ဧရာဝတီတိုင်းမ်
ဇန်နဝါရီ ၄ရက်
ဧရာဝတီတိုင်းအတွင်းရှိ မြို့နယ် လေးခုထက်မနည်းတွင် စစ်ကော်မရှင်နှင့် AAအပါအဝင်ဒေသတော်လှန်ရေးတပ်ဖွဲ့များ တိုက်ပွဲဖြစ်ပွားနေပြီး စစ်ကော်မရှင်ဘက်မှ အထိနာနေကြောင်း သိရသည်။
တပ်သားလိုအပ်ချက်ကြောင့် စစ်ကော်မရှင်က ရက်တိုသင်တန်းပေးထားသည့် စစ်မှုထမ်းတပ်သားသစ်များကို တိုက်ပွဲဖြစ်ပွားရာ သာပေါင်းလေး၊ လေးမျက်နှာ၊ ရေကြည်၊ အင်္ဂပူနှင့် ပုသိမ်မြို့နယ်များသို့ ပို့ဆောင်နေကြောင်း သတင်းအထူးတပ်ဖွဲ့ ပုသိမ်ထံမှ သိရသည်။
”ပုသိမ်မှာတော့ နေ့တိုင်း လေယာဉ်တွေတက်တယ်။ မနက်က သယ်ယူပို့ဆောင်ရေး ရဟတ်ယာဉ်တစ်စင်း အရှေ့ဘက်ကို တက်သွားတယ်။ လေးမျက်နှာနဲ့ သာပေါင်းဘက်တော့ တိုက်ပွဲကြမ်းတယ်ကြားနေရပါတယ်” ဟု ပုသိမ်ဒေသခံတစ်ဦးက ဧရာဝတီတိုင်းမ်ကို ပြောသည်။
ရှေ့တန်းစစ်မျက်နှာများတွင်အထိနာနေသည့် စစ်ကော်မရှင်က ဒဏ်ရာအပြင်းအထန်ရလာသည့် တပ်သားများကို ပုသိမ် စစ်မြေပြင်ဆေးတပ်ရင်း မဆရ ၄သို့ ပို့ဆောင်နေကြောင်း သိရသည်။
ပြီးခဲ့သည့် ဒီဇင်ဘာ နောက်ဆုံးပတ်အတွင်းတွင် စစ်မျက်နှာပြင်၌ ဒဏ်ရာရလာသည့် စစ်မှုထမ်းတပ်သား ၁၇ဦးကို အနောက်တောင်တိုင်းစစ်ဌာနချုပ် မဆရ ၄သို့ပို့ဆောင်ထားကြောင်း မိသားစုဝင်များကို အကြောင်းကြားသည်ဟု သိရသည်။
အဆိုပါတပ်ဖွဲ့ဝင်များမှာ ပုသိမ် နတခ ရွှေမြင်တင် အမှတ် ၆ စစ်အခြေခံလေ့ကျင့်ရေးတပ်မှဖြစ်ပြီး မဆရ ၄ သို့ရောက်ရှိလာခြင်းမရှိဘဲ ၎င်းတို့မှာ ခြေထောက်ဖြတ်ရမည့်သူများအပါအဝင် အရေးပေါ်ဆေးဝါးကုသပေးရန် လိုအပ်နေသူများဖြစ်ကြောင်း သိရသည်။
လတ်တလောတွင် ဧရာဝတီတိုင်းအတွင်းရှိ မြို့နယ်အချို့၌ တိုက်ပွဲများပြင်းထန်နေကာ ရှေ့တန်းစစ်မျက်နှာပြင်ကို စစ်မှုထမ်းတပ်သားသစ်များအား ကျည်ကာမပေးဘဲ တက်ခိုင်းသဖြင့် အသေအပျောက်များကာ အလောင်းပင်မကောက်နိုင်သည့် နေရာများရှိကြောင်း သတင်းရင်းမြစ်များထံမှ သိရသည်။
