ဧရာဝတီတိုင်းမ်
ဇန်နဝါရီ ၉ရက်
ရခိုင်ပြည်နယ်၊ ကျောက်ဖြူမြို့အနီး စစ်ရေးအရ အရေးပါသည့် သစ်ပုတ်တောင်လမ်းကွဲရှိ စစ်ကော်မရှင် စခန်းများကို အာရက္ခတပ်တော် (AA) က တိုက်ခိုက်သိမ်းယူလျက်ရှိကြောင်း သိရသည်။
ကျောက်ဖြူ-ရမ်းဗြဲ လမ်းမပေါ်ရှိ သစ်ပုတ်တောင်လမ်းကွဲအနီးမှ စစ်ကော်မရှင်၏ ခြေကုတ် စခန်းများကို ယမန်နေ့ ဇန်နဝါရီ ၈ ရက်မှစတင်ကာ AA က ထိုးစစ်ဆင်တိုက်ခိုက်နေသဖြင့် တိုက်ပွဲများ အပြင်းအထန် ဖြစ်ပွားနေခြင်းဖြစ်သည်။
“တိုက်ပွဲတွေ စဖြစ်တုန်းက မြို့အနီးက ရွာတွေမှာဖြစ်တာ၊ နောက်တော့ နည်းနည်းဝေးသွားတယ်။ အခု မြို့နားကို ပြန်ကပ်လာပုံရတယ်။ မြို့ပေါ်ကနေ လက်နက်ကြီးသံတွေ အကျယ်ကြီး ကြားနေရတယ်” ဟု ကျောက်ဖြူဒေသခံတစ်ဦးက ဧရာဝတီတိုင်းမ်ကို ပြောသည်။
စစ်ကော်မရှင်တပ်များသည် ပြီးခဲ့သည့် အောက်တိုဘာလအတွင်းက ကုလာဘာကျေးရွာမှတစ်ဆင့် သိုင်းချောင်း၊ မင်းပြင်နှင့် ဇိုင်ချောင်းကျေးရွာများအထိ စစ်ကြောင်းထိုးကာ ခြေကုတ်စခန်းများ ပြု လုပ်ထားခဲ့ခြင်းဖြစ်ပြီး ယခုအခါ အဆိုပါစခန်းများကို AA က ပြန်လည်ထိုးစစ်ဆင်လာခြင်း ဖြစ်သည်။
လက်ရှိတွင် AA ၏ ထိုးစစ်မှာ ကျောက်ဖြူမြို့နှင့် ၁၀ မိုင်ခန့်အကွာအထိ နီးကပ်လာပြီဖြစ်ကြောင်း ရခိုင်စစ်ရေးသတင်းများကို လေ့လာစောင့်ကြည့်နေသည့် Little Rabbit က ဆိုသည်။
ထို့ပြင် ဓညဝတီရေတပ်ဌာနချုပ်မှ ထွက်လာသည့် စစ်ကြောင်းကိုလည်း AA က ဦးကင်းကျေးရွာ အနီးတွင် ကြားဖြတ်တိုက်ခိုက်ခဲ့သဖြင့် စစ်ကော်မရှင်ဘက်မှ ဗိုလ်အဆင့်ရှိသူတစ်ဦးအပါအဝင် အများအပြား ထိခိုက်သေဆုံးခဲ့ကြောင်း သိရသည်။
AA အနေဖြင့် ကျောက်ဖြူမြို့နှင့် ဓညဝတီရေတပ်ဌာနချုပ်အကြား ဆက်သွယ်ရေးလမ်းကြောင်းကို ထိန်းချုပ်မှု ရယူထားနိုင်ပြီဖြစ်ကြောင်း CDM ဗိုလ်ကြီးဇင်ယော်က သူ၏ စစ်ရေးသုံးသပ်ချက်တွင် ထည့်သွင်းပြောကြားထားသည်။
စစ်ကော်မရှင်ဘက်ကမူ ၎င်းတို့၏ အင်အားလိုအပ်ချက်ကို စစ်သင်္ဘောများဖြင့် သယ်ယူ ဖြည့်တင်းပေးနေပြီး ရေတပ်ဌာနချုပ်မှတစ်ဆင့် စစ်ကြောင်းများ ပြန်လည်ဖြန့်ခွဲရန် ကြိုးပမ်း နေကြောင်း သိရသည်။
ပုံစာ-အာရက္ခတပ်တော်(AA) တပ်ဖွဲ့ဝင်များ(ပုံဟောင်း)
