှိခဲ့သည်။
‎

ဝန်းသိုမြို့နယ်အတွင်းကို စစ်ကော်မရှင်၏ ခမရ ၁၂၀မှ အင်အား ၃၀၀ ကျော်ပါ ဘီလူးစစ်ကြောင်းက ရွာစဉ်လှည့် စစ်ကြောင်းထိုးပြီး ပြည်သူများကို ဖမ်းဆီး သတ်ဖြတ်မှုများ လုပ်ဆောင်နေကြောင်း သိရသည်။
‎

ပြီးခဲ့သည့် ဇန်နဝါရီ ၄ရက် နံနက် တစ်နာရီအချိန်ခန့်က ကျွန်းတောင်ရွာကို ဘီလူးစစ်ကြောင်းက ဝင်ရောက်စီးနင်းပြီး စစ်ဘေးရှောင်လာသည့် G12ကျောင်းသူတစ်ဦးကို အဓမ္မပြုကျင့် သတ်ဖြတ်ခဲ့ကာ ပြည်သူ ရှစ်ဦးကို စစ်ကြောင်းနှင့်အတူ ဖမ်းဆီး ခေါ်ဆောင်သွားကြောင်း သိရသည်။
‎

ဓာတ်ပုံ- Wuntho Official News
‎ပုံစာ -ဗုံးကြဲခံရသည့် အရှေ့စက်ရပ်ကွက်မှနေအိမ်