ဧရာဝတီတိုင်းမ်
ဒီဇင်ဘာ ၁၉ ရက်
ရန်ကုန်တပ်ရင်းများမှ ထုတ်နုတ်ထားသည့် အင်အားများကို ပဲခူးတိုင်း၊ ပန်းတောင်းမြို့နယ်၊ ညောင်ကျိုးသို့ စစ်ကူပို့ စစ်ကြောင်းထိုးရာ ကြားဖြတ်တိုက်ခိုက်ခံရပြီး ထိခိုက်သေဆုံးမှုများကြောင်း သိရသည်။
ပြီးခဲ့သည့် ဒီဇင်ဘာ ၁၆ ရက်နေ့က လေသာတောင်အနီးဝန်းကျင်ရှိ စစ်ကော်မရှင်တပ်များနှင့် ရန်ကုန်မှ တပ်ပေါင်းစုများ ညောင်ကျိုးကို စစ်ကြောင်းထိုးတက်လာရာ အာရက္ခတပ်တော် (AA) နှင့် တော်လှန်ရေးပူးပေါင်းတပ်ဖွဲ့များက ကြားဖြတ်တိုက်ခိုက်သည့်အတွက် စစ်ကော်မရှင်ဘက်မှ သေဆုံးမှု များပြားကြောင်း သိရသည်။
“အင်အား ၇၀ လောက်ပါတဲ့ စစ်ကြောင်းကို ကြားဖြတ်တိုက်လိုက်တာ။ ထိတွေ့တိုက်ပွဲပြင်းထန်ခဲ့တယ်။ တပ်တွေနောက်ပြန်ဆုတ်သွားပါတယ်”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်တပ်ဖွဲ့ဝင်အချို့ကို AA လက်ရဖမ်းဆီးရမိမှုများရှိပြီး လက်နက်ခဲယမ်းအချို့ကိုပါ သိမ်း ဆည်းနိုင်ခဲ့ကာ ကျန်တပ်ဖွဲ့ဝင်များ နောက်ဆုတ်သွားကြကြောင်း သိရသည်။ထိုသို့ အထိနာပြီး တပ်ဆုတ်သွားရသည့် စစ်ကော်မရှင်က တိုက်ပွဲဖြစ်ပွားရာ ညောင်ကျိုးစခန်းအနီးကို ဂျက်ဖိုက်တာများ ဖြင့် လာရောက်ပစ်ခတ် တိုက်ခိုက်ခဲ့ကြောင်း သိရသည်။
စစ်ကော်မရှင်က ညောင်ကျိုးစခန်းကို ပြန်လည်သိမ်း ယူရန်အတွက် ရန်ကုန်တပ်နယ်မှနေ၍ အင်အားအပြည့်ပါ စစ်ယာဉ်တန်း ၇ စီးကို ပြီးခဲ့သည့် ဒီဇင်ဘာ ၁၄ ရက်နေ့က ရန်ကုန်-ပြည်လမ်းမှတစ်ဆင့် နဝဒေးတံတားကိုဖြတ်ကာ ညောင်ကျိုးတပ်နယ်အတွင်း စစ် ကူများပို့ခဲ့ကြောင်း သတင်းရင်းမြစ်ထံမှ သိရသည်။
စစ်ကော်မရှင်က ညောင်ကျိုး-တောင်ကုတ်လမ်း ကြောင်းကို စိုးမိုးမှုရယူနိုင်ရန် စစ်အင်အားများ ဆက် တိုက်ပို့နေပြီး ညောင်ခြေထောက်နှင့်ဆင်လန်ကြား ကာကင်းစခန်းများ ဆောက်လုပ်ပြီး လက်နက်ကြီး များပါ တပ်ဆင်လာကြောင်း သိရသည်။ပြန်လည်သိမ်းယူလိုက်သည့် ပွိုင့် ၆၆၆ စခန်းကုန်းမှနေ၍လည်း လေသာတောင်ကြောနှင့် ညောင်ကျိုးပတ်လည်ကို စစ်ကြောင်းထိုး တက်လာမှုများရှိပြီး AA နှင့် ထိတွေ့ တိုက်ပွဲများ ရှိခဲ့သည်။
စစ်ကော်မရှင်သည် ၎င်းတို့၏ ရွေးကောက်ပွဲအတုပြုလုပ်မည့်ရက် နီးကပ်လာသည်နှင့်အမျှ တောင်ကုတ် လမ်းပိုင်းကို စိုးမိုးမှုရယူနိုင်ရန် အပြင်းအထန်ကြိုးစားနေခြင်းဖြစ်သည်။
ဓာတ်ပုံ-လူမှုကွန်ရက်(ပုံဟောင်း)
