ဧရာဝတီတိုင်းမ်
ဒီဇင်ဘာ ၂၁ ရက်
ဧရာဝတီတိုင်း၊ လေးမျက်နှာမြို့နယ်ကို စစ်ကော်မရှင်က လေကြောင်းတိုက်ခိုက်မှုများ ဆက်တိုက်ပြုလုပ်ခဲ့ရာ ပြည်သူ လေးဦးသေဆုံးကြောင်း သိရသည်။
ယမန်နေ့ ဒီဇင်ဘာ ၂၀ရက် နံနက်ပိုင်းအချိန်တွင် စစ်ကော်မရှင်က လေယာဉ်ဖြင့် ပေါင် ၂၅၀ဗုံး နှစ်လုံးကို လေးမျက်နှာမြို့နယ်၊ စောပြာရွာအတွင်း လာရောက်ကြဲချသွားကြောင်း ဒေသတွင်း သတင်းရင်းမြစ်များထံမှ သိရသည်။
”တိုက်ပွဲကတော့လေးမျက်နှာမြို့နယ်အစပ်တွေမှာရှိတယ်။ စောပြာဘက်မှာလည်းရှိပေမယ့် ဗုံးကြဲတဲ့နေရာနဲ့တော့ အဝေးကြီး။ ဗုံးကြဲချင်လို့ကို လာကြဲသွားတာ” ဟု ဒေသတွင်းသတင်းရင်းမြစ်က ဧရာဝတီတိုင်းမ်ကို ပြောသည်။
ဗုံးကြဲချတိုက်ခိုက်ခဲ့သည့်အတွက် ကျေးရွာအတွင်းမှ နေအိမ် ၁၀လုံးထက်မနည်း ပျက်စီးသွားပြီး ဒေသခံများ တိမ်းရှောင်နေကြရကြောင်း သိရသည်။
ပြီးခဲ့သည့် ဒီဇင်ဘာ ၁၆ရက်နေ့ကလည်း ခတ်ချိုကျေးရွာကို စက်တပ်လေထီးဖြင့် ဗုံးကြဲတိုက်ခိုက်သည့်အတွက် ကျေးရွာအတွင်းမှ အမျိုးသားတစ်ဦး သေဆုံးခဲ့ကြောင်း သိရသည်။
ထို့အပြင် စစ်ကော်မရှင်က စောပြာကျေးရွာကိုပင် ပြီးခဲ့သည့် ဒီဇင်ဘာ ၁၇ ရက်က စက်တပ်လေထီး ပါရာမော်တာဖြင့် ဗုံးကြဲချတိုက်ခိုက်ပြန်ရာ ပြည်သူသုံးဦးသေဆုံးပြီး တစ်ဦးထိခိုက်ဒဏ်ရာရရှိခဲ့သည်။
စစ်ကော်မရှင်က ခလရ ၃၆ကျုံပျော်တပ်ရင်းမှနေ၍ စက်တပ်လေထီးများကိုစေလွှတ်ပြီး လေးမျက်နှာကျေးရွာအတွင်း ဗုံးကြဲတိုက်ခိုက်နေခြင်းဖြစ်သည်။
ရေကြည်အမြောက်တပ် အမတ ၃၄၄မှနေ၍ လေးမျက်နှာနှင့် ရေကြည်အစပ်ကျေးရွာများကို လက်နက်ကြီးများဖြင့် ပစ်ခတ်တိုက်ခိုက်မှုများပါ ပြုလုပ်လျက်ရှိသည်။
ဓာတ်ပုံ – ပန်းတောကြီးလမ်းဆုံ (ပုံဟောင်း)
